ଭୁବନେଶ୍ୱର ପୋଲିସର ସହାୟତାରେ ବଲାଙ୍ଗୀର ପୋଲିସ ଅପହୃତ ବ୍ୟବସାୟୀ ନରେନ୍ଦ୍ର ସାହୁଙ୍କୁ ସୁରକ୍ଷିତ ଉଦ୍ଧାର କରିବା ସହ ଜଣେ ଅଭିଯୁକ୍ତଙ୍କୁ ଅଟକ ରଖିବାରେ ସଫଳ ହୋଇଛି। ଏହାକୁ ନେଇ ଅପହୃତ ବ୍ୟବସାୟୀଙ୍କ ପରିବାର ଓ ବଲାଙ୍ଗୀରର ବ୍ୟବସାୟୀ ମହଲରେ ଆଶ୍ୱସ୍ତି ପ୍ରକାଶ ପାଇଛି।
ରବିବାର ବ୍ୟବସାୟୀ ନରେନ୍ଦ୍ର ସାହୁ ଓ ଅଟକ ଅଭିଯୁକ୍ତଙ୍କୁ ବଲାଙ୍ଗୀର ଅଣାଯାଇଛି। ଉଦ୍ଧାର ପରେ ବ୍ୟବସାୟୀ ନରେନ୍ଦ୍ରଙ୍କୁ ହସ୍ପିଟାଲକୁ ନେଇ ଡାକ୍ତରୀମାଇନା କରାଯାଇଛି। ଆଜି ବ୍ୟବସାୟୀ ନରେନ୍ଦ୍ର ଓ ଅଟକ ବ୍ୟକ୍ତିଙ୍କୁ ମୁହାଁମୁହିଁ ଜେରା କରାଯିବ।
ପରେ କେଉଁ କାରଣରୁ ନରେନ୍ଦ୍ରଙ୍କୁ ଅପହରଣ କରାଯାଇଥିଲା, ତାହା ସ୍ପଷ୍ଟ ହେବ ବୋଲି ଏସ୍ପି ଅଭିଳାଷ ଜି. ସୂଚନା ଦେଇଛନ୍ତି। ଘଟଣା ପଛରେ ବ୍ୟବସାୟିକ ଶତ୍ରୁତା ନା ଅନ୍ୟ କୌଣସି କାରଣ ରହିଛି, ତାହା ଏଯାଏଁ ସ୍ପଷ୍ଟ ହୋଇନାହିଁ।
ପୋଲିସ ଟିମ୍ ବ୍ୟବସାୟୀ ଓ ଅଟକ ବ୍ୟକ୍ତିଙ୍କ ସହ ସମ୍ପୃକ୍ତ ଦୁଇଟି ଗାଡ଼ି ଏବଂ ଏକ ପିସ୍ତଲ ଜବତ କରିଥିବା ଜଣାପଡ଼ିଛି। ଘଟଣାର ପ୍ରକୃତ କାରଣ ଓ ଅପହରଣ ପଛରେ ଆଉ କେହି ସମ୍ପୃକ୍ତ ଅଛନ୍ତି କି ନାହିଁ, ସେନେଇ ପୋଲିସ ତଦନ୍ତ ଜାରି ରଖିଛି।
