କୁଜଙ୍ଗ,୨୦ା୫(ଡି.ଏନ୍.ଏ.): ଜେଏସ୍ଡବ୍ଲ୍ୟୁ ପକ୍ଷରୁ ପ୍ରସ୍ତାବିତ ପ୍ରକଳ୍ପ ଅଞ୍ଚଳ ଢିଙ୍କିଆ, ନୂଆଗାଁ, ଗଡକୁଜଙ୍ଗ ପଞ୍ଚାୟତ ସମେତ ସନ୍ନିକଟ ବାଲିତୁଠ ପଞ୍ଚାୟତର ୧୫ ଅଙ୍ଗନଓ୍ବାଡି କେନ୍ଦ୍ରକୁ ରୂପାନ୍ତରଣ କରାଯାଇଛି। ସେଠାରେ କମ୍ପାନୀ ପକ୍ଷରୁ ବିଭିନ୍ନ ସାମଗ୍ରୀ ବଣ୍ଟନ କରାଯାଇଛି। ଜେଏସ୍ଡବ୍ଲ୍ୟୁ ପକ୍ଷରୁ ସାମାଜିକ ଦାୟିତ୍ୱବୋଧ ଆଧାରରେ ଢିଙ୍କିଆ ପଞ୍ଚାୟତର ପାଟଣା, ମାହଳ, ଗୋବିନ୍ଦପୁର ଗାଁରେ ଥିବା ୬ ଅଙ୍ଗନଓ୍ବାଡି କେନ୍ଦ୍ର, ନୂଆଗାଁ ପଞ୍ଚାୟତର ରାମଚଣ୍ଡୀ ଓ ମଠସାହିରେ ଥିବା ୫ କେନ୍ଦ୍ର, ଗଡକୁଜଙ୍ଗ ପଞ୍ଚାୟତର ନୋଳିଆସାହି ଓ କୁଞ୍ଜବିହାରୀ କେନ୍ଦ୍ର ଓ ବାଲିତୁଠ ପଞ୍ଚାୟତର ବାଲିତୁଠ ଓ ବଡବୁଦା କେନ୍ଦ୍ରର କାନ୍ଥକୁ ବିଭିନ୍ନ ରଙ୍ଗରେ ରଙ୍ଗିନ କରାଯାଇଛି। ସେଠାରେ ଛୋଟ ଛୋଟ ପିଲାମାନଙ୍କୁ ଆକର୍ଷିତ କଲାଭଳି (ବାଲା) ମଡେଲ ଅନୁଯାୟୀ ଛବି ଅଙ୍କା ଯାଇଛି। ଏସବୁ କେନ୍ଦ୍ରରେ ଛୋଟପିଲାଙ୍କ ଖେଳିବା ନିମନ୍ତେ ବେବି ସୁଇଙ୍ଗ, ଘୋଡା ଦୋଳି, ତିନି ଚକିଆ ଗଧ, ଆପୁଲ ଟୟ ବକ୍ସ, ଗୋଲକଧନ୍ଦା, ଲୁଡୁ, ଗୋଲଟେବୁଲ, ୧୦ଟି ଲେଖାଏ ପ୍ଲାଷ୍ଟିକ ଚେୟାର, ଷ୍ଟିଲ ଥାଳି, ଚାମଚ, ସ୍କୁଲ ବ୍ୟାଗ, ଓଡିଆ ଏବଂ ଇଂରାଜୀ ବର୍ଣ୍ଣମାଳା ବହିଭଳି ୨୦ ପ୍ରକାରର ସାମଗ୍ରୀ ପ୍ରଦାନ କରାଯାଇଛି। ଏହି ୧୫ଟି କେନ୍ଦ୍ରରେ ୩୫୦ରୁ ଉର୍ଦ୍ଧ୍ୱ ପିଲା ପାଠ ପଢନ୍ତି। ଏଥିପାଇଁ ସାମାଜିକ ଦାୟିତ୍ୱବୋଧ ପାଣ୍ଠିରୁ ଜେଏସଡବ୍ଲ୍ୟୁ ୨୩ଲକ୍ଷ ଟଙ୍କା ଖର୍ଚ୍ଚ କରିଥିବା କମ୍ପାନୀ ପକ୍ଷରୁ କୁହାଯାଇଛି।
କେନ୍ଦ୍ରଗୁଡିକୁ ରୂପାନ୍ତରଣ କରାଯିବା ପରେ ଶିଶୁମାନେ ସେଠାକୁ ଯିବାକୁ ଆଗ୍ରହ ପ୍ରକାଶ କରୁଛନ୍ତି ବୋଲି ସୋମନାଥ ସ୍ବାଇଁ, ଅଞ୍ଜନା ପ୍ରଧାନ, ଆରତି ଦଳାଇ, ରଞ୍ଜିତା ଦଳାଇ ଓ ପ୍ରଭାତ ରାଉତ ପ୍ରମୁଖ କହିଛନ୍ତି।
