ବଜାରରେ ଉପଲବ୍ଧ ହୋଇଥାଏ ଭଳିକି ଭଳି ଚା’। ଅଦା ଚା’, ଲବଙ୍ଗ ଚା’ ଠାରୁ ଆରମ୍ଭ କରି ମସଲା ଚା’ ପର୍ଯ୍ୟନ୍ତ, ଗ୍ରାହକଙ୍କ ପସନ୍ଦ ଅନୁଯାୟୀ ପରସି ଦିଅନ୍ତି ଦୋକାନୀ। ଏହାର ଗୋଟିଏ କପ୍ର ମୂଲ୍ୟ ବିଭିନ୍ନ ସ୍ଥାନରେ ଭିନ୍ନ ଥାଏ। କେଉଁଠି ୬ ଟଙ୍କା ଦେଇ ତ କେଉଁ ୧୦,୧୫ ନଚେତ ୨୦ ଟଙ୍କା ଦେଇ ଚା’ ପିଇଥାନ୍ତି ଲୋକେ। ହେଲେ ଯଦି ଆମେ କହୁ ୧ହଜାର ଟଙ୍କିଆ ଚା’ ପିଇବେ? ଆପଣ ଉତ୍ତର ଦେଇ ପାରନ୍ତି ଚା’ ପିଆଇବ ନା ସୁନା।
ପଶ୍ଚିମବଙ୍ଗର କୋଲକାତାରେ ଗୋଟିଏ କପ୍ ଚା’ ୧ହଜାର ଟଙ୍କାରେ ବିକ୍ରି ହେଉଛି। ଏହି ଚା’ର ନାମ ରହିଛି ‘ବୋ-ଲେ’। ଏହି ଖାସ୍ ଚା’ର ପତି ବି ସ୍ବତନ୍ତ୍ର। କାରଣ ଏକ କିଗ୍ରା ଚା’ ପତିର ଦାମ୍ ୩ ଲକ୍ଷ ଟଙ୍କା ।
୭ ବର୍ଷ ପୂର୍ବେ କୋଲକାତାରେ ରହୁଥିବା ପାର୍ଥ ପ୍ରତିମ୍ ଗାଙ୍ଗୁଲୀ ନିଜର ଚା’ ଷ୍ଟଲ(ନିର୍ଜାସ) ଆରମ୍ଭ କରିଥିଲେ। ଏଠାରେ ସେ ଭଳିକି ଭଳି ଚା’ ବିକ୍ରି କରିଥାନ୍ତି। ସେଥିରେ ରହିଛି ସିଲ୍ଭର ନିଡଲ ବାଇଟ୍ ଟି, ଲେଭେଣ୍ଡର ଟି, ହିବିସ୍କସ୍ ଟି, ଓ୍ବାଇନ୍ ଟି, ତୁଲସୀ ଜିଞ୍ଜର ଟି ଆଦି।
ଚା’ ଦୋକାନ କରିବା ପୂର୍ବରୁ ପ୍ରତିମ ଏକ କମ୍ପାନୀରେ କାମ କରୁଥିଲେ। ହେଲେ ସେ ନିଜର ବ୍ୟବସାୟ ଆରମ୍ଭ କରିବେ ବୋଲି ଯୋଜନା ପ୍ରସ୍ତୁତ କରିଥିଲେ। ସେତେବେଳେ ଚା’ର ଷ୍ଟଲ କରିବାକୁ ସେ ବିଚାର କରିଥିଲେ। ନିଜ ଟି’ ଷ୍ଟଲରେ ସେ ୧୦ଟଙ୍କାରୁ ଆରମ୍ଭ କରି ୧୦୦୦ ଟଙ୍କା ଦାମ୍ର ଚା’ ଗ୍ରାହକଙ୍କୁ ପରସିଥାନ୍ତି। ତାଙ୍କ ଦୋକାନର ଚା’ ଏବେ ବେଶ ପ୍ରସିଦ୍ଧ ହୋଇଥିବା ବେଳେ କପେ ଚା’ ପାଇଁ ଗ୍ରାହକଙ୍କ ଲମ୍ବା ଲାଇନ୍ ଦେଖିବାକୁ ମିଳେ।
