ଭୁବନେଶ୍ୱର, ୨୮।୧୧(ବ୍ୟୁରୋ): ଅପରାଧ ଘଟାଇ ଭିଡିଓ ଭାଇରାଲ କରି ରାଜଧାନୀରେ ଆତଙ୍କ ଖେଳାଇଥିବା ବୁବୁ ଜେନାଙ୍କ କେବିଏନ୍ ଗ୍ୟାଙ୍ଗ ସମ୍ପର୍କରେ ତଦନ୍ତବେଳେ କମିଶନରେଟ ପୋଲିସକୁ ସଫଳତା ମିଳିଛି। ଶନିବାର ସ୍ପେଶାଲ ସ୍କ୍ବାଡ୍ ଓ ନୟାପଲ୍ଲୀ ଥାନା ପୋଲିସ ନୟାପଲ୍ଲୀ ଆଇଆର୍ସି ଭିଲେଜସ୍ଥିତ ସ୍ବପ୍ନେଶ୍ୱର ମନ୍ଦିର ନିକଟରେ ଚଢ଼ାଉ କରି ଜଣଙ୍କୁ ଧରିବା ସହ ତାଙ୍କଠାରୁ ୨ଟି ପିସ୍ତଲ ଜବତ କରିଛି। ତେବେ ଗୁଳି ଫୁଟାଇ ଅନ୍ୟ କେତେଜଣ ଘଟଣାସ୍ଥଳରୁ ଖସିଯାଇଥିବାବେଳେ ଧରାପଡିଥିବା ସମ୍ପୃକ୍ତ ଅଭିଯୁକ୍ତଙ୍କୁ ପୋଲିସ ଏକ ଅଜ୍ଞାତ ସ୍ଥାନରେ ରଖି ପଚରାଉଚରା କରୁଛି। ଗ୍ୟାଙ୍ଗ ଓ ଚୋରା ବନ୍ଧୁକ କାରବାର ସଂକ୍ରାନ୍ତରେ ତାଙ୍କଠାରୁ ପୋଲିସ କେତେକ ତଥ୍ୟ ହାସଲ କରିଛି। ସେ ଜଣେ ପେସାଦାର ଅପରାଧୀ ହୋଇଥିବାବେଳେ ତାଙ୍କ ନାମରେ ଭୁବନେଶ୍ୱର ସମେତ ବିଭିନ୍ନ ଥାନାରେ ଏକାଧିକ ମାମଲା ରହିଥିବା ପୋଲିସ ଜାଣିବାକୁ ପାଇଛି। ଏଥିସହ ସମ୍ପୃକ୍ତ ଅନ୍ୟ ଅଭିଯୁକ୍ତଙ୍କୁ ଧରିବାକୁ ବିଭିନ୍ନ ବାର୍, ହୋଟେଲରେ ଚଢାଉ ଜାରି ରହିଥିବାବେଳେ ତଦନ୍ତରେ ବାଧା ଉପୁଜିବା ଆଶଙ୍କାରେ ପୋଲିସ ଏ ସମ୍ପର୍କରେ କୌଣସି ତଥ୍ୟ ପ୍ରଘଟ କରୁନାହିଁ। ସୂଚନା ମୁତାବକ, ସ୍ପେଶାଲ ସ୍କ୍ବାଡ୍ କବ୍ଜାରେ ଥିବା ଅଭିଯୁକ୍ତ କେବିଏନ୍ ଗ୍ୟାଙ୍ଗ ସହ ହାତ ମିଳାଇ ଲୁଟ୍ପାଟ୍ କରୁଥିଲେ। ଏଥିସହ ରାଜ୍ୟ ବାହାରୁ ଚୋରା ବନ୍ଧୁକ ଆଣି ଭୁବନେଶ୍ୱରରେ ବିଭିନ୍ନ ଅସାମାଜିକ ଯୁବକ ଓ କଲେଜ ଛାତ୍ରଙ୍କୁ କମ୍ ଦାମରେ ବିକ୍ରି କରୁଥିଲେ। ଏପରି କି ଏହି ବନ୍ଧୁକ ସାହାଯ୍ୟରେ ଗ୍ୟାଙ୍ଗ୍ ସଦସ୍ୟମାନେ ବେଶ୍ ସକ୍ରିୟ ହୋଇଉଠିଥିଲେ। ପୂର୍ବରୁ ଗିରଫ ହୋଇଥିବା ଗ୍ୟାଙ୍ଗ ସଦସ୍ୟଙ୍କୁ ପଚରାଉଚରାବେଳେ ବନ୍ଧୁକ କାରବାର ଓ ସମ୍ପୃକ୍ତ ଅନ୍ୟ ଅଭିଯୁକ୍ତଙ୍କ ସମ୍ପର୍କରେ ସୂଚନା ମିଳିଥିଲା। ତେଣୁ ଏହାକୁ ଧରିବା ପାଇଁ ସ୍ପେଶାଲ ସ୍କ୍ବାଡ୍ ଓ ନୟାପଲ୍ଲୀ ଥାନା ପୋଲିସ ଯୋଜନା ପ୍ରସ୍ତୁତ କରି ଅଭିଯୁକ୍ତଙ୍କ ଉପରେ ନଜର ରଖିଥିଲା। ଶୁକ୍ରବାର ବିଳମ୍ବିତ ରାତିରେ ଗ୍ୟାଙ୍ଗର ସଦସ୍ୟମାନେ ଆଇଆର୍ସି ଭିଲେଜ ନିକଟ ସ୍ବପ୍ନେଶ୍ୱର ମନ୍ଦିରରେ ବସି ଅପରାଧ ପାଇଁ ଯୋଜନା କରୁଥିଲେ। ଖବରପାଇ ମିଳିତ ପୋଲିସ ଟିମ୍ ସେଠାରେ ଚଢ଼ାଉ କରିଥିଲା। ଏହି ସମୟରେ ଅଭିଯୁକ୍ତମାନେ ଫାଙ୍କା ଗୁଳି ଚାଳନା କରି ଖସିଯାଉଥିବାବେଳେ ଜଣକୁ ପୋଲିସ କାବୁ କରିନେଇଥିଲା।
