ନୂଆଦିଲ୍ଲୀ,୩୦।୩: ଭାରତୀୟ କ୍ରିକେଟ ଟିମ୍ର ଉପଅଧିନାୟକ ତଥା ଏବେ ଆଇପିଏଲ୍ରେ ଲକ୍ଷ୍ନୌ ସୁପର ଜିଆଣ୍ଟ୍ସର ଅଧିନାୟକ କେ.ଏଲ୍ ରାହୁଲଙ୍କୁ ଦୀର୍ଘ ୨୬ରୁ ୨୭ ବର୍ଷ ଧରି ମିଛ କହୁଥିଲେ ତାଙ୍କ ମା’। ଶାହାରୁଖ ଖାନ୍ ତାଙ୍କର ପ୍ରିୟ କଳାକାର। ଏଣୁ ନବେ ଦଶକରେ କିଙ୍ଗଖାନ୍ଙ୍କ ଲୋକପ୍ରିୟ ଚରିତ୍ର ‘ରାହୁଲ’ ଉପରେ ସେ କ୍ରିକେଟରଙ୍କ ନାଁ ରଖିଥିବା କହି ଆସୁଥିଲେ। ହେଲେ ପରବର୍ତ୍ତୀ ସମୟରେ ତାହା ମିଥ୍ୟା ବୋଲି ଜଣାପଡ଼ିଥିଲା।
‘ବ୍ରେକ୍ଫାଷ୍ଟ ଉଇଥ୍ ଚାମ୍ପିୟନ୍ସ ସିଜନ-୭’ରେ ଯୋଗ ଦେଇ କେ.ଏଲ୍ ମା’ଙ୍କ ମିଛ କାହାଣୀ ଉପରୁ ପରଦା ଉଠାଇଛନ୍ତି। କାରଣ ସେ ମା’ଙ୍କ କଥାକୁ ସତ ଭାବି ନିଜର ବନ୍ଧୁମାନଙ୍କୁ କହି ଆସୁଥିଲେ। ସେମାନେ ଏହା ମିଛ ବୋଲି କହୁଥିଲେ। କାରଣ ୧୯୯୪ ରେ ଶାହାରୁଖଙ୍କ ‘ରାହୁଲ’ ଚରିତ୍ର ବେଶ ଲୋକପ୍ରିୟ ହୋଇଥିଲା। ଅପରପକ୍ଷେ କେ.ଏଲ୍ ୧୯୯୨ରେ ଜନ୍ମ। ଏଣୁ କଥାରେ କୌଣସି ସତ୍ୟତା ନ ଥିବା ସାଙ୍ଗମାନେ ଚିଡ଼ାଉଥିଲେ।
ଶେଷରେ କ୍ରିକେଟର ନିଜେ ମା’ଙ୍କୁ ଏ ବିଷୟରେ ପଚାରିଥିଲେ। ଏହାଶୁଣି ମା’ ସେ କଥାକୁ ଏଡାଇଯାଇ ସେହିଭଳି କିଛି ଯୋଗୁ ରଖିଥିବା କହିଥିଲେ। ଏପରିକି ଏବେ ସେ କଥାର ଗୁରୁତ୍ୱ କ’ଣ ବୋଲି ପାଲଟା ପ୍ରଶ୍ନ କରିଥିବା ସେ କହିଛନ୍ତି।
