ମୁମ୍ବାଇ: ସ୍ବର୍ଗତା ଅଭିନେତ୍ରୀ ଶ୍ରୀଦେବୀ ଏବଂ ଫିଲ୍ମ ନିର୍ମାତା ବୋନି କପୁରଙ୍କ ସାନ ଝିଅ ଖୁସି କପୁର ବଡ଼ ପରଦାରେ ପାଦ ଥାପି ସାରିଛନ୍ତି। ଗତବର୍ଷ ରିଲିଜ୍ ହୋଇଥିବା ଜୋୟା ଅଖତରଙ୍କ ନିର୍ଦ୍ଦେଶିତ ‘ଦି ଆର୍କିଜ୍’ ଫିଲ୍ମ ଜରିଆରେ ସେ ବଡ଼ ପରଦାରେ ଡେବ୍ୟୁ କରିଥିଲେ। ତେବେ ଏହି ଚଳଚ୍ଚିତ୍ରର ଅଭିନେତା ବେଦାଙ୍ଗ ରାଇନାଙ୍କ ସହ ଖୁସି ଡେଟ୍ କରୁଥିବା ନେଇ ବିଭିନ୍ନ ରିପୋର୍ଟ ପ୍ରକାଶ ପାଇଥିଲା। ବୁଧବାର ଏକ ସାକ୍ଷାତ୍କାରରେ ଖୁସି ଏନେଇ ପ୍ରତିକ୍ରିୟା ରଖିଛନ୍ତି। ଜଣେ ଅଭିନେତ୍ରୀ ଭାବେ ତାଙ୍କ ଡେଟିଂ ଲାଇଫ୍କୁ ନେଇ ଯେଉଁ ସବୁ ଆଲୋଚନା ଚାଲିଛି ତାକୁ କିପରି ଭାବେ ଗ୍ରହଣ କରୁଛନ୍ତି ବୋଲି ଏହି ସାକ୍ଷାତ୍କାରରେ ଖୁସିଙ୍କୁ ପଚରାଯାଇଥିଲା। ଉତ୍ତରରେ ଖୁସି କହିଛନ୍ତି, ସେ ଏସବୁ ଚର୍ଚ୍ଚା ଓ ଆଲୋଚନାକୁ ବିଶେଷ ଧ୍ୟାନ ନ ଦେଇ ସର୍ବଦା ନିଜ କାମ ଉପରେ ଫୋକସ୍ କରିଥାନ୍ତି। ଜଣେ ଅଭିନେତ୍ରୀ ହୋଇ ଥିବାରୁ ତାଙ୍କୁ ନେଇ ସର୍ବସାଧାରଣରେ ଅନେକ ଆଲୋଚନା ହୋଇଥାଏ। କିନ୍ତୁ ଏସବୁ କେବଳ ଗୁଜବ ବୋଲି ଖୁସି କହିଛନ୍ତି। ସେ ଆହୁରି କହିଛନ୍ତି, ତାରକାମାନଙ୍କର ମଧ୍ୟ ଅନ୍ୟମାନଙ୍କ ପରି ବ୍ୟକ୍ତିଗତ ଜୀବନ ରହିଥାଏ। ଅନ୍ୟମାନେ ଏହାକୁ ସମ୍ମାନ ଦେବା ଉଚିତ। ତେବେ ନିଜ ପରିବାରକୁ ନେଇ ଖୁସି ଏହି ସାକ୍ଷାତ୍କାରରେ କହିଛନ୍ତି, ବର୍ତ୍ତମାନ ସେ ଫିଲ୍ମ ଇଣ୍ଡଷ୍ଟ୍ରିରେ ଜଣେ ନବାଗତା ଅଭିନେତ୍ରୀ। ତାଙ୍କ ପାଇଁ ବହୁତ୍ତ କିଛି ଶିଖିବାକୁ ବାକି ଅଛି। ସେ ତାଙ୍କ କାର୍ଯ୍ୟକୁ ନେଇ ବାପାଙ୍କ ଠାରୁ ପ୍ରାୟତଃ ପରାମର୍ଶ ନେଇଥାନ୍ତି ବୋଲି ଖୁସି କହିଛନ୍ତି। ସେହିପରି ଭାଇ ଅର୍ଜୁନ କପୁର ଓ ବଡ଼ ଭଉଣୀ ଜାହ୍ନବୀ କପୁରଙ୍କର ମଧ୍ୟ ଫିଲ୍ମ ଇଣ୍ଡଷ୍ଟ୍ରିରେ ଢେର ଅଭିଜ୍ଞତା ରହିଛି। ଅଭିନୟରେ ଉନ୍ନତି ଆଣିବା ପାଇଁ ସେମାନେ ତାଙ୍କୁ ସବୁବେଳେ ପରାମର୍ଶ ଦେଇଥାନ୍ତି ବୋଲି ଖୁସି କହିଛନ୍ତି। ଖୁବ୍ଶୀଘ୍ର ଖୁସିଙ୍କୁ ଅଭିନେତା ଆମୀର ଖାନ୍ଙ୍କ ପୁଅ ଜୁନୈଦ ଖାନ୍ଙ୍କ ସହ ଏକ ରୋମାଣ୍ଟିକ ଡ୍ରାମା ଫିଲ୍ମରେ ଦେଖିବାକୁ ମିଳିବ। ତେବେ ବର୍ତ୍ତମାନ ସୁଦ୍ଧା ଉକ୍ତ ଫିଲ୍ମର ନାମ ଘୋଷଣା କରାଯାଇ ନାହିଁ।
