ବ୍ରହ୍ମପୁର ଅଫିସ,୨୭ା୨: ସଦର ଥାନା ଅଳକାପୁରୀରେ ରହୁଥିବା ବୃଦ୍ଧ ଦମ୍ପତ୍ତିଙ୍କ ଘରେ ସୁନା, ଗହଣା ଓ ଟଙ୍କା ରହିଥିବା ଅପରାଧୀ ଜଣକ ଜାଣିବାକୁ ପାଇଥିଲେ। ସେହି ଘରେ ବିଜୟ ଚନ୍ଦ୍ର ବେହେରା ଓ ତାଙ୍କ ସ୍ତ୍ରୀ ସୁରଜା ରହୁଥିବା ବେଳେ ଗତ ୨୪ ତାରିଖରେ ତାଙ୍କ ଘରକୁ ଆଲମିରା ତିଆରି କରିବାକୁ ଯାଇଥିବା ବଳରାମ ହିଁ ହତ୍ୟାକାରୀ ବୋଲି ପୋଲିସ ଜାଣିବାକୁ ପାଇଛି। ଆଲମିରା ତିଆରି ବେଳେ ସେଥିରେ ଥିବା ସୁନା, ଗହଣା ଓ ଟଙ୍କା ଉପରେ ତାଙ୍କର ଲୋଭ ବଢ଼ିଥିଲା। ସନ୍ଧ୍ୟାରେ ବିଜୟ ଘରୁ କୌଣସି କାମରେ ବାହାରକୁ ଚାଲିଯିବା ପରେ ବଳରାମ ତାଙ୍କ ପାଚେରି ଡ଼େଇଁ ଏକ ଗଛ ମୁଳେ ଲୁଚି ରହିଥିଲେ। ସୁରଜା ଘରର ମୁଖ୍ୟ ହଲ୍ରେ ବସିଥିବା ବେଳେ ଘର ଭିତରେ ବଳରାମ ପଶିଥିଲେ। ସୁରଜା କ’ଣ ପାଇଁ ଆସିଛୁ ବୋଲି ପଚାରିବାରୁ ବଳରାମ ଘର ଭିତରକୁ ଧସେଇ ପଶି ଆଲମିରାରେ ଚାବିି ଲଗାଇଥିଲେ। ସୁରଜା ଏହାର ପ୍ରତିବାଦ କରିଥିଲେ। ଉଭୟଙ୍କ ମଧ୍ୟରେ ଏହାକୁ ନେଇ ଝଗଡ଼ା ହୋଇଥିଲା। ବଳରାମ ଉତ୍ତ୍ୟେକ୍ତ ହୋଇ ସେହି ଘରର ରୋଷେଇ ଘରେ ଥିବା ଏକ ଛୁରିରେ ସୁରଜାଙ୍କୁ ଆକ୍ରମଣ କରିଥିଲେ। ସୁରଜା ଖଟ ଉପରେ ପଡ଼ିଯିବା ପରେ ବଳରାମ ତାଙ୍କ ବେକ, ପେଟ ଓ ହାତରେ ବାରମ୍ବାର ଛୁରି ଭୁସି ଦେଇଥିଲେ। ସେହି ସମୟରେ ସୁରଜାଙ୍କ ମୋବାଇଲକୁ ବାରମ୍ବାର ଫୋନ୍ ଆସିବାରୁ ସେ ତାଙ୍କ ଶରୀରରେ ଥିବା ସୁନାଗହଣା ଏବଂ ଆଲମିରାରେ ଥିବା ସୁନା ଗହଣା ଓ ଟଙ୍କା ଲୁଟି ନେଇପାରି ନ ଥିଲେ। ଶେଷରେ ସୁରଜାଙ୍କ ମୋବାଇଲ, ରକ୍ତଭିଜା ଛୁରି ଧରି ବଳରାମ ଘର ବାହାରକୁ ଆସି ବାହାରପଟ ଗ୍ରୀଲରେ ତାଲା ପକାଇ ଚମ୍ପଟ ମାରିଥିଲେ ବୋଲି ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି।
ପୋଲିସ ଶନିବାର ସୁରଜାଙ୍କ ମୋବାଇଲ ଏକ ନାଳ କଡ଼ରୁ ଜବତ କରିଥିବା ବେଳେ ସେହି ରାତିରେ ରକ୍ତଭିଜା ଛୁରି ଜବତ କରିଥିବା ମଧ୍ୟ କହିଛି। ଅନ୍ୟପଟେ ବଳରାମ ଲକ୍ଷାଧିକ ଟଙ୍କା ଲୋକଙ୍କ ଠାରୁ ଧାରଉଧାର ଆଣିଥିବା ବେଳେ ତାହା ଶୁଝିବା ପାଇଁ ଏଭଳି ଘଟଣା ଘଟାଇଥିବା ସନ୍ଦେହ କରାଯାଉଛି।
ପ୍ରକାଶ ଯେ, ୨୪ ତାରିଖ ସନ୍ଧ୍ୟାରେ ସୁରଜାଙ୍କୁ ହତ୍ୟା କରାଯାଇଥିଲା। ଏନେଇ ତାଙ୍କ ସ୍ବାମୀ ବିଜୟ ଥାନାରେ ଅଭିଯୋଗ କରିଥିଲେ। ପୋଲିସ ୯୫/୨୨ରେ ଏକ ମାମଲା ରୁଜୁ କରି ତଦନ୍ତ କରିଥିଲା। ତଦନ୍ତ ବେଳେ ଘଟଣାର ବିଭିନ୍ନ ଦିଗକୁ ନେଇ ପୋଲିସକୁ ଏହି ସଫଳତା ମିଳିଥିବା ଜଣାପଡ଼ିଛି। ଅନ୍ୟପଟେ ସୁରଜାଙ୍କ ସହ ବଳରାମଙ୍କ ଧସ୍ତାଧସ୍ତି ବେଳେ ସୁରଜା ବଳରାମଙ୍କ ଶରୀରର ବିଭିନ୍ନ ଜାଗାରେ ରାମ୍ପି ଦେଇଥିବା ପୋଲିସ ଦେଖିବାକୁ ପାଇଛି। ସହରରେ ଏକାକି ରହୁଥିବା ବରିଷ୍ଠ ନାଗରିକମାନେ ଏବେ ଅସୁରକ୍ଷିତ ହୋଇଥିବା ନେଇ ସହରରେ ଚର୍ଚ୍ଚା ଜୋର ଧରିଛି।
