ଖୋର୍ଦ୍ଧା ଅଫିସ,୧୪ା୭: ‘ବାହାଘର ସମୟରେ ବାଇଗଣ ରୁଆ’ ଭଳି ପଦାରେ ପଡ଼ିଛି ଖୋର୍ଦ୍ଧା ପୌର ପ୍ରଶାସନର ଡ୍ରେନ୍ ସଫେଇ କାର୍ଯ୍ୟ। ମୌସୁମୀ ପୂର୍ବରୁ ଡ୍ରେନ ସଫେଇ ପ୍ରତି ଗୁରୁତ୍ୱ ଦିଆଗଲା ନାହିଁ। କିଛିଦିନ ତଳେ ତରବରିଆ ଭାବେ ଟେଣ୍ଡର ପରେ ଠିକା ସଂସ୍ଥା ପକ୍ଷରୁ ଡ୍ରେନ ସଫେଇ ଚାଲିଛି। ଡ୍ରେନ କଡ଼ରେ କୁଢ କୁଢ ମାଟି ଗଦା ହୋଇ ରହିଛି। ତେବେ ଏହାକୁ ଉଠା ନ ଯିବାରୁ ଲଘୁଚାପ ବର୍ଷାରେ ପୁଣି ଡ୍ରେନରେ ପଶୁଥିବା ଦେଖିବାକୁ ମଳୁଛି। ସେହିପରି ଗତ ତିନିଦିନ ଧରି ଲଘୁଚାପଜନିତ ଲଗାଣ ବର୍ଷା ଯୋଗୁ ସହରର ଏକାଧିକ ଖାଲୁଆ ସ୍ଥାନରେ ପାଣି ଜମିଛି। ଫଳରେ ଯାନବାହନ ଚଳାଚଳ ବାଧାପ୍ରାପ୍ତ ହେଉଛି। ଜିଲାପାଳଙ୍କ କାର୍ଯ୍ୟାଳୟ, ବ୍ଲକ କାର୍ଯ୍ୟାଳୟ, ପୌର କାର୍ଯ୍ୟାଳୟ, ଭିଜିଲାନ୍ସ ଅଫିସ ସମେତ କେତେକ ଶିକ୍ଷାନୁଷ୍ଠାନରେ ବର୍ଷାଜଳ ଜମିଛି। ନୂଆବସ୍ଷ୍ଟାଣ୍ଡ ରୋଡ୍, ନୟାଗଡ଼ ରୋଡ୍ (ଗୋଡ଼ିପୋଖରୀ ଛକ, ଟ୍ରାଫିକ ଛକ, ପୁରୁଣା ବସଷ୍ଟାଣ୍ଡ-ପେଟ୍ରୋଲ ପମ୍ପ ଛକ- ଚଣ୍ଡିଚୁଆ ଛକ ପୂର୍ବରୁ ସନ୍ତୋଷୀ କଲୋନୀ ସମ୍ମୁଖ)ରେ ଡ୍ରେନ ପାଣି ରାସ୍ତାରେ ଭାସୁଛି।
ଡ୍ରେନ୍ ପାଣି ସାଙ୍ଗକୁ ରାସ୍ତା କଡ଼ରେ ଗଦା ଥିବା ଆବର୍ଜନା ମଧ୍ୟ ଏଣେ ତେଣେ ପଡ଼ିଛି। ପଲ୍ଲା ଛକ, ନୂଆବସ୍ଷ୍ଟାଣ୍ଡ ରୋଡ୍ର ଏକାଧିକ ସ୍ଥାନ, ନୟାଗଡ଼ ରୋଡ୍, ପୁରୁଣା ଦମକଳ ଛକ, ତଳସାହି, ଉପର ସାହି, ଖ୍ରୀଷ୍ଟିଆନ ସାହି, ବରୁଣେଇ ସାହି, ଗୋପିନାଥ ସାହି, ରାଧାବଲ୍ଲଭ ସାହିରେ ବର୍ଷା ପାଣିର ସୁଅ ଛୁଟୁଛି। ପୌର ପ୍ରଶାସନ ନିକଟ ମସଜିଦ୍ ସମ୍ମୁଖ ଓ ଖ୍ରୀଷ୍ଟିଆନ ସାହି ଡ୍ରେନ କାମ ଚାଲିଛି। ରାସ୍ତାରେ ଗୋଡି, ମାଟି, ପଥର ଗଦା ହୋଇରହିଛି।
ବାଳିକା ହାଇସ୍କୁଲ ସମ୍ମୁଖ ଦେଇ ପୁରୁଣା ମେଡିକାଲ ନିକଟକୁ ଯେଉଁ ଡ୍ରେନ୍ ସଂଯୋଗ କରୁଛି, ତା’ ଉପରେ ଅସ୍ଥାୟୀ ଦୋକାନ ଗଢି ଉଠିଛି। ସେହିଭଳି ଟ୍ରାଫିକ ଛକ ଠାରୁ ପେଟ୍ରୋଲ ପମ୍ପ ପର୍ଯ୍ୟନ୍ତ ଡ୍ରେନ ପୋତାଯାଇ ଦୋକାନ ଘର କରାଯାଇଛି। ଗୋଡ଼ିପୋଖରୀ ଛକ ଠାରୁ ଆଗକୁ ଡ୍ରେନ ନାହିଁ। ବର୍ଷା ପାଣି ନିଷ୍କାସନ ହେବାର କୌଣସି ବ୍ୟବସ୍ଥା ନାହିଁ। ଏହାକୁ ନେଇ ଜନଅସନ୍ତୋଷ ପ୍ରକାଶ ପାଇଛି। ପୂର୍ବରୁ ପ୍ରଶାସନ ପକ୍ଷରୁ କୌଣସି ବ୍ୟବସ୍ଥା କରା ନ ଯିବାରୁ ଏଭଳି ସମସ୍ୟା ସୃଷ୍ଟି ହୋଇଛି ବୋଲି ସାମାଜିକ କର୍ମୀ ଶୁଭ୍ରରଞ୍ଜନ ଦାସ କହିଛନ୍ତି।
