କେନ୍ଦ୍ରାପଡା ଅଫିସ,୯ା୧୧: ଖରସ୍ରୋତା ନଦୀରୁ ଭଦ୍ରକ ଜିଲା ୪ ବ୍ଲକର ୯୧ ପଞ୍ଚାୟତକୁ ପନୀୟଜଳ ଯୋଗାଣ ହେବ। ଏଥିପାଇଁ କେନ୍ଦ୍ରାପଡା ଜିଲା ରାଜକନିକା ବ୍ଲକ ବରୁଣାଡିହାରେ ନିର୍ମାଣାଧୀନ ପାନୀୟ ଜଳ ପ୍ରକଳ୍ପକୁ ନେଇ ବିବାଦ ବଢୁଛି। ମୁହାଣ ଦେଇ ଖରସ୍ରୋତାର ଜଳ ପ୍ରବାହ ହ୍ରାସ ପାଇଲେ ଲୁଣା ଓ ମଧୁର ପାଣିର ସମିଶ୍ରଣରେ ସୃଷ୍ଟି ହୋଇଥିବା ବିଶ୍ୱର ବିରଳ ଭିତରକନିକା ଅଭୟାରଣ୍ୟର ଜୈବ ବିବିଧତା ଗଭୀର ଭାବେ ପ୍ରଭାବିତ ହେବ। ଏଥିସହ ଭୂତଳ ଜଳ ସ୍ତର ଦ୍ରୁତଗତିରେ ହ୍ରାସ ପାଇବାର ସମ୍ଭାବନାକୁ ଏଡାଇ ଦିଆଯାଇ ନ ପାରେ। ଖରସ୍ରୋତା ନଦୀର ଅବବାହିକାରେ ବସବାସ କରୁଥିବା ଲୋକେ ଆଗାମୀଦିନରେ ଗୁରୁତର ପାନୀୟ ଜଳ ସଙ୍କଟରେ ସମ୍ମୁଖୀନ ହେବେ ବୋଲି ଆଶଙ୍କା ପ୍ରକାଶ ପାଇବ। କେନ୍ଦ୍ରାପଡା ଜିଲାର ବୁଦ୍ଧିଜୀବୀ ଗଣେଶ ଚନ୍ଦ୍ର ସାମଲ, ଅମରବର ବିଶ୍ୱାଳ, ମୀର ଅବୁ ଓବେଦା, ସାମାଜିକ କର୍ମୀ ପ୍ରତାପ ଚନ୍ଦ୍ର ପାଢୀ, ସୁନୀଲ କୁମାର ଗନ୍ତାୟତ ପ୍ରମୁଖ ଖରସ୍ରୋତାରୁ ଭଦ୍ରକକୁ ପାନୀୟ ଜଳ ଯୋଗାଣକୁ ନେଇ ବିରୋଧ କରିଛନ୍ତି। ହେଲେ ଏକ ନିର୍ଦ୍ଦିଷ୍ଟ ମହିଳା ସଙ୍ଗଠନ ଏଥିରେ ସମସ୍ୟା ନ ଥିବା ଦର୍ଶାଉଛନ୍ତି।
ବୁଦ୍ଧିଜୀବୀମାନଙ୍କ କହିବା କଥା, ଆଳି, ରାଜକନିକା ଓ ରାଜନଗରର ୬୧ ପଞ୍ଚାୟତବାସୀ ଭବିଷ୍ୟତର କୃଷି ଏବଂ ବିଶ୍ୱପ୍ରସିଦ୍ଧ ଭିତରକନିକା ଜାତୀୟ ଉଦ୍ୟାନସ୍ଥ ଜୈବବିବିଧତାର ସୁରକ୍ଷା ପାଇଁ ଖରସ୍ରୋତାରୁ ଭଦ୍ରକ ଜିଲାକୁ ଜଳ ଯୋଗାଣକୁ ବିରୋଧ କରାଯାଉଛି। ଏଥିପାଇଁ ସେମାନେ କିଛିଦିନ ହେଲା ଆନ୍ଦୋଳନ ଜାରି ରଖିଛନ୍ତି। ଏହି ପାନୀୟ ଜଳ ପ୍ରକଳ୍ପ ଯୋଗୁ ଅଣମୌସୁମୀ ସମୟରେ ଖରସ୍ରୋତାରେ ଜଳାଭାବ ଦେଖାଦେବ। ଅପରପକ୍ଷରେ କେନ୍ଦ୍ରାପଡା ଜିଲାର ୬୧ ପଞ୍ଚାୟତରେ ଲୁଣା ଜଳ ସମସ୍ୟା ରହିଥିବା ବିଭିନ୍ନ ସରକାରୀ ରିପୋର୍ଟରେ ଉପସ୍ଥାପନା କରାଯାଇଛି। ଅଦ୍ୟାବଧି ଖରସ୍ରୋତା ନଦୀର ମଧୁର ପାଣି ଉଠାଇ ଜିଲାର ଜଳସେଚନ ଓ ପାନୀୟଜଳ ଯୋଗାଣକୁ ସୁନିଶ୍ଚିତ କରାଯାଇନାହିଁ। ତେଣୁ ଭଦ୍ରକ ଜିଲାରେ ଥିବା ଚିରସ୍ରୋତା ମଧୁର ଜଳ ପୂର୍ଣ୍ଣ ବୈତରଣୀ, ସାଳନ୍ଦୀ, ମନ୍ତେଇ ପ୍ରଭୃତି ନଦୀରୁ ଜିଲାବାସୀଙ୍କୁ ଜଳ ଯୋଗାଇ ଦେବାକୁ ସରକାର ପଦକ୍ଷେପ ନିୟନ୍ତୁ। ରାଜକନିକା ପାନୀୟ ଜଳ ପ୍ରକଳ୍ପରୁ ସରକାର ଓହରିଯିବାକୁ ବିଭିନ୍ନ ମହଲରୁ ଦାବି ମଧ୍ୟ ହେଉଛି। ଏହି ଦାବି ଜିଲାବାସୀଙ୍କ ପାଇଁ ଆବଶ୍ୟକ। କେନ୍ଦ୍ରାପଡା ଜିଲା ପାଇଁ ପ୍ରସ୍ତାବିତ ୨୬୮.୧୧ କୋଟି ଟଙ୍କାର ପାନୀୟ ଜଳ ପ୍ରକଳ୍ପର କାର୍ଯ୍ୟ ଆରମ୍ଭ ହୋଇନାହିଁ। ଏହାକୁ ଅଞ୍ଚଳବାସୀ ସ୍ବାଗତ କରିବା ସହ ସରକାର ଓ ସ୍ଥାନୀୟ ଜନପ୍ରତିନିଧିଙ୍କୁ ଧନ୍ୟବାଦ ଦେଇଛନ୍ତି। ତେବେ ମହିଳା ସଙ୍ଗଠନ ଖରସ୍ରୋତା ନଦୀରୁ ଭଦ୍ରକ ଜିଲାକୁ ଜଳଯୋଗାଣକୁ ସମର୍ଥନ ଜଣାଇବା ପଛରେ ଥିବା ରହସ୍ୟକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି। ନଦୀଜଳକୁ ନେଇ ବିବାଦ ସୃଷ୍ଟି ନ କରି ଜିଲାର ଭବିଷ୍ୟତ ପାଇଁ ଭଦ୍ରକ ଜିଲାକୁ ପାଣି ଦେବା ବନ୍ଦ ହେବା ଦରକାର ବୋଲି ଜିଲାର ବୁଦ୍ଧଜୀବୀ ମତବ୍ୟକ୍ତ କରିଛନ୍ତି।
