ଭଦ୍ରକ,୧୪ା୫(ସନାତନ ରାଉତ): ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ଇଞ୍ଜିନିୟର ବିଜୟ କୁମାର ମହାନ୍ତିଙ୍କ ଘରେ ଭିଜିଲାନ୍ସ ଚଢାଉ କରିଛି। ଗୁରୁବାର ଆରଡିଛକସ୍ଥିତ ୩ ମହଲା ଘର ସମେତ ନରିପୁରସ୍ଥିତ କାଡା ଡିଭିଜନ କାର୍ଯ୍ୟାଳୟ ଉପରେ ଭିଜିଲାନ୍ସ ପକ୍ଷରୁ ଚଢ଼ାଉ କରାଯାଇଥିଲା।
ଭଦ୍ରକ ଭିଜିଲାନ୍ସ ଡିଏସ୍ପି ଦୁଷ୍ମନ୍ତ ନାୟକଙ୍କ ନେତୃତ୍ୱରେ ଭଦ୍ରକ ଓ ବାଲେଶ୍ୱର ଭିଜିଲାନ୍ସ ଟିମ୍ ଦ୍ୱାରା ମିଳିତ ଭାବେ ଚଢ଼ାଉ କରାଯାଇଥିବା ବେଳେ ଭୁବନେଶ୍ୱର, କେନ୍ଦୁଝର ଓ ବାଲେଶ୍ୱରରେ ଥିବା ଘରେ ମଧ୍ୟ ଚଢ଼ାଉ ହୋଇଥିବା ସୂଚନା ମିଳିଛି। ଭିଜିଲାନ୍ସ ଟିମ୍ ବିଭିନ୍ନ କାଗଜପତ୍ର ସହ ବ୍ୟାଙ୍କ ପାସ୍ବୁକ, ଫିକ୍ସଡ୍ ଡିପୋଜିଟ୍, ଏଲ୍ଆଇସି ବଣ୍ଡ, ଜମିପଟ୍ଟା ଆଦି କାଗଜପତ୍ର ଯାଞ୍ଚ କରିଥିବା ଜଣାପଡ଼ିଛି।
ଭଦ୍ରକ ସାମରାଇପୁରରେ ୩୫୦୦ ସ୍କୋୟାର ଫୁଟରେ ୩ ମହଲା କୋଠା, ବାଲେଶ୍ୱର ଜିଲା ବସ୍ତା ନରସିଂହଡିହରେ ୨୬୦୦ ସ୍କୋୟାର ଫୁଟରେ ୨ ମହଲା କୋଠା, ଭୁବନେଶ୍ୱର, ଭଦ୍ରକ, ବସ୍ତା, ଅମର୍ଦ୍ଦା, ରାସଗୋବିନ୍ଦପୁର ଆଦି ସ୍ଥାନରେ ୭ଟି ଦାମୀ ପ୍ଲଟ୍, ନଗଦ ୧ ଲକ୍ଷ ୭୩ ହଜାର ୧୮୦ ଟଙ୍କା, ୩୫୦ ଗ୍ରାମର ସୁନା ଅଳଙ୍କାର ଆଦି ସମ୍ପତ୍ତି ତାଙ୍କ ନାମରେ ଥିବା ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି। ୨୦୧୯ରୁ ସେ ଭଦ୍ରକରେ କନିଷ୍ଠଯନ୍ତ୍ରୀ ଭାବେ କାର୍ଯ୍ୟରତ ଅଛନ୍ତି।
