କାମାକ୍ଷାନଗର, ୯।୭(ଡି.ଏନ୍.ଏ.)
ଜୁନ୍ ୧୦ରୁ ଓଡ଼ିଶାକୁ ଛୁଇଁଲାଣି ମୌସୁମୀ। ମଝିରେ ମଝିରେ ସୃଷ୍ଟି ହେଉଥିବା ଲଘୁଚାପ ଚାଷୀ ମନରେ ଆଶା ସଞ୍ଚାର କରୁଛି। ହେଲେ ଘୋଟି ଆସୁଥିବା କଳାହାଣ୍ଡିଆ ମେଘ ସାମାନ୍ୟ ବର୍ଷିଦେଇ ଉଭାନ ହୋଇଯାଉଛି। ଜମି ଭଲରେ ଭିଜୁ ନ ଥିବାରୁ ହଳଲଙ୍ଗଳ ବୁଲିପାରୁନାହିଁ। ଜୁନ୍ର ନିଅଣ୍ଟିଆ ବର୍ଷା ନିରାଶ କରିଥିବାବେଳେ ଜୁଲାଇକୁ ଆଶା କରି ରହିଛନ୍ତି ଢେଙ୍କାନାଳ ଜିଲା କାମାକ୍ଷାନଗର ଉପଖଣ୍ଡର ଚାଷୀକୁଳ।
ଚଳିତବର୍ଷ ଦକ୍ଷିଣ ପଶ୍ଚିମ ମୌସୁମୀ ବାୟୁ ନିରାଶ କରିବ ନାହିଁ। ଭଲ ବର୍ଷାହେବ ବୋଲି ଆଶ୍ୱାସନା ଦେଇଥିଲା ପାଣିପାଗ ବିଭାଗ। ନିର୍ଦ୍ଧାରିତ ସମୟରେ ଦକ୍ଷିଣ ପଶ୍ଚିମ ମୌସୁମୀ ବାୟୁ ଓଡ଼ିଶା ଛୁଇଁବା ପରେ ଚାଷୀଙ୍କ ମନରେ ଉତ୍କଣ୍ଠା ବଢ଼ିଥିଲା। ହେଲେ ଜୁନ୍ରେ ଯେଉଁ ଅନୁପାତରେ ବର୍ଷା ହେବା କଥା, ତାହା ହେଲାନାହିଁ। କାମାକ୍ଷାନଗର ଉପଖଣ୍ଡରେ ନିଅଣ୍ଟିଆ ବର୍ଷା ପାଇଁ ଲକ୍ଷ୍ୟ ଧାର୍ଯ୍ୟଠାରୁ ବହୁ ପଛରେ ଚାଷ କାର୍ଯ୍ୟ ଚାଲିଛି। ଉପଖଣ୍ଡର ୪ ବ୍ଲକ ମଧ୍ୟରୁ କାମାକ୍ଷାନଗର ବ୍ଲକରେ ଖରିଫ୍ ଋତୁରେ ୧୦ ହଜାର ୨୫୪ ହେକ୍ଟରରେ ଧାନ ଚାଷ କରାଯିବାକୁ ଲକ୍ଷ୍ୟ ରହିଥିଲା। ହେଲେ ଅନିୟମିତ ବର୍ଷା ଯୋଗୁ ମାତ୍ର ୩,୮୯୫ ହେକ୍ଟରରେ ବୁଣା କାର୍ଯ୍ୟ ସରିଛି। ଏହିକ୍ରମରେ ଭୁବନ ବ୍ଲକରେ ଟାର୍ଗେଟ ଥିବା ୯,୦୯୦ ହେକ୍ଟର ମଧ୍ୟରୁ ୪,୯୩୦, ପରଜଙ୍ଗ ବ୍ଲକରେ ୧୦,୪୬୪ ହେକ୍ଟର ମଧ୍ୟରୁ ୪,୦୨୫ ଏବଂ କଙ୍କଡ଼ାହାଡ଼ ବ୍ଲକରେ ୭,୨୪୨ ହେକ୍ଟର ମଧ୍ୟରୁ ୪,୨୪୨ ହେକ୍ଟରରେ ଚାଷ ପାଇଁ ଜମି ପ୍ରସ୍ତୁତି ସରିଛି। ପାଖାପାଖି ଅଧା ଜମିରେ ଚାଷ କାର୍ଯ୍ୟ ଆରମ୍ଭ ହୋଇପାରି ନ ଥିବା କୃଷି ବିଭାଗର ଏହି ପରିସଂଖ୍ୟାନରୁ ସ୍ପଷ୍ଟ ହୋଇଛି।
ବର୍ଷା ପରିମାଣ ଆକଳନ କଲେ ୨୦୨୦ ଜାନୁୟାରୀରୁ ଜୁନ୍ ସୁଦ୍ଧା କାମାକ୍ଷାନଗର ବ୍ଲକରେ ୬୫୧ ମିଲିମିଟର, ଭୁବନ ବ୍ଲକରେ ୪୯୩ ମିଲିମିଟର, ପରଜଙ୍ଗ ବ୍ଲକରେ ୪୯୬, ମିଲିମିଟର ଏବଂ କଙ୍କଡ଼ାହାଡ଼ ବ୍ଲକରେ ୮୦୮ ମିଲିମିଟର ବର୍ଷା ହୋଇଥିଲା। କିନ୍ତୁ ଚଳିତବର୍ଷ ଜୁନ୍ ୩୦ ସୁଦ୍ଧା କାମାକ୍ଷାନଗର ବ୍ଲକରେ ୩୬୬, ଭୁବନରେ ୫୬୩, ପରଜଙ୍ଗରେ ୨୩୯, କଙ୍କଡ଼ାହାଡ଼ରେ ୩୯୯ ମିଲିମିଟର ବର୍ଷା ହୋଇଛି। ପରଜଙ୍ଗ ଏବଂ ଭୁବନରେ ପୂର୍ବବର୍ଷ ତୁଳନାରେ ଅଧିକ ବର୍ଷା ହୋଇଛି ସତ, ହେଲେ ଅନିୟମିତ ବର୍ଷା କାରଣରୁ ଚାଷ କାର୍ଯ୍ୟ ଆଶାଜନକ ହୋଇପାରି ନ ଥିବା ବିଭାଗ ପକ୍ଷରୁ କୁହାଯାଇଛି।
ଏ ସଂକ୍ରାନ୍ତରେ ଉପଖଣ୍ଡ ଭାରପ୍ରାପ୍ତ ଜିଲା କୃଷି ଅଧିକାରୀ ଦିଲୀପ କୁମାର ମିଶ୍ର କୁହନ୍ତି, ଜୁଲାଇରେ ଅଧିକ ବର୍ଷା ହେବ ବୋଲି ପାଣିପାଗ ବିଭାଗ ପକ୍ଷରୁ ଅନୁମାନ କରାଯାଇଛି। ଏହାକୁ ନଜରରେ ରଖି ଚାଷୀମାନେ ବିହନ ବୁଣା କାର୍ଯ୍ୟ ଜାରି ରଖିଛନ୍ତି। ବର୍ଷା ହେଲେ ରୁଆ ବେଉଷଣ ଆରମ୍ଭ ହେବ। ଜୁଲାଇ କିମ୍ବା ଅଗଷ୍ଟ ପ୍ରଥମ ସପ୍ତାହ ସୁଦ୍ଧା ଲକ୍ଷ୍ୟ ଧାର୍ଯ୍ୟ ପୂରଣ ହେବ ବୋଲି ଆଶା ରଖାଯାଇଛି। ଅନ୍ୟପଟେ କାମାକ୍ଷାନଗର ଏବଂ ପରଜଙ୍ଗ ବ୍ଲକର ୭୦% ଜମି ଜଳସେଚିତ। ତେଣୁ ଜୁଲାଇ ମଧ୍ୟଭାଗରେ ରେଙ୍ଗାଳି ବାମ କେନାଲ ପାଣି ଛଡ଼ାଗଲେ ଚାଷ ଲାଗି ଅଧିକ ସମସ୍ୟା ହେବନାହିଁ ବୋଲି ଉପଖଣ୍ଡ ଭାରପ୍ରାପ୍ତ ଜିଲା କୃଷି ଅଧିକାରୀ ସୂଚନା ଦେଇଛନ୍ତି।
ବର୍ଷାକୁ ଅପେକ୍ଷା କରିଛୁ
୨ ଏକର ଜମିରେ ବୁଣା କାର୍ଯ୍ୟ ସରିଛି। ୩ ଏକରରେ ରୁଆ ପାଇଁ ତଳି ପଡ଼ିଛି। ଜମିରେ ପାଣି ନ ଥିବାରୁ ତଳି ରୋଇବା ନେଇ ଚିନ୍ତାରେ ପଡ଼ିଛୁ। ବର୍ଷାକୁ ଅପେକ୍ଷା କରିଛୁ।
-ଅଭିରାମ ମହାନ୍ତି, ଚାଷୀ, କଇଁବିଲ
ରୁଆ ଆରମ୍ଭ ହୋଇନି
ଚଳିତ ବର୍ଷ ୧୦ ଏକର ଜମିରେ ଧାନ ଚାଷ ଲାଗି ଯୋଜନା ରହିଛି। କିନ୍ତୁ ବର୍ଷା ଅଭାବରୁ ରୁଆ ଆରମ୍ଭ ହୋଇନାହିଁ। ବିଲମୁଣ୍ଡ ପୋଖରୀ ପାଣିରେ ଦେଢ଼ ଏକର ଜମିରେ ତଳି ରୋକିବାକୁ ନିଷ୍ପତ୍ତି ନେଇଛି।
-ମନମୋହନ ନାଥ, ଚାଷୀ, ମୁଣ୍ଡିଦେଉଳି
କେନାଲ ପାଣି ଆସିନି
ଗତବର୍ଷ ଜୁଲାଇ ଆରମ୍ଭରେ କେନାଲ ପାଣି ଆସିବା ପରେ ଚାଷ କାର୍ଯ୍ୟ ସ୍ବାଭାବିକ ହୋଇଥିଲା। ଚଳିତବର୍ଷ ଅଦ୍ୟାବଧି ପାଣି ଛଡ଼ାଯାଇନାହିଁ। କେନାଲ ପାଣି ମାଡ଼ିଲେ ବହୁ ଚାଷୀ ଉପକୃତ ହୋଇପାରନ୍ତେ।
-ପଦ୍ମଚରଣ ସାହୁ, ଚାଷୀ, ଆଳତୁମା
