ମୁମ୍ବାଇ,୩।୧୨: ଭାରତ ଓ ଭ୍ରମଣକାରୀ ନ୍ୟୁଜିଲାଣ୍ଡ ମଧ୍ୟରେ ଶୁକ୍ରବାରଠାରୁ ଆରମ୍ଭ ହେବାକୁ ଯାଉଛି ଦ୍ୱିତୀୟ ତଥା ଅନ୍ତିମ ଟେଷ୍ଟ ମ୍ୟାଚ୍। ସ୍ଥାନୀୟ ଓ୍ବାଙ୍ଖଡେ ଷ୍ଟାଡିୟମରେ ଖେଳାଯିବାକୁ ଥିବା ଏହି ନିର୍ଣ୍ଣାୟକ ଟେଷ୍ଟ ମ୍ୟାଚ୍ରେ ଅଧିନାୟକ କୋହଲି ଦଳକୁ ପ୍ରତ୍ୟାବର୍ତ୍ତନ କରିବେ। ତେବେ ପାଗ ଓ ଦଳର ମଧ୍ୟକ୍ରମକୁ ନେଇ ଅଧିନାୟକ ଓ କୋଚ୍ ରାହୁଲ ଡ୍ରାଭିଡ୍ ଚିନ୍ତିତ ହେବା ସ୍ବାଭାବିକ।
ମ୍ୟାଚ୍ର ପ୍ରଥମ ଦିନରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ଆଉଟ ଫିଲ୍ଡ ଓଦା ହେବା ସହିତ ପିଚ୍ରେ ଆର୍ଦ୍ରତା ରହିବ। ତେଣୁ ବଲ୍ ଏକ୍ସଟ୍ରା ବାଉନ୍ସ କରିବ। ଏହା ଠାରୁ ମଧ୍ୟକ୍ରମ ସମସ୍ୟା ଢ଼େର ବଡ଼ ଜଣାପଡ଼ୁଛି। କାରଣ କାନପୁର ଟେଷ୍ଟରେ ପଦାର୍ପଣ କରିଥିବା ଶ୍ରେୟସ ଆୟାର ପ୍ରଥମ ଇନିଂସରେ ୧୦୫ ଓ ଦ୍ୱିତୀୟ ଇନିଂସରେ ୬୫ ରନ କରିଥିଲେ। ତାଙ୍କୁ ଦଳରେ ନେବାକୁ ହେଲେ ଚେତେଶ୍ୱର ପୂଜାରା ଓ ଅଜିଙ୍କ୍ୟ ରାହାନେଙ୍କ ମଧ୍ୟରୁ ଜଣଙ୍କୁ ବସାଇବାକୁ ପଡ଼ିବ। ଗୋଟିଏ ପଟେ ପ୍ରତିଭାଶାଳୀ ଯୁବ ବ୍ୟାଟର ଥିବା ବେଳେ ଅନ୍ୟପକ୍ଷରେ ରହିଛନ୍ତି ଦୁଇ ଖେଳାଳି ଅଭିଜ୍ଞ। ଏଭଳି ପରିସ୍ଥିତିରେ ପଦାର୍ପଣ ମ୍ୟାଚ୍ରେ ରେକର୍ଡ କରିଥିତ୍ବା ଶ୍ରେୟସଙ୍କ ସ୍ଥାନ ମଧ୍ୟ ଦଳରେ ନିଶ୍ଚିତ ନୁହେଁ। ପୂର୍ବରୁ ମଧ୍ୟ ଏପରି ହୋଇଛି। ୨୦୧୬ ଇଂଲଣ୍ଡ ବିପକ୍ଷ ଚେନ୍ନାଇ ଟେଷ୍ଟରେ କରୁନ ନାୟାର ୩୦୩ ରନର ଅପରାଜିତ ତ୍ରିଶତକୀୟ ପାଳି ଖେଳିଥିଲେ। ଏହାସତ୍ତ୍ୱେ ତାଙ୍କୁ ପରବର୍ତ୍ତୀ ସିରିଜରୁ ବାଦ୍ ଦିଆଯାଇଥିଲା।
୨୦୧୨ ରେ ଅଜିଙ୍କ୍ୟ ରାହାନେ କ୍ରମାଗତ ଦ୍ୱାଦଶଥର ପାଇଁ ବ୍ୟାଟିଂରେ ଫେଲ ମାରିଛନ୍ତି। ତେବେ ସେ ଗତ ମ୍ୟାଚ୍ରେ ଦଳର ନେତୃତ୍ୱ ନେଇଥିତ୍ବାରୁ ତାଙ୍କୁ ଦୁର୍ବଳ ଫର୍ମ କାରଣରୁ ଦଳରୁ ବାଦ୍ ଦେବା ଉଚିତ ମନେ ହେଉନାହିଁ। ପୁଣି ଘରୋଇ ପିଚ୍ରେ ସେ ଭଲ ଖେଳିବେ ବୋଲି ଆଶା କରାଯାଉଛି। ସେହିପରି ଟେଷ୍ଟ ସ୍ପେଶାଲିଷ୍ଟ କୁହାଯାଉଥିବା ଚେତେଶ୍ୱର ପୂଜାରା ମଧ୍ୟ ଖରାପ ଫର୍ମ ଦେଇ ଗତି କରୁଛନ୍ତି। କ୍ରମାଗତ ଭାବେ କେତୋଟି ସିରିଜରେ ସେ ବିଫଳ ହୋଇ ଆସୁଛନ୍ତି। ଗତ ଇଂଲଣ୍ଡ ଗସ୍ତରେ ମଧ୍ୟ ସେ ଆଶାନୁରୂପ ଖେଳିପାରି ନ ଥିଲେ।
