କୋକସରା, ୧୪।୧୨ (ଡି.ଏନ.ଏ) ପ୍ରାକୃତିକ ସୌନ୍ଦର୍ଯ୍ୟରେ ଭରପୁର କଳାହାଣ୍ଡି ଜିଲା। ସେଥି ମଧ୍ୟରୁ କୋକସରା ବ୍ଲକ ଆମପାଣି ପଞ୍ଚାୟତ ଆମପାଣି ସାହାଜଖୋଲ ଜଙ୍ଗଲ ପାଦଦେଶରେ ଥିବା ‘କରକ’ ଜଳପ୍ରପାତ ଅନ୍ୟତମ। ଶୀତ ଋତୁରେ ଏଠାରେ ବଣଭୋଜି କରିବା ପାଇଁ ଛୁଟି ଆସିଥାନ୍ତି ଜିଲା ତଥା ଜିଲା ବାହାରୁ ଶହ ଶହ ପର୍ଯ୍ୟଟକ। ହେଲେ ଏହାର ଉନ୍ନତି ଦିଗରେ ପ୍ରଶାସନର ଦୃଷ୍ଟି ପଡୁ ନ ଥିବା ଓ ପ୍ରଚାର ପ୍ରସାର ଅଭାବ ଯୋଗୁ ଲୋକଲୋଚନକୁ ଆସିପାରୁ ନାହିଁ ଏହି ‘କରକ’ ଜଳପ୍ରପାତ। ବ୍ଲକ ମୁଖ୍ୟ କାର୍ଯ୍ୟାଳୟଠାରୁ ଜାତୀୟ ରାଜପଥ ଦେଇ ୧୫ କି.ମି. ରାସ୍ତା ଗଲେ ପଡେ ଆମପାଣି। ସେଠାରୁ ଆଉ ୩ କି.ମି. ଅତିକ୍ରମ ପରେ ସାହାଜଖୋଲ ଜଙ୍ଗଲ ମଧ୍ୟରେ ଅବସ୍ଥିତ ଏହି ଜଳପ୍ରପାତ। ଝରଣାର କୁଳୁକୁଳୁ ଶବ୍ଦ ଓ ପକ୍ଷୀର କିଚିରି ମିଚିରି ସ୍ବର ପର୍ଯ୍ୟଟକଙ୍କୁ ବେଶ୍ ଆମୋଦିତ କରିଥାଏ। ଆଦିବାସୀ ଅଧ୍ୟୁଷିତ କୋକସରା ଇଲାକରେ ଲୁକ୍କାୟିତ ଭାବେ ରହିଥିବା ଏହି ମନୋରମ ସ୍ଥାନରେ ବଣଭୋଜି ଓ ପ୍ରକୃତି କୋଳରେ ଦିନଟିଏ ବିତାଇବା ପାଇଁ ପ୍ରକୃତିପ୍ରମୀଙ୍କୁ ଟାଣି ଆଣୁଛି। ଝରଣାର ଝର ଝର ଶବ୍ଦ ଓ ବଣଭୋଜି କରିବାର ମଜା ସହ ସେଲ୍ଫିର ମଜାରେ ବିଭୋର ହୋଇଥାନ୍ତି ପର୍ଯ୍ୟଟକ। ଏଠାକାର ପ୍ରାକୃତିକ ସୌନ୍ଦର୍ଯ୍ୟ ଉପଭୋଗ କରିବାକୁ ଦିନକୁ ଦିନ ପର୍ଯ୍ୟଟକଙ୍କ ସୁଅ ଛୁଟୁଛି। ଏହି ସ୍ଥାନର ବିକାଶ ଦିଗରେ ସ୍ଥାନୀୟ ପ୍ରଶାସନ କିମ୍ବା ଜିଲା ପ୍ରଶାସନ ଦୃଷ୍ଟି ଦେଲେ ଲୋକ ଲୋଚନକୁ ଆସିବା ସହ ଆଗକୁ ହଜାର ହଜାର ପର୍ଯ୍ୟଟକଙ୍କ ସୁଅ ଛୁଟିବ ବୋଲି ମତପ୍ରକାଶ ପାଇଛି।
