ମୁମ୍ବାଇ: ଦେଶରେ ଯେତେବେଳେ କରୋନା ଭାଇରସ ସଂକ୍ରମଣ ଆରମ୍ଭ ହୋଇ ଯାଇଥିଲା ସେତେବେଳେ ପ୍ରଥମ ବଲିଉଡ୍ ସେଲିବ୍ରିଟି ଭାବେ ଗାୟିକା କନିକା କପୁର କରୋନାରେ ପୀଡ଼ିତ ହୋଇଥିଲେ । ଏହାକୁ ନେଇ ପ୍ରତିଦିନ କିଛି ନା କିଛି ଖବର ସାମ୍ନାକୁ ଆସୁଥିଲା । ଆଉ ସେ ସୁସ୍ଥ ହୋଇଯିବା ପରେ ସମ୍ପୂର୍ଣ୍ଣ ନିରବ ଥିଲେ କହିଲେ ଚଳେ । ଏବେ ପୁଣିଥରେ କନିକା ନିଜ ଗୀତକୁ ନେଇ ଆସିଛନ୍ତି ଚର୍ଚ୍ଚାକୁ । ସୂଚନା ଅନୁଯାୟୀ, ଜ୍ୟାକି ଭଗନାନୀଙ୍କ ଜେଜଷ୍ଟ ମ୍ୟୁଜିକ ତଥା ଜି ମ୍ୟୁଜିକର ନୂଆ ଗୀତ ଜୁଗନୀ ରିଲିଜ୍ ହୋଇଛି । ଏହି ଗୀତରେ କନିକା କପୁର ପୁଣିଥରେ ଫୁଲ୍ ଫର୍ମରେ ଫେରିଛନ୍ତି । ଜବରଦସ୍ତ ଆୱାଜ ସହ ଭିଡିଓରେ ବି ଭିନ୍ନ ଅନ୍ଦାଜରେ କନିକାଙ୍କୁ ଦେଖିବାକୁ ମିଳିଛି । କନିକାଙ୍କ ଗୀତ ଦର୍ଶକ ତଥା ଶ୍ରୋତାଙ୍କୁ ନାଚିବାକୁ ବାଧ୍ୟ କରିବ ବୋଲି କୁହାଯାଉଛି । ୟୁଟୁବରେ ଏହା ରିଲିଜ୍ ହେବା ପରେ ମାତ୍ର କେଇ ଘଣ୍ଟାରେ ଏହାକୁ ୧ ଲକ୍ଷ ଭିୟୁଜ ମିଳିଯାଇଛି । ଏହା ପୂର୍ବରୁ କନିକା ଏହାର ଟିଜର ସୋସିଆଲ ମିଡିଆରେ ଶେୟାର କରିଥିଲେ । ଏହାସହ ସେ ଲେଖିଥିଲେ ଆପଣ ଜୁଗନୀ ସହ ମିଶିବାକୁ ପ୍ରସ୍ତୁତ ଅଛନ୍ତି । ତେବେ ୨୦୨୧ ନୂଆବର୍ଷରେ କନିକାଙ୍କ ଏହି ଗୀତ ଧମାକା କରିବ ବୋଲି କୁହାଯାଉଛି ।
