\ନୂଆପଡ଼ା,୨୭।୪(ମକାରୁ ବେମାଲ): ନୂଆପଡ଼ା ଜିଲା କୋମନା ବ୍ଳକ ଅଧୀନ ବୁଦ୍ଧିକୋମନା ପଞ୍ଚାୟତର ପଣ୍ଡରାପଥର ଏବଂ ସ୍ଥାନୀୟ ଆଖପାଖ ଗ୍ରାମରେ କାଳବୈଶାଖୀ ପ୍ରଭାବରେ ବ୍ୟାପକ କ୍ଷୟକ୍ଷତି ହୋଇଛି। କୁଆପଥର ମାଡ଼ ସହ ବର୍ଷା ପବନରେ ଚାଷୀଙ୍କ ଧାନ ଫସଲ ନଷ୍ଟ ହୋଇଛି। ଏପରିକି ବିଭିନ୍ନ ସ୍ଥାନରେ ଗଛପଡ଼ି ତାର ଛିଣ୍ଡି ବିଦ୍ୟୁତ୍ ସେବା ବ୍ୟାହତ ହୋଇଛି।
ଶନିବାର ରାତିରେ ବୁଦ୍ଧି କୋମନା ପଞ୍ଚାୟତ ଅଞ୍ଚଳରେ କାଳବୈଶାଖୀ ତାଣ୍ଡବ ରଚିଥିଲା। ପ୍ରବଳ ବେଗରେ ପବନ ବହିବା ସହ ବର୍ଷା ଓ କୁଆପଥର ମାଡ଼ ହୋଇଥିଲା। ଏଥିରେ ପଣ୍ଡରାପଥର ଗାଁ ସହ ଦୋହେଲପଡ଼ା, କୁରେଶ୍ୱର, ଖାଇରଭାଡ଼ି, ଜଦାମୁଣ୍ଡା, ମାନିଗୁଡ଼ା, ଗଣିଆରି, ନାଇକପଡ଼ା, ସିହିନାମୁଣ୍ଡା ଆଦି ଅନେକ ଗାଁର ଚାଷୀଙ୍କ ଧାନ ଚାଷ ନଷ୍ଟ ହୋଇଛି।
ଚାଷୀମାନେ ଧାର ଉଧାର କରି ରବି ଧାନ ଚାଷ କରିଥିଲେ। ଜଡ଼ାମୁଣ୍ଡା ସୁନ୍ଦର ଜଳ ସେଚନ ପ୍ରକଳ୍ପ ପାଣିରେ ଚାଷ କରି ଥିଲେ। ଏବେ ଧାନ ଅମଳ ହେବାକୁ ଥିବା ବେଳେ ବର୍ଷା ପବନ ସାଙ୍ଗକୁ କୁଆପଥର ମାଡ଼ରେ ଧାନ ସବୁ ପାଣିରେ ଭାସୁଛି। ପାଚିଲା ଧାନ ସବୁ ଝଡ଼ି ପଡିଛି। ଫଳରେ ଚାଷୀମାନେ ଚିନ୍ତାରେ ପଡ଼ିଛନ୍ତି।
ଅନେକ ଗାଁର ୧୧ କେଭି ବିଦ୍ୟୁତ୍ ତାର ଉପରେ ଗଛପଡ଼ି ବିଦ୍ୟୁତ୍ ସରବରାହ ବନ୍ଦ ରହିବା ସହ ଜଟଗଡ-ସୋରିପଡା ରାସ୍ତାରେ ବିଶାଳ ଏକ ବରଗଛ ଟଲିପଡ଼ି ରାସ୍ତା ଅବରୋଧ ହୋଇଛି। ସେହିପରି ମାନିଗୁଡ଼ା, ଗନିଆରୀ, ଜଡ଼ାମୁଣ୍ଡା, କୁମୁଟିମୁଣ୍ଡା ଓ ଜଟଗଡ ଅଞ୍ଚଳରେ କାଳବୈଶାଖିରେ ବ୍ୟାପକ କ୍ଷୟକ୍ଷତି ହୋଇଥିବା ଅଭିଯୋଗ ହୋଇଛି।
କ୍ଷୟକ୍ଷତିର ଆକଳନ କରି କ୍ଷତିଗ୍ରସ୍ତ ଚାଷୀଙ୍କୁ ତୂରନ୍ତ ସହାୟତା ପ୍ରଦାନ କରିବାକୁ ଜିଲା ପ୍ରଶାସନ ନିକଟରେ ପଣ୍ଡରାପଥର ଗାଁର ଚାଷୀ ଦମୟନ୍ତୀ ଧରୁଆ, ଧର୍ମୁ ଗୌଡ଼, ଆଶାରାମ ମାଝୀ, ଗଜମନ ରାଉତ, ସଦୁଲ ମାଝୀ, ପ୍ରଫୁଲ ଦୁରିଆ, ପଡୁତୋଳା ମାଝୀ, କୁରସିଂ ରାଉତ, ହଳଧର ମାଝୀ, କଙ୍କି ମାଝୀ, ଟଙ୍କଧର ମାଝୀ, ମହେନ୍ଦ୍ର ମାଝୀ, ହରପ୍ରସାଦ ରାଉତ, ନକୁଳ ମାଝୀ, ହିରଣ୍ୟ ରାଉତ, ନିରଞ୍ଜନ ରାଉତ, ନିଲମ୍ବନ ରାଉତ, କ୍ଷୀରସିନ୍ଧୁ ରାଉତ, ଭାଝି ମାଝୀ,ଦୟା ମାଝୀ, ଜୟଲାଲ ମାଝୀ, ପ୍ରହ୍ଲାଦ ମାଝୀ,ତୁଲସି ମାଝୀ, ସୀତା ରାଉତ, ଭିମସେନ ପ୍ରଧାନୀ,ମନୁଧର ମାଝୀ, ହେମ ବାଗଙ୍କ ସହ ଅଞ୍ଚଳବାସୀ ଦାବି କରିଛନ୍ତି।
