ଭୋପାଳ,୧୧।୪: ପବିତ୍ର ରାମ ନବମୀ ଅବସରରେ ମଧ୍ୟପ୍ରଦେଶର ଖରଗୋନରେ ହୋଇଥିବା ହିଂସାକାଣ୍ଡ ଘଟଣାରେ ସୋମବାର କଡ଼ା କାର୍ଯ୍ୟାନୁଷ୍ଠାନ ନେଇଛନ୍ତି ମଧ୍ୟପ୍ରଦେଶ ସରକାର। ହିଂସା ଘଟାଇଥିବା ଅଭିଯୁକ୍ତଙ୍କ ଘର ବୁଲଡୋଜର ସହାୟତାରେ ଭାଙ୍ଗି ଦିଆଯାଇଛି। ବ୍ୟାପକ ପୋଲିସ ଫୋର୍ସର ଉପସ୍ଥିତିରେ ଏହି କାର୍ଯ୍ୟ ଶେଷ ହୋଇଛି।
ସୂଚନାଯୋଗ୍ୟ, ଏପ୍ରିଲ ୧୦ ତାରିଖ ରାମ ନବମୀ ଅବସରରେ ଖରଗୋନରେ ଶୋଭାଯାତ୍ରା ବାହାରିଥିଲା। ଏହି ଯାତ୍ରା ବେଳେ କିଛି ଲୋକେ ପଥରମାଡ କରିଥିଲେ। ଏହାପରେ ପୂରା ଅଞ୍ଚଳରେ ହିଂସା କାଣ୍ଡ ଆରମ୍ଭ ହୋଇଥିଲା। ଏହି ହିଂସା ବେଳେ କିଛି ଲୋକେ ପେଟ୍ରୋଲ ବୋମା ମଧ୍ୟ ଫିଙ୍ଗିଥିଲେ। ଏହି ପୂରା ମାମଲାରେ ସାଧାରଣ ନାଗରିକଙ୍କ ସମେତ ୧୦ ପୋଲିସ କର୍ମଚାରୀ ଆହତ ହୋଇଥିଲେ। ସୋମବାର ଏହି ସଂଘର୍ଷ ଘଟାଇଥିବା ଅଭିଯୁକ୍ତଙ୍କୁ ଚିହ୍ନଟ କରିବା ସହ ସେମାନଙ୍କ ଘର ଭାଙ୍ଗିବା ଆରମ୍ଭ କରିଛନ୍ତି ସରକାର। ପୂର୍ବରୁ ଏହି ଘଟଣାକୁ ନେଇ ମୁଖ୍ୟମନ୍ତ୍ରୀ ଶିବରାଜ ଚୌହାନ କଡ଼ା କାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦେଇଥିଲେ।
