ଭୁବନେଶ୍ୱର,୧୮।୭(ବ୍ୟୁରୋ): ରାଜଧାନୀରେ ଠକେଇକୁ ନେଇ ଅପହରଣ ଘଟଣା ବଢ଼ିବାରେ ଲାଗିଛି। ନିକଟରେ ଠକେଇ କରିଥିବା ଜଣେ ଯୁବକଙ୍କୁ ଚନ୍ଦକା ଥାନାଞ୍ଚଳରୁ ଅପହରଣ କରି ଖୋର୍ଦ୍ଧାରେ ମୁଣ୍ଡଜାମିନ ରଖାଯାଇଥିଲା। ପୋଲିସ ତାଙ୍କୁ ଉଦ୍ଧାର କରିବା ପରେ ଅପହରଣ ପଛରେ ଠକେଇ ରହିଥିବା ଜଣାପଡିଥିଲା। ଏବେ ଆଉ ଏକ ସମାନ ଘଟଣା ଘଟିଛି। ଭୁବନେଶ୍ୱର କମିଶନରେଟ୍ ପୋଲିସ ଏକ ଅପହରଣ ମାମଲାର ତଦନ୍ତ କରୁଥିବାବେଳେ ଏକ ଠକେଇ ର଼୍ୟାକେଟକୁ ଧରିଛି। ଅପହରଣ ଅଭିଯୋଗରେ ତମାଣ୍ଡୋ ପୋଲିସ ୫ଜଣଙ୍କୁ ଓ ୨୧ଲକ୍ଷ ଠକେଇ କରି ଅପହୃତ ହୋଇଥିବା ଶଳା ଓ ଭିଣୋଇଙ୍କୁ ଚନ୍ଦ୍ରଶେଖରପୁର ପୋଲିସ ଗିରଫ କରିଛି। ୫ ଅପହରଣକାରୀ ହେଉଛନ୍ତି ପ୍ରଦ୍ୟୁମ୍ନ ନାୟକ(୩୪), ପ୍ରଦୀପ୍ତ ମନୋହର(୩୬), ସନ୍ଦୀପ ପ୍ରଧାନ(୨୭), ଦୁର୍ଗାପ୍ରସାଦ ରଥ(୨୫) ଓ ସାଗର କୁମାର ଜେନା(୩୪)। ସେହିପରି ଠକେଇ ମାମଲାରେ ଗିରଫ ଅଭିଯୁକ୍ତ ହେଲେ କଳିଙ୍ଗବିହାରରେ ରହୁଥିବା ସମରଜିତ ରାଉତ ଓ ତାଙ୍କ ଭିଣୋଇ ସୌମ୍ୟରଞ୍ଜନ ରାଉତ। ସମରଜିତ୍ ଓ ସୌମ୍ୟ ରେଲ୍ଓ୍ବେରେ ଚାକିରି କରାଇ ଦେବାକୁ କହି ଠକେଇ ର଼୍ୟାକେଟ ଚଳାଇଥିଲେ। ପୋଲିସ ଉଭୟଙ୍କଠାରୁ ଜାଲ୍ ଅଫର ଲେଟର, ରେଲ୍ୱେ ଆଇଡି କାର୍ଡ ଓ ବିଭିନ୍ନ ନକଲି କାଗଜପତ୍ର ଜବତ କରିଛି। ଏହି ଠକେଇ ର଼୍ୟାକେଟ୍ରେ ଆଉ କାହାର ସମ୍ପୃକ୍ତି ରହିଛି ସେ ନେଇ ପୋଲିସ ଅଧିକ ତଦନ୍ତ ଚଳାଇଥିବାବେଳେ କେତେଜଣ ରେଲଓ୍ବେ କର୍ମଚାରୀଙ୍କ ସମ୍ପୃକ୍ତି ଥିବା ନେଇ ସନ୍ଦେହ କରାଯାଉଛି।
ସୂଚନା ଅନୁଯାୟୀ, ଶୁକ୍ରବାର ସନ୍ଧ୍ୟାରେ ତମାଣ୍ଡୋ ଥାନାଞ୍ଚଳରୁ ସମରଜିତଙ୍କୁ ଗାଡ଼ିରେ ଅପହରଣ କରି ନିଆଯାଇଥିବା ସଂକ୍ରାନ୍ତରେ ତାଙ୍କ ଭଉଣୀ ଥାନାରେ ଲିଖିତ ଅଭିଯୋଗ କରିଥିଲେ। ୫ଜଣ ଯୁବକ ତାଙ୍କ ଭାଇଙ୍କୁ ଏକ ଗାଡ଼ିରେ ଅପହରଣ କରି ନେବା ସହ ଟଙ୍କା ମାଗୁଥିବା ଉଲ୍ଲେଖ କରିଥିଲେ। ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଶନିବାର ସମ୍ପୃକ୍ତ ୫ଜଣଙ୍କୁ ପୋଲିସ ଚନ୍ଦ୍ରଶେଖରପୁର ପେଟ୍ରୋଲ୍ ପମ୍ପ ନିକଟରୁ ଗିରଫ କରିଥିଲା। ଏହି ସମୟରେ ଅପହୃତ ସମରଜିତଙ୍କ ବିଷୟରେ ପୋଲିସ ପଚାରିବାରୁ ସେମାନେ ତାଙ୍କୁ ଚନ୍ଦ୍ରଶେଖରପୁର ଥାନା ପୋଲିସ ଜିମା ଦେଇଥିବା ଅଭିଯୁକ୍ତମାନେ କହିଥିଲେ। ପୋଲିସ ସେମାନଙ୍କୁ ନେଇ ଚନ୍ଦ୍ରଶେଖରପୁର ଥାନାରେ ପହଞ୍ଚତ୍ଲା। ଅଭିଯୁକ୍ତମାନେ ସମରଜିତ୍ଙ୍କୁ ପୋଲିସ ଜିମା ଦେଇ ତାଙ୍କ ସହ ଭିଣୋଇ ସୌମ୍ୟଙ୍କ ନାମରେ ଠକେଇ ଅଭିଯୋଗ କରିଥିଲେ। ପୋଲିସ ଉଭୟଙ୍କୁ ପଚରାଉଚରା କରିବା ପରେ ସେମାନଙ୍କ ଠକେଇ ର଼୍ୟାକେଟ ସମ୍ପର୍କରେ ଜଣାପଡିଥିଲା। ସମରଜିତ ଓ ସୌମ୍ୟରଞ୍ଜନ ନିଜକୁ ରେଲ୍ଓ୍ବେ ଅଫିସର ପରିଚୟ ଦେବା ସହ ନକଲି ଆଇକାର୍ଡ଼ ଦେଖାଇ ଚାକିରି ଆଶାୟୀଙ୍କୁ ଫସାଉଥିଲେ। ଟ୍ରେନ୍ ଚାଳକ, ଟିଟିଇ ଓ ରେଲଓ୍ବେ ବିଭାଗରେ କିରାଣି ଚାକିରି କରାଇ ଦେବାକୁ କହି ଲକ୍ଷ ଲକ୍ଷ ଟଙ୍କା ଠକି ନେଉଥିଲେ। ପ୍ରଥମେ ସମରଜିତ କାଉନସେଲିଂ କରିବା ପରେ ଭିଣୋଇ ସୌମ୍ୟରଞ୍ଜନ ଏଚ୍ଆର୍ ସାଜି ରେଲଓ୍ବେ ଲୋଗୋ ଲଗାଇ ନକଲି ଅଫର ଲେଟର ଦେଉଥିଲେ। ଏଭଳି ଭାବେ ପ୍ରଦ୍ୟୁମ୍ନ, ପ୍ରଦୀପ୍ତ, ସନ୍ଦୀପ, ଦୁର୍ଗାପ୍ରସାଦ ଓ ସାଗରଙ୍କଠାରୁ ୨୧ଲକ୍ଷ ଠକିନେଇ ଆଉ ଧରାଛୁଆଁ ଦେଉ ନ ଥିଲେ। ଶେଷରେ ଟଙ୍କା ଫେରିପାଇବାକୁ ସେମାନେ ସମରଜିତଙ୍କୁ ଅପହରଣ କରିନେଇଥିଲେ ବୋଲି ପୋଲିସ କହିଛି।
