ଭୋପାଳ,୨୯।୬: ପ୍ରେମ ଉପରେ କାହାର ନିୟନ୍ତ୍ରଣ ନଥାଏ। ଏହା ଯେକୌଣସି ସମୟରେ, ଯେକୌଣସି ସ୍ଥାନରେ ଏବଂ ଯେକୌଣସି ବ୍ୟକ୍ତିଙ୍କ ସହିତ ହୋଇପାରେ। ମଧ୍ୟପ୍ରଦେଶର ଖଣ୍ଡୱାରେ, ଜଣେ ଶିକ୍ଷୟିତ୍ରୀ ତାଙ୍କ ନିଜ ଛାତ୍ରଙ୍କ ପ୍ରେମରେ ପଡ଼ିଗଲେ। ପରେ ସେ ଛାତ୍ରଙ୍କୁ ବିବାହ କରିବ କି ବୋଲି ପ୍ରପୋଜ୍ କରିଥିଲେ। ହେଲେ ଛାତ୍ରଜଣଙ୍କ ଏପରି ଉତ୍ତର ଦେଲେ ଯେ ଶିକ୍ଷୟିତ୍ରୀଙ୍କୁ ବଡ଼ ଆଘାତ ଲାଗିଥିଲା। ଏଥିରେ ଶିକ୍ଷୟିତ୍ରୀ ଭାଙ୍ଗି ପଡ଼ି ଆତ୍ମହତ୍ୟା କରିଛନ୍ତି। ପୋଲିସ ମୃତଦେହ ପୋଷ୍ଟମର୍ଟମ ପାଇଁ ପଠାଇ ଛାତ୍ରଙ୍କୁ ହେପାଜତକୁ ନେଇଛିା। ବର୍ତ୍ତମାନ ତାଙ୍କୁ ପଚରାଉଚରା କରାଯାଉଛି।
ଘଟଣାଟି ପୁନାସା ଚୌକି ଅଞ୍ଚଳର, ଯେଉଁଠାରେ ଆଇଟିଆଇ କଲେଜରେ ପାଠ ପଢ଼ାଉଥିବା ୨୪ ବର୍ଷୀୟ ଶିକ୍ଷୟିତ୍ରୀ ପ୍ରିୟା ଯାଦବ ତାଙ୍କ ଛାତ୍ର ସପନ ଯାଦବଙ୍କ ପ୍ରେମରେ ପଡ଼ିଯାଇଥିଲେ। ସପନ ମଧ୍ୟ ୨୪ ବର୍ଷ ହୋଇଥିଲା। ସପନ ବିବାହ କରିବାକୁ ମନା କରିବାରୁ ପ୍ରିୟା ବହୁତ ଦୁଃଖିତ ହୋଇ ଶୁକ୍ରବାର ଦିନ ତାଙ୍କ ଘରେ ରଶି ଲଗାଇ ଝୁଲି ପଡ଼ିଥିଲେ। ସପନ ଆଖପାଖ ଲୋକଙ୍କ ସହାୟତାରେ ପ୍ରିୟାଙ୍କୁ ଓହ୍ଲାଇ ଡାକ୍ତରଖାନା ନେଇଯାଇଥିଲେ, କିନ୍ତୁ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ।
ପୋଲିସ ପଚରାଉଚରା ସମୟରେ ସପନ କହିଥିଲେ ଯେ ସେ ନର୍ମଦା ନଗରରେ ଆଇଟିଆଇ ପଢ଼ନ୍ତି। ପ୍ରିୟା କିଛି ବର୍ଷ ଧରି ସେଠାରେ ଅତିଥି ଶିକ୍ଷକ ଭାବରେ ପାଠ ପଢ଼ାଉଥିଲେ। ପାଠପଢ଼ା ସମୟରେ ସେମାନେ ପ୍ରେମରେ ପଡିଯାଇଥିଲେ। ସେମାନେ ମୋବାଇଲରେ କଥାବାର୍ତ୍ତା କରିବା ଆରମ୍ଭ କଲେ। ଧୀରେ ଧୀରେ ଏହି ସମ୍ପର୍କ ଗଭୀର ହେଲା। ଗତ ଗୋଟିଏ ବର୍ଷ ଧରି ସେମାନଙ୍କର ପ୍ରେମ ସମ୍ପର୍କ ଥିଲା। ଉଭୟ ସମାନ ଜାତିର ଥିଲେ ଏବଂ ସେମାନଙ୍କ ପରିବାର ମଧ୍ୟ ଏହି ସମ୍ପର୍କ ବିଷୟରେ ଅବଗତ ଥିଲେ।
ଶୁକ୍ରବାର ପ୍ରିୟା ସପନଙ୍କୁ ତାଙ୍କ ଘରକୁ ଡାକିଥିଲେ। ଘରେ ପ୍ରିୟା ସପନଙ୍କୁ ବିବାହ କରିବା ବିଷୟରେ କହିଥିଲେ। ଏହା ଉପରେ ସପନ କହିଥିଲେ ଯେ ସେ ପ୍ରଥମେ ନିଜ ଗୋଡ଼ରେ ଠିଆ ହେବାକୁ ଚାହାଁନ୍ତି। ସେ କିଛି କାମ କରିବାକୁ ଚାହାଁନ୍ତି। ତା’ପରେ ହିଁ ସେ ବିବାହ କରିବେ। ଏହା ଶୁଣି ପ୍ରିୟା ରାଗି ଯାଇଥିଲେ। ସେ ତାଙ୍କ ମୋବାଇଲ ଫୋନ୍କୁ ତଳେ ଫିଙ୍ଗି ଭାଙ୍ଗିଦେଇଥିଲେ। ତା’ପରେ ସେ ନିଜ ରୁମ୍କୁ ଚାଲିଯାଇଥିଲେ। ପ୍ରାୟ ଅଧ ଘଣ୍ଟା ପର୍ଯ୍ୟନ୍ତ ସେ କୋଠରୀରୁ ବାହାରକୁ ଆସି ନ ଥିଲେ। ତା’ପରେ ସପନ ଛାତ ଉପରକୁ ଯାଇ କୋଠରୀର ଝରକା ଦେଇ ଚାହିଁଥିଲେ। ପରେ ଭିତରର ଦୃଶ୍ୟ ଦେଖି ଆଶ୍ଚର୍ଯ୍ୟ ହୋଇଯାଇଥିଲେ। କାରଣ ପ୍ରିୟା କୋଠରୀରେ ଆତ୍ମହତ୍ୟା କରିଥିଲେ।
କହାଯାଉଛି ଯେ ପ୍ରିୟା ଏକ ସୁଇସାଇଡ୍ ନୋଟ ମଧ୍ୟ ଲେଖିଥିଲେ। ଏଥିରେ ସେ ଜୀବନରୁ ଆଶା ହରାଇବା ବିଷୟରେ କହିଥିଲେ। ହେଲେ ସେ କାହାରି ନାମ ଲେଖି ନ ଥିଲେ। ବର୍ତ୍ତମାନ, ପୋଲିସ ଏହି ମାମଲାରେ ସପନକୁ ପଚରାଉଚରା କରୁଛି। ଏହି ମାମଲାରେ ଅଧିକ ତଦନ୍ତ ଚାଲିଛି। ଅନ୍ୟପକ୍ଷରେ, ପରିବାରଲୋକେ ପ୍ରିୟାଙ୍କ ମୃତ୍ୟୁକୁ ସହଜରେ ଗ୍ରହଣ କରିପାରୁନାହାନ୍ତି।
