ନୂଆଦିଲ୍ଲୀ,୯ ।୩: ଅସଦୁଦ୍ଦିନ ଓୱାଇସିଙ୍କ ଦଳ ଅଲ ଇଣ୍ଡିଆ ମଜଲିସ-ଏ-ଇନ୍ତେହାଦୁଲ ମୁସଲିମ ରାଜସ୍ଥାନର ଜୁନୈଦ ଓ ନାସିରଙ୍କ ପରିବାରକୁ ଦେଢ ଦେଢ ଲକ୍ଷ ଟଙ୍କାର ସହାୟତା ଦେବାକୁ ଘୋଷଣା କରିଛି । ଜୁନୈଦ ଓ ନାସିରଙ୍କୁ ହରିୟାଣାରେ ଗୋ ରକ୍ଷକମାନେ ହତ୍ୟା କରିଥିଲେ । ଉଭୟଙ୍କ ମୃତ ଶରୀର ଭିବାନି ନିକଟରେ ଏକ ଗାଡିରେ ଜଳିଯାଇଥିବା ଅବସ୍ଥାରେ ମିଳିଥିଲା ।
ଏହାସହ ଏଆଇଏମଆଇଏମ ତେଲେଙ୍ଗାନାର ମେଦକରେ ପୋଲିସ କଷ୍ଟଡିରେ ଟର୍ଚର ହୋଇ ମୃତ୍ୟୁ ବରଣ କରିଥିବା ଖଦିର ଖାଁଙ୍କ ବିଧବା ପତ୍ନୀଙ୍କୁ ବି ଦେଢ ଲକ୍ଷ ଟଙ୍କା ସହାୟତା ପ୍ରଦାନ କରିବାକୁ ଘୋଷଣା କରିଛି ।
ସୂଚନାଯୋଗ୍ୟ, ରାଜସ୍ଥାନ ଭରତପୁରର ବାସିନ୍ଦା ଜୁନୈଦ ଓ ନାସିରଙ୍କ ଜଳିଯାଇଥିବା ମୃତ ଶରୀର ଗତ ଫେବୃୟାରୀ ୧୬ରେ ହରିୟାଣାର ଭିବାନିରେ ଏକ ବୋଲେରୋ ଗାଡିରୁ ମିଳିଥିଲା । ଏହି ମାମଲାରେ ପୋଲିସ ଜଣେ ନାମୀ ଅଭିଯୁକ୍ତ ରିଙ୍କୁ ସୈନିଙ୍କୁ ଗିରଫ କରିଥିଲା । ରିଙ୍କୁ୍ଙ୍କୁ ପଚରାଉଚରା ପରେ ଅନ୍ୟ ୮ ଜଣ ଅଭିଯୁକ୍ତଙ୍କ୍ୁ ଚିହ୍ନଟ କରାଯାଇଥିଲା । ପୋଲିସର ୫ଟି ଟିମ ଗଠନ କରାଯାଇ ଏମାନଙ୍କୁ ଧରିବାକୁ ପ୍ରୟାସ କରାଯାଉଛି । ପୋଲିସ ଅଭିଯୁକ୍ତଙ୍କ ବିରୋଧରେ ୫-୫ ହଜାର ଟଙ୍କାର ପୁରସ୍କାର ରାଶି ଘୋଷଣା କରିଛି ।
୧୫ ଫେବୃୟାରୀରେ ନାସିର ଓ ଜୁନୈଦ ନିଖୋଜ ଥିବା ରିପୋର୍ଟ ଦିଆଯାଇଥିଲା । ଏହାର ଠିକ୍ ପରଦିନ ହରିୟାଣାର ଭିବାନିରେ ତାଙ୍କର ଜଳି ଯାଇଥିବା ଗାଡି ଓ ଗାଡି ଭିତରେ ଜଳିଯାଇଥିବା ଅବସ୍ଥାରେ ଦୁଇଟି କଙ୍କାଳ ମିଳିଥିଲା ।
