ଭୁବନେଶ୍ୱର, ୨୭।୬ (ବ୍ୟୁରୋ): ଇଣ୍ଟରନେଟ୍ ବ୍ୟବହାର ସମୟରେ ପିଲାଙ୍କୁ ସାଇବର ଅପରାଧୀଙ୍କଠାରୁ ଦୂରେଇ ରଖିବାରେ ଅଭିଭାବକଙ୍କ ଭୂମିକା ଗୁରୁତ୍ୱପୂର୍ଣ୍ଣ। ପିଲାମାନେ କେଉଁ ସାଇଟ୍କୁ ଯାଉଛନ୍ତି, କ’ଣ ଦେଖୁଛନ୍ତି ସେଥିପ୍ରତି ମାତାପିତାମାନେ ଦୃଷ୍ଟି ଦେବା ଆବଶ୍ୟକ। ସ୍ବେଚ୍ଛାସେବୀ ସଂଗଠନ ପିକକ ଓ ଫୋରାଲଡ୍ରାଲୋସା ବାର୍ନର ମିଳିତ ସହଯୋଗରେ ଅନ୍ଲାଇନ ସୁରକ୍ଷା ଉପରେ ଅନୁଷ୍ଠିତ ରାଜ୍ୟସ୍ତରୀୟ କର୍ମଶାଳାରେ ଏହି ମତ ପ୍ରକାଶ ପାଇଛି ା
ପିକକର କାର୍ଯ୍ୟନିର୍ବାହୀ ନିର୍ଦ୍ଦେଶିକା ଅନୁରାଧା ମହାନ୍ତି ସାଇବର ଅପରାଧର ଭୟାବହତା ଓ ଏହାର ନିରାକରଣ ସଂକ୍ରାନ୍ତରେ ସୂଚନା ଦେଇଥିଲେ। ସମ୍ପାଦକ ରଞ୍ଜନ କୁମାର ମହାନ୍ତି କହିଲେ, କୋଭିଡ୍ ମହାମାରୀ ସମୟରେ ସାଇବର କ୍ରାଇମ ବଢିଥିବାବେଳେ ଅନଲାଇନ ନିରାପତ୍ତା ମଧ୍ୟ ବିପନ୍ନ ହୋଇଛି। ଘରେ ରହୁଥିବାରୁ ସମସ୍ତେ ସୋସିଆଲ ମିଡିଆରେ ସକ୍ରିୟ ରହୁଛନ୍ତି। ଅନେକ ସମୟରେ ଇଣ୍ଟରନେଟ ବ୍ୟବହାର ବିଷୟରେ ଆମେ ଜାଣିପାରୁ ନ ଥିବାରୁ ଅନ୍ଲାଇନ ଜରିଆରେ ମିଛ ବାହାଘର ଓ ଶିଶୁ ଚାଲାଣ ଭଳି ଘଟଣା ବହୁ ପରିମାଣରେ ହେଉଛି। ତେଣୁ ସତର୍କ ନ ହୋଇ ଏହାକୁ ବ୍ୟବହାର କଲେ ସମସ୍ୟାରେ ପଡିବା ବୋଲି ରଞ୍ଜନ ମତ ଦେଇଥିଲେ। ଆଡପ୍ଶନ ସେଣ୍ଟ୍ରମର ଜାତୀୟ ନିର୍ଦ୍ଦେଶିକା ରୁବି ରାଉତ କହିଲେ, ଇଣ୍ଟରନେଟ୍ ବ୍ୟବହାର ସମୟରେ କେଉଁ ସାଇଟକୁ ଯିବା ଓ କେଉଁଠିକୁ ଯିବାନି ସେ ସଂକ୍ରାନ୍ତରେ ପିଲାମାନେ ଭଲଭାବେ ଜାଣିବା ଦରକାର। ରାଜ୍ୟ ଶିଶୁ ସୁରକ୍ଷା ସମିତି ସଂଯୋଜକ ପ୍ରୀତିକାନ୍ତ ପଣ୍ଡା ଠକେଇର ଶିକାର ହେଲେ ଆଦୌ ବିଳମ୍ବ ନ କରି ପୋଲିସରେ ଅଭିଯୋଗ କରିବା ଉଚିତ ବୋଲି ପରାମର୍ଶ ଦେଇଥିଲେ। ଏନଆଇସିର ପୂର୍ବତନ ବରିଷ୍ଠ ବୈଷୟିକ ବିଶେଷଜ୍ଞ ଡ. ରବୀନ୍ଦ୍ର ନାରାୟଣ ବେହେରା, ସୁଶ୍ରୀ ଶୈଲାନୀ ସୁମନ, ପିକକର ଅଧ୍ୟକ୍ଷା ଡକ୍ଟର ମୀନାକ୍ଷୀ ପଣ୍ଡା ଅଂଶ ଗ୍ରହଣ କରିଥିଲେ। ଡ. ସୁମିତ୍ରା ମହାନ୍ତି ଧନ୍ୟବାଦ ଦେଇଥିଲେ ା
