ଭୁବନେଶ୍ୱର,୨୧।୧୦(ବ୍ୟୁରୋ): ଐତିହାସିକ କେଦାରନାଥ ମହାପାତ୍ରଙ୍କ ୧୧୦ତମ ଜୟନ୍ତୀ ସମାରୋହ କେଦାରନାଥ ଗବେଷଣା ପ୍ରତିଷ୍ଠାନ ସଭାଗୃହରେ ଗୁରୁବାର ଅନୁଷ୍ଠିତ ହୋଇଯାଇଛି। କାର୍ଯ୍ୟକ୍ରମରେ ସଭାପତି ରଘୁନାଥ ମିଶ୍ର ଅଧ୍ୟକ୍ଷତା କରିଥିଲେ। ସଭାପତି ମିଶ୍ର କହିଥିଲେ, କେଦାରନାଥ ଥିଲେ ପୋଥି, ପଥର ଓ ପ୍ରତ୍ନତତ୍ତ୍ୱରେ ପ୍ରତିଭାଦୀପ୍ତ ପ୍ରଜ୍ଞାପୁରୁଷ। ପୋଥିନାଥ ଭାବେ ସେ ପରିଚିତ ଥିବା ଏହି ଅନନ୍ୟ ବ୍ୟକ୍ତିତ୍ୱଙ୍କ ଅବଦାନ ଓଡ଼ିଆ କାଳ୍ପନିକ କାବ୍ୟ ସମ୍ପାଦନା, ପ୍ରାଚୀନ ମନ୍ଦିର ଖନନ ଓ ଇତିହାସ ରଚନାରେ ସ୍ମରଣୀୟ ହୋଇ ରହିବ ବୋଲି ଆଲୋଚନା କରାଯାଥିଲା।
ଏହି ଅବସରରେ ମୁଖ୍ୟ ଅତିଥି ଭାବେ ଉତ୍କଳ ସସ୍କୃତି ବିଶ୍ୱବିଦ୍ୟାଳୟର କୁଳପତି ତଥା ବିଶିଷ୍ଟ ଐତିହାସିକ ପ୍ରଫେସର ବ୍ୟୋମକେଶ ତ୍ରିପାଠୀ, ରମାଦେବୀ ମହିଳା ବିଶ୍ୱବିଦ୍ୟାଳୟର ପ୍ରଧ୍ୟାପିକା ଡ.ସଙ୍ଘମିତ୍ରା ଭଞ୍ଜ, ମୁଖ୍ୟବକ୍ତା ପ୍ରତ୍ନତାତ୍ତ୍ୱିକ ସଂରକ୍ଷଣବିଦ୍ ତଥା କେଦାରନାଥଙ୍କ ପୁତ୍ର ନିର୍ମଳ କୁମାର ମହାପାତ୍ର ସମ୍ମାନିତ ଅତିଥି ଭାବେ ଯୋଗଦେଇଥିଲେ। ଏହି ଅବସରରେ ବିଭିନ୍ନ ବ୍ୟକ୍ତିଙ୍କୁ ସମ୍ମାନିତ କରାଯାଇଥିଲା। ସେମାନେ ହେଲେ ଶାନ୍ତନୁ କୁମାର ରଥ, କୃଷ୍ଣଚନ୍ଦ୍ର ମିଶ୍ର, ଶ୍ରୀମତି ନମିତା ଦାଶ, ଡ. ତାପସ ରଞ୍ଜନ ଷଢ଼ଙ୍ଗୀ, ରାଜକୁମାର ବେହେରା ଓ ସୁପ୍ରିୟା ପଣ୍ଡା। ଉତ୍ସବ ଆରମ୍ଭରେ ସମ୍ପାଦକ ରମେଶ ଚନ୍ଦ୍ର ପାଣି ସ୍ବାଗତ ଭାଷଣ ଦେଇଥିବା ବେଳେ ଯୁଗ୍ମ ସମ୍ପାଦକ ଡକ୍ଟର ଦେବାଶିଷ ମହାପାତ୍ର ଅତିଥି ପରିଚୟ ଓ ଡ.ଜେନାମଣି ସଞ୍ଜୀବ କୁମାର ପ୍ରମୁଖ ଅଭିଭାଷଣ ଦେଇଥିଲେ। ଅନ୍ୟତମ ଯୁଗ୍ମ ସମ୍ପାଦକ ଡ.ରମେଶଚନ୍ଦ୍ର ମଲ୍ଲିକ ଧନ୍ୟବାଦ ଅର୍ପଣ କରିଥିଲେ।
