ପଟ୍ଟାମୁଣ୍ଡାଇ,୨୦ା୫(ସ୍ବ.ପ୍ର.): ପ୍ରଚଣ୍ଡ ଗ୍ରୀଷ୍ମ ତାପରେ ଜନଜୀବନ ଅସ୍ତବ୍ୟସ୍ତ ହୋଇପଡ଼ୁଥିବା ବେଳେ ବିଭିନ୍ନ ସ୍ଥାନରେ ଜଳସଙ୍କଟ ମଧ୍ୟ ବଢ଼ିବାରେ ଲାଗିଛି। ସରକାର ଅର୍ଥ ବ୍ୟୟକରି ବିଭିନ୍ନ ପ୍ରକଳ୍ପ ନିର୍ମାଣ କରି ପ୍ରତ୍ୟେକ ପରିବାରକୁ ପାଇପ୍ ଯୋଗେ ପାନୀୟ ଜଳ ଯୋଗାଇ ଦେଉଛନ୍ତି। ମାତ୍ର କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ବ୍ଲକ ବଡ଼ପଡ଼ା ପଞ୍ଚାୟତରେ ଥିବା ପାନୀୟ ଜଳ ପ୍ରକଳ୍ପରୁ କେତେଜଣ ଦୁର୍ବୃତ୍ତ ଲଗାଯାଇଥିବା ଚାବିକୁ ତାଡ଼ି ଚୋରିକରି ନେଇଯାଇଛନ୍ତି। ଫଳରେ ପଞ୍ଚାୟତର ୭ଟି ୱାର୍ଡର ଲୋକେ ବିଶୁଦ୍ଧ ପାନୀୟ ଜଳ ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି। ଏ ନେଇ ବଡ଼ପଡ଼ା ସରପଞ୍ଚ ସୌଦାମିନୀ ସେଠୀ ପଟ୍ଟାମୁଣ୍ଡାଇ ଗ୍ରାମାଞ୍ଚଳ ଥାନାରେ ଲିଖିତ ଅଭିଯୋଗ କରିବା ସହ କେନ୍ଦ୍ରାପଡ଼ା ଗ୍ରାମ୍ୟ ପାନୀୟ ଜଳ ଯୋଗାଣ ବିଭାଗ ନିର୍ବାହୀଯନ୍ତ୍ରୀ ଓ ପଟ୍ଟାମୁଣ୍ଡାଇ ବିଡିଓଙ୍କୁ ଜଣାଇଛନ୍ତି। ମିଳିଥିବା ରିପୋର୍ଟ ମୁତାବକ, ଶୁକ୍ରବାର ସକାଳୁ କାଠିଆପଡ଼ା, ମିଇଁଜାଉଁଣି ଓ ବଡ଼ପଡ଼ା ଗ୍ରାମକୁ ପାଣି ନ ଆସିବାରୁ ଲୋକେ ସରପଞ୍ଚଙ୍କୁ ଫୋନ୍ କରି ଜଣାଇଥିଲେ। ସରପଞ୍ଚଙ୍କ ପ୍ରତିନିଧି ପାରେଶ୍ୱର ସେଠୀ ପାଣି ମୋଟର ଖରାପ ହୋଇଥିବ ଭାବି ପମ୍ପ୍ ହାଉସ ଯିବା ବାଟରେ ବାଇଦଣ୍ଡା ଛକ ପାଖରେ ଥିବା ପାଇପ୍ ଲାଇନ ଚାମ୍ବରରୁ ପାଣି ଅନର୍ଗଳ ବାହାରି ଯାଉଥିବା ଦେଖିବାକୁ ପାଇଥିଲେ। ସେଠାରେ ଲାଗିଥିବା ଚାବିକୁ କେହି ଦୁର୍ବୃତ୍ତ ଚୋରିକରି ନେବା ସହ ଅନ୍ୟ ଗୋଟିଏ ଚାବିକୁ ଭାଙ୍ଗି ଦେଇଛନ୍ତି। ଫଳରେ ୩ଟି ଗ୍ରାମର ୭ଟି ୱାର୍ଡ ଲୋକଙ୍କ ନିକଟକୁ ପାଣି ପହଞ୍ଚତ୍ପାରୁନାହିଁ। ପିଇବା ପାଣି ପାଇଁ ଲୋକେ ବିଭିନ୍ନ କୂଅ, ପୋଖରୀର ଦୂଷିତ ପାଣି ଉପରେ ନିର୍ଭର କରୁଛନ୍ତି। ଏ ନେଇ ସରପଞ୍ଚ ସେଠୀ ଥାନାରେ ଏତଲା ଦେବା ପରେ ପୋଲିସ ଏକ ମାମଲା ରୁଜୁକରି ତଦନ୍ତ କରୁଥିବା ଜଣାପଡ଼ିଛି। ସୂଚନାଯୋଗ୍ୟ, ମାସେ ପୂର୍ବରୁ ବଡ଼ପଡ଼ା ସୁଜନି କ୍ଲବ ପାଖରେ ପୋଖରୀକୁ ପାଣି ପୂରାଇବାକୁ କେତେଜଣ ଲୋକ ପାଇପ୍ କାଟି ଦେଇଥିବା ବେଳେ ୧୫ ଦିନ ହେବ ଧୋବଣୀ ଆଡ଼ି ନିକଟରେ ପାଇପ୍ କାଟି ଦେଇଥିଲେ। ସେଗୁଡ଼ିକ ମରାମତି କରାଯାଇ ପାଣି ଠିକ୍ ଭାବେ ଦିଆଯାଉଥିଲା ବୋଲି ସରପଞ୍ଚ ସେଠୀ କହିଛନ୍ତି।
