ଭୁବନେଶ୍ୱର, ୮।୩(ବ୍ୟୁରୋ):ଅନ୍ତର୍ଜାତୀୟ ମହିଳା ଦିବସ ଅବସରରେ ଜିନ୍ଦଲ ଷ୍ଟିଲ ଆଣ୍ଡ ପାୱାର ଲିମିଟେଡ୍ (ଜେଏସ୍ପିଏଲ୍) ଫାଉଣ୍ଡେଶନ୍ ପକ୍ଷରୁ ଓଡ଼ିଶା ଓ ଛତିଶଗଡରେ ମହିଳା ଏବଂ ବାଳିକାଙ୍କ ଶିକ୍ଷା ଏବଂ ଦକ୍ଷତା ବିକାଶ ନିମନ୍ତେ ଏକ ଯୋଜନା ‘ଜିନ୍ଦଲ ସ୍ବୟଂ ସମ୍ପନ୍ନା ନାରୀ’ କାର୍ଯ୍ୟକ୍ରମ ସୋମବାର ଦିଲ୍ଲୀରେ ଆରମ୍ଭ ହୋଇଛି। ଏଥିରେ ଆର୍ଥିକ ଦୁର୍ବଳ ବର୍ଗର ମହିଳା ଏବଂ ଯୁବତୀମାନଙ୍କୁ ତାଲିମ ଓ ଉଚ୍ଚ ଶିକ୍ଷା ପାଇଁ ଆର୍ଥିକ ସହାୟତା ପ୍ରଦାନ କରାଯିବ। ଫାଉଣ୍ଡେସନର ଚେୟାରମ୍ୟାନ ଶାଲୁ ଜିନ୍ଦଲ ଉକ୍ତ ଯୋଜନାକୁ ଲୋକାର୍ପିତ କରି କହିଛନ୍ତି, ‘ଏହି ଅନ୍ତର୍ଜାତୀୟ ମହିଳା ଦିବସରେ ଲିଙ୍ଗଗତ ସମାନତା ନିଶ୍ଚିତ କରିବା ନିମନ୍ତେ ସମସ୍ତେ କାର୍ଯ୍ୟ କରିବା’। ସାମାଜିକ ବିକାଶ କାର୍ଯ୍ୟକ୍ରମରେ ଦକ୍ଷତା ଏବଂ ଶିକ୍ଷାରେ ବିନିଯୋଗ ହେଉଛି ମହିଳାମାନଙ୍କର ସର୍ବୋଚ୍ଚ ପ୍ରାଥମିକତା। ଏହି ଦିଗରେ ଗୋଟିଏ ପାଦ ଆଗକୁ ଯାଇ ଫାଉଣ୍ଡେସନ ମହିଳାଙ୍କ ପାଇଁ ଏହି ଯୋଜନା କାର୍ଯ୍ୟକାରୀ କରୁଛି। ମହିଳାମାନଙ୍କର ରୋଜଗାର କ୍ଷମତା ବୃଦ୍ଧି ସହିତ ସେମାନଙ୍କୁ ସଶକ୍ତ କରିବା ପାଇଁ ଏହି ଯୋଜନା ସହାୟକ ହେବ। ଏହି ଯୋଜନା ପ୍ରଥମେ ଓଡ଼ିଶା ଏବଂ ଛତିଶଗଡରେ ହେବ ବୋଲି ଜିନ୍ଦଲ ସୂଚନା ଦେଇଛନ୍ତି। ତାଲିମ ପରେ ସେମାନେ ଯେକୌଣସି ଦକ୍ଷତା ବିକାଶ ପାଠ୍ୟକ୍ରମ ଚୟନ କରି ରୋଜଗାରକ୍ଷମ ହୋଇପାରିବେ।
