ଶ୍ରୀନଗର, ୫।୬ : କଶ୍ମୀରରେ ଲଗାତାର ଟାର୍ଗେଟ କିଲିଂ ମଧ୍ୟରେ ସରକାର ଶ୍ରୀନଗରର ସୁରକ୍ଷିତ ବିବେଚନା କରାଯାଉଥିବା ସ୍ଥାନକୁ ୧୭୭ ଶିକ୍ଷକଙ୍କୁ ଟ୍ରାନ୍ସଫର କରିବା ଲାଗି ନିଷ୍ପତ୍ତି ଗ୍ରହଣ କରିଛନ୍ତି। ତେବେ ଏହି ଟ୍ରାନ୍ସଫର ତାଲିକାରେ ଥିବା ନାମ ମେସେଜିଂ ଆପ ଏବଂ ସୋସିଆଲ ମିଡିଆରେ ଲିକ ହୋଇଛି। ଏହା ପରେ କଶ୍ମୀରୀ ପଣ୍ଡିତ ଶିକ୍ଷକମାନେ କ୍ରୋଧରେ ସରକାରଙ୍କ ବିରୋଧରେ ସ୍ଲୋଗାନ ଦେଇଥିଲେ ଏବଂ ତାୱି ବ୍ରିଜକୁ ଜାମ କରିଥିଲେ। କ୍ରୋଧିତ କର୍ମଚାରୀ କହିଛନ୍ତି ଯେ ଆମକୁ କଶ୍ମୀରରୁ ସ୍ଥାନାନ୍ତର କରିବା ପରିବର୍ତ୍ତେ ସରକାର ଏହି ତାଲିକାକୁ ସାର୍ବଜନୀନ କରି ଆତଙ୍କବାଦୀଙ୍କୁ ଆମନ୍ତ୍ରଣ କରିଛନ୍ତି। ହିନ୍ଦୁ କର୍ମଚାରୀମାନେ ସରକାରଙ୍କ ବିରୋଧରେ ଖୋଲାଖୋଲି ଭାବେ ଏନେଇ ପ୍ରଦର୍ଶନ କରିଛନ୍ତି।
କଶ୍ମୀର ଫେରିଥିବା ହିନ୍ଦୁ ସରକାରୀ କର୍ମଚାରୀମାନେ ସେମାନଙ୍କ ସ୍ଥାନାନ୍ତର ଦାବି କରୁଥିଲେ। ମାତ୍ର ସରକାରୀ ତାଲିକା ସୋସିଆଲ ମିଡ଼ିଆରେ ଲିକ୍ ହେବା ନେଇ ସେମାନେ କ୍ଷୋଭ ପ୍ରକାଶ କରିଛନ୍ତି। ଜମ୍ମୁକୁ କୌଣସି ସରକାରୀ କର୍ମଚାରୀଙ୍କୁ ସ୍ଥାନାନ୍ତର କରାଯିବ ନାହିଁ ବୋଲି ସରକାର ସ୍ପଷ୍ଟ କରିଛନ୍ତି। ସରକାରୀ କର୍ମଚାରୀ କହିଛନ୍ତି ଯେ, ସେମାନେ ଗତ ୧୫ ବର୍ଷ ଧରି କଶ୍ମୀରରେ କୌଣସି ସୁରକ୍ଷା ବିନା କାର୍ଯ୍ୟ କରୁଛନ୍ତି। କିନ୍ତୁ ଏବେ ସୃଷ୍ଟି ହୋଇଥିବା ପରିସ୍ଥିତିରେ ସେମାନେ ନିଜକୁ ସୁରକ୍ଷିତ ମଣୁନାହାଁନ୍ତି।
ତାଲିକା ଲିକ୍ ହୋଇଥିବା ନେଇ ଭାଜପା ପକ୍ଷରୁ ଆପତ୍ତି କରାଯାଇଛି। ଏହାକୁ ବିରୋଧ କରି ଭାଜପା ସୁରକ୍ଷା ଉଲ୍ଲଂଘନ ବୋଲି କହିଛି। ତାଲିକା ଅନୁଯାୟୀ, ପ୍ରଧାନମନ୍ତ୍ରୀଙ୍କ ପୁନର୍ବାସ ପ୍ୟାକେଜ ଅଧୀନରେ ଚାକିରି ପାଇଥିବା ୧୭୭ କଶ୍ମୀରୀ ପଣ୍ଡିତ ଶିକ୍ଷକଙ୍କୁ ଟ୍ରାନ୍ସଫର କରାଯାଇଛି।
ହ୍ବାଟସ ଆପ ଏବଂ ଅନ୍ୟାନ୍ୟ ସୋସିଆଲ ମିଡିଆ ପ୍ଲାଟଫର୍ମରେ ଟ୍ରାନ୍ସଫର ତାଲିକା ଶେୟାର କରାଯାଇଛି। ଭାଜପା ମୁଖପାତ୍ର ଅଲତାଫ ଠାକୁର ଏକ ବିବୃତ୍ତିରେ କହିଛନ୍ତି ଯେ ଟ୍ରାନ୍ସଫର ତାଲିକାକୁ ସୋସିଆଲ ମିଡିଆ ପ୍ଲାଟଫର୍ମରେ ସାର୍ବଜନୀନ କରିବା ଏକ ପ୍ରମୁଖ ସୁରକ୍ଷା ଉଲ୍ଲଂଘନ କାରଣ ପୋଷ୍ଟିଂ କରାଯାଇଛି ତାହା ସହଜରେ ଆତଙ୍କବାଦୀମାନେ ଜାଣି ପାରିବେ। ଏହି ତାଲିକାର ଲିକ ପ୍ରସଙ୍ଗରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଏବଂ କଶ୍ମୀର ଉପତ୍ୟକାରେ ଟାର୍ଗେଟ କିଲିଂ ହତ୍ୟାକାଣ୍ଡ ଘଟାଇଥିବା ଲୋକଙ୍କୁ ଚିହ୍ନଟ କରିବାକୁ ସେ ସରକାରଙ୍କୁ ଅନୁରୋଧ କରିଛନ୍ତି।
