କନ୍ନୌଜ,୧୬।୭: ଉତ୍ତର ପ୍ରଦେଶର କନ୍ନୌଜ ଜିଲା ସୌରିଖ ବ୍ଲକସ୍ଥିତ ବଝେଡ଼ି କମ୍ପୋଜିଟ ବିଦ୍ୟାଳୟରୁ ଏକ ଲଜ୍ଜାଜନକ ଘଟଣା ସାମ୍ନାକୁ ଆସିଛି । ବିଦ୍ୟାଳୟରେ କାର୍ଯ୍ୟରତ ଜଣେ ମହିଳା ଶିକ୍ଷୟିତ୍ରୀ ଏବଂ ଜଣେ ସହକାରୀ ଶିକ୍ଷକଙ୍କ ପ୍ରେମଳାପର ଭିଡିଓ ଭାଇରାଲ ହେବା ପରେ ଉଭୟଙ୍କୁ ଚାକିରିରୁ ନିଲମ୍ବିତ କରାଯାଇଛି । ଜିଲା ପ୍ରାଥମିକ ଶିକ୍ଷା ଅଧିକାରୀ (BSA) ସନ୍ଦୀପ କୁମାର ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ।
ସୌରିଖର ବ୍ଲକ ଶିକ୍ଷା ଅଧିକାରୀ (BEO) ବିଶ୍ୱନାଥ ପାଠକଙ୍କ ସୁପାରିଶ ଆଧାରରେ ଏହି ନିଲମ୍ବନ ଆଦେଶ ଜାରି କରାଯାଇଛି । ବିଇଓଙ୍କ ରିପୋର୍ଟ ଅନୁସାରେ, ଦୁଇ ଶିକ୍ଷକଙ୍କର ଏଭଳି ଆପତ୍ତିଜନକ ଭିଡିଓ ସାମ୍ନାକୁ ଆସିଛି, ଯାହା ଜଣେ ଶିକ୍ଷକଙ୍କ ସାମାଜିକ ଆଚରଣ ଓ ମର୍ଯ୍ୟାଦାର ସମ୍ପୂର୍ଣ୍ଣ ବିପରୀତ। ରିପୋର୍ଟରେ ଏହା ମଧ୍ୟ ଦର୍ଶାଯାଇଛି ଯେ, ବିଦ୍ୟାଳୟ ପରିସରରେ ଏଭଳି ଅନୈତିକ କାର୍ଯ୍ୟକଳାପ ସେଠାରେ ପଢ଼ୁଥିବା କୋମଳମତି ଛାତ୍ରୀଛାତ୍ରଙ୍କ ଉପରେ ଅତ୍ୟନ୍ତ ଖରାପ ପ୍ରଭାବ ପକାଇବ ।
