ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତ ମୃତ୍ୟୁ ମାମଲାକୁ ନେଇ ଚର୍ଚ୍ଚାରେ ମୁମ୍ବାଇ ପୋଲିସ କମିଶନର। କିଛି ଲୋକ ତାଙ୍କ କାର୍ଯ୍ୟଶୈଳୀ ଉପରେ ପ୍ରଶ୍ନ ଉଠାଇବା ସହ କମିଶନର ଆଇପିଏସ୍ ପରମବୀର ସିଂହଙ୍କୁ ଟ୍ରୋଲ କରୁଛନ୍ତି। ରିପବ୍ଲିକ ଟିଭି ମୁଖ୍ୟ ଅର୍ଣ୍ଣବ ଗୋସ୍ବାମୀ ଲାଇଭ ଶୋ’ରେ ତାଙ୍କ ଇସ୍ତଫା ଦାବି କରିଛନ୍ତି। ଏପରିକି କଙ୍ଗନା ରାଣାଓ୍ବତ ମଧ୍ୟ ତାଙ୍କ ସମାଲୋଚନା କରିଥିବା ଦେଖାଯାଇଛି। ହେଲେ ମହାରାଷ୍ଟ୍ରର ଶିବସେନା ଓ ସରକାର ଏହି ଅଫିସରଙ୍କ ସହ ଛିଡ଼ା ହୋଇଥିବା ଦେଖିବାକୁ ମିଳିଛି। ଆସନ୍ତୁ ଜାଣିବା ତାଙ୍କ ସହ ଜଡ଼ିତ କିଛି କଥା..
୧୯୮୮ ବ୍ୟାଚ୍ର ମହାରାଷ୍ଟ୍ର କ୍ୟାଡର ଆଇପିଏସ୍ ହେଉଛନ୍ତି ପରମବୀର ସିଂହ। ସେ ୨୦୨୦ ଫେବୃୟାରୀରେ ମୁମ୍ବାଇର ପୋଲିସ କମିଶନର ଭାବେ ନିଯୁକ୍ତି ପାଇଥିଲେ। ଏହା ପୂର୍ବରୁ ସେ ଆଣ୍ଟି କରପ୍ଶନ ବ୍ୟୁରୋ(ଦୁର୍ନୀତି ନିବାରଣ ସଂସ୍ଥା)ର ଡିଜି ଏବଂ ଥାନେର ପୋଲିସ କମିଶନର ମଧ୍ୟ ରହିଥିଲେ।
ଥାନେର ପୋଲିସ କମିଶନର ଥିବା ବେଳେ ପରମବୀର ସିଂହ ଡ୍ରଗ୍ସ ସ୍ମଗଲିଂ ମାମଲାରେ ଅଭିନେତ୍ରୀ ମମତା କୁଲକର୍ଣ୍ଣୀ ଏବଂ ତାଙ୍କ ସ୍ବାମୀ ବିକ୍କି ଗୋସ୍ବାମୀଙ୍କୁ ଅଭିଯୁକ୍ତ ବୋଲି କହିଥିଲେ।
୨୦୧୭ରେ ଥାନେ ପୋଲିସ କମିଶନର ପରମବୀରଙ୍କ ନେତୃତ୍ୱରେ ଏନ୍କାଉଣ୍ଟର ସ୍ପେଶାଲିଷ୍ଟ ପ୍ରଦୀପ ଶର୍ମା ଦାଉଦ ଇବ୍ରାହିମଙ୍କ ଭାଇ ଇକବାଲ କାସକରଙ୍କୁ ଗିରଫ କରାଯାଇଥିଲା।
ଏହି ସମୟରେ ପରମବୀର ଜୁଆଖେଳର ବଡ଼ ର଼୍ୟାକେଟକୁ ଧରିବାରେ ସଫଳ ହୋଇଥିଲେ। ଏଥିରେ ସୋନୁ ଜାଲାନ ଗିରଫ ହୋଇଥିଲେ। ଏହି ଘଟଣାରେ ସଲମାନ ଖାନଙ୍କ ଭାଇ ଅରବାଜଙ୍କ ସମେତ ଅନେକ ବଲିଉଡ୍ କଳାକାରଙ୍କ ନାମ ସାମ୍ନାକୁ ଆସିଥିଲା।
ପରମବୀର ମୁମ୍ବାଇ ଅଣ୍ଡରଓ୍ବାଲ୍ଡର ନିଦ ହଜାଇଦେଇଥିଲେ। ସେ ୯୦ଦଶକରେ ସ୍ପେଶାଲ ଅପରେଶନ ସ୍କ୍ବାର୍ଡର ପ୍ରଥମ ଡିସିପି ଥିଲେ। ଏହି ସ୍କ୍ବାର୍ଡ ସେତେବେଳେ ସବୁଠାରୁ ଅଧିକ ଏନ୍କାଉଣ୍ଟର କରିବାର ରେକର୍ଡ ନିଜ ନାମରେ କରିଥିଲା।
୧୯୯୩ ମସିହାରେ ବମ୍ବେ ବୋମା ବିସ୍ଫୋରଣ ମାମଲାର ଜଣେ ଅଭିଯୁକ୍ତଙ୍କୁ ପରମବୀର ଧରିଥିଲେ। ମାଲେଗାଓଁ ବୋମା ବିସ୍ଫୋରଣ ମାମଲାରେ ପ୍ରଜ୍ଞା ସିଂହ ଠାକୁରଙ୍କୁ ଗିରଫ କରାଯାଇଥିଲା, ସେତେବେଳେ ଯାଞ୍ଚ ଦାୟିତ୍ୱରେ ଏହି ଅଫିସର ରହିଥିଲେ।
