ବ୍ୟାଙ୍କକ,୧୯।୧୧ : ଆମେରିକାର ଉପରାଷ୍ଟ୍ରପତି କମଲା ହାରିସ ଚାଇନା ରାଷ୍ଟ୍ରପତି ଶି ଜିନପିଙ୍ଗ ଶନିବାର ବ୍ୟାଙ୍କକରେ ଭେଟିଛନ୍ତି। ଏକ ସଂକ୍ଷିପ୍ତ କିନ୍ତୁ ଗୁରୁତ୍ୱପୂର୍ଣ୍ଣ ବୈଠକରେ ଉଭୟ ଯୋଗ ଦେଇଛନ୍ତି। ବ୍ୟାଙ୍କକ ଠାରେ ହେବାକୁ ଥିବା ଏସିଆ-ପାସିଫିକ ଅର୍ଥନୈତିକ ସହଯୋଗ (ଏପିଇସି) ଶିଖର ସମ୍ମିଳନୀ ପାଇଁ ଉଭୟ ନେତା ଏଠାରେ ଅଛନ୍ତି। ଉଭୟଙ୍କ ମଧ୍ୟରେ ଏକ ଗୁପ୍ତ ବୈଠକ ହୋଇଥିଲା।
ହାରିସ-ଜିନପିଙ୍ଗ ବୈଠକରେ ବିଶ୍ୱର ଦୁଇ ବୃହତ୍ତମ ଅର୍ଥନୀତି ମଧ୍ୟରେ ଆଲୋଚନା ଦ୍ୱାରା ଯୋଗାଯୋଗ ଲାଗି ପ୍ରୟାସ କରାଯାଇଥିଲା। ହ୍ବାଇଟ ହାଉସର ଜଣେ ଅଧିକାରୀଙ୍କ ଅନୁଯାୟୀ ହାରିସ ଜିନପିଙ୍ଗଙ୍କୁ କହିଛନ୍ତି ଯେ ଯୋଗାଯୋଗର ଲାଇନ ଖୋଲା ରହିବା ଉଚିତ।
ବାଲିରେ ରାଷ୍ଟ୍ରପତି ଜୋ ବାଇଡେନଙ୍କ ମନ୍ତବ୍ୟକୁ ହାରିସ ପୁନରାବୃତ୍ତି କରିଛନ୍ତି। ବାଇଡେନ ଏବଂ ଜିନପିଙ୍ଗ ବାଲିରେ ପରସ୍ପରକୁ ଭେଟିଥିଲେ। ପ୍ରତିଯୋଗିତା ପରିଚାଳନା ପାଇଁ ଚାଇନା ଏବଂ ଆମେରିକା ଯୋଗାଯୋଗ ଲାଇନକୁ ଖୋଲା ରଖିବା ଉଚିତ ବୋଲି ବାଇଡେନ ଗୁରୁତ୍ୱରରୋପ କରିଥିଲେ।
ଚାଇନା ଏବଂ ଆମେରିକା ମଧ୍ୟରେ ସମ୍ପର୍କକୁ ଆଗକୁ ନେବା ପାଇଁ ଏହି ବୈଠକ ବିଶେଷ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି।
ବାଣିଜ୍ୟ ଏବଂ ପ୍ରଯୁକ୍ତିବିଦ୍ୟା, ତାଇୱାନ ଉପରେ ଚାଇନାର ଦାବି, ମହାମାରୀ ଏବଂ ହଂକଂ ତଥା ମାନବିକ ଅଧିକାରର ଉଲ୍ଲଂଘନକୁ ନେଇ ଆମେରିକା ଏବଂ ଚାଇନା ମଧ୍ୟରେ ମତଭେଦ ରହିଛି। ଏହାପୂର୍ବରୁ ଶୁକ୍ରବାର ହାରିସ ଆମେରିକାକୁ ଏକ ନିର୍ଭରଯୋଗ୍ୟ ଅର୍ଥନୈତିକ ଭାଗିଦାରୀ ଭାବରେ ସ୍ଥାପନ କରିଥିଲେ। ସେ ଏକ ବ୍ୟବସାୟିକ ସମ୍ମିଳନୀକୁ କହିଥିଲେ ଯେ ଆମେରିକା ଏକ ପ୍ରଶାନ୍ତ ଶକ୍ତି। ଏହା ଏକ ଖୋଲା, ପରସ୍ପର ସହ ସଂଯୁକ୍ତ, ସମୃଦ୍ଧ, ନିରାପଦ ଏବଂ ସ୍ଥାୟୀ କ୍ଷେତ୍ରକୁ ଗୁରୁତ୍ୱ ପ୍ରଦାନ କରିବାକୁ ଆଗ୍ରହୀ।
