ନୂଆଦିଲ୍ଲୀ,୧୯।୫(ପି.ଟି.): ପୂର୍ବତନ ଭାରୋତ୍ତୋଳକ ଜୋଶେଫ ଜେମ୍ସଙ୍କୁ କ୍ରୀଡ଼ା ମନ୍ତ୍ରଣାଳୟ ୨ ଲକ୍ଷ ୫୦ ହଜାର ଟଙ୍କା ସହାୟତା ପ୍ରଦାନ କରିବାକୁ ଘୋଷଣା କରିଛି। ଏସିଆନ ଗେମ୍ସ ସ୍ବର୍ଣ୍ଣ ପଦକ ବିଜେତା ତଥା ଅନ୍ତର୍ଜାତୀୟ ପାଓ୍ବାର ଲିଫ୍ଟିଂ କୋଚ୍ ଜୋଶେଫ ପ୍ରଥମେ କୋଭିଡ୍- ୧୯ ଦ୍ୱାରା ସଂକ୍ରମିତ ହୋଇଥିଲେ ଓ ଚିକିତ୍ସିତ ହେବା ପରେ ଆରୋଗ୍ୟ ଲାଭ କରିଥିଲେ।
୨୦୦୮ ଏସିଆନ ପାଓ୍ବାର ଲିଫ୍ଟିଂ ଚାମ୍ପିୟନଶିପ୍ ସ୍ବର୍ଣ୍ଣ ପଦକ ବିଜେତା ଜୋଶେଫଙ୍କୁ ପଣ୍ଡିତ ଦୀନ ଦୟାଲ ଉପାଧ୍ୟାୟ ନ୍ୟାଶନାଲ ଓ୍ବେଲଫେୟାର ଫଣ୍ଡ ଫର ସ୍ପୋଟର୍ସ ପର୍ସନ ମାଧ୍ୟମରେ ଏହି ସହାୟତା ରାଶି ପ୍ରଦାନ କରାଯିବ ବୋଲି ମନ୍ତ୍ରଣାଳୟ ତରଫରୁ କୁହାଯାଇଛି। କରୋନ ସଂକ୍ରମିତ ହେବା ପରେ ଏପ୍ରିଲ ୨୪ରେ ଜୋଶେଫ୍ ନିଃଶ୍ୱାସ ନେବାରେ କଷ୍ଟ ଅନୁଭବ କରିଥିଲେ। ଅକ୍ସିଜେନ ସ୍ତର କମିବା ପରେ ତାଙ୍କୁ ହାଇଦ୍ରାବାଦ୍ସ୍ଥିତ ବିବେକାନନ୍ଦ ହସ୍ପିଟାଲରେ ଭର୍ତ୍ତି କରାଯାଇଥିଲା। ଏହାପରେ ଆଇସିୟୁରେ ଗୋଟିଏ ସପ୍ତାହ ରହିବା ପରେ ୨୦୦୬ ଏସିଆନ ଗେମ୍ସ ସ୍ବର୍ଣ୍ଣ ପଦକ ବିଜେତା ଜୋଶେଫ ଏବେ ସୁସ୍ଥ ଅଛନ୍ତି ଓ ସେ ଘରକୁ ମଧ୍ୟ ଫେରିଛନ୍ତି।
ଏବେ କରୋନା ମହାମାରୀର ପ୍ରକୋପ ଜାରି ରହିଥିବା ବେଳେ ପୂର୍ବତନ କ୍ରୀଡ଼ାବିତ ଓ କୋଚ୍ମାନଙ୍କୁ ସହାୟତା ପ୍ରଦାନ କରିବା ପାଇଁ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ), ଭାରତୀୟ ଅଲିମ୍ପିକ୍ ଆସୋସିଏଶନ (ଆଇଓଏ) ଓ କ୍ରୀଡ଼ା ମନ୍ତ୍ରଣାଳୟର ମିଳିତ ପ୍ରୟାସରେ ଏହି ସହାୟତା ପ୍ରଦାନ କରାଯାଉଛି। ଠିକ୍ ସମୟରେ ସହାୟତା ପ୍ରଦାନ କରିଥିବାରୁ ଜୋଶେଫ୍ଙ୍କ ଝିଅ ଆଲିକା ଜୋଏ କ୍ରୀଡ଼ା ମନ୍ତ୍ରଣାଳୟକୁ କୃତଜ୍ଞତା ଜଣାଇଛନ୍ତି। ତେଲଙ୍ଗାନା ଅଲିମ୍ପିକ୍ ଆସୋସିଏଶନ ସାଧାରଣ ସମ୍ପାଦକ କେ.ଜେ. ଯାଦବ ମଧ୍ୟ ମନ୍ତ୍ରଣାଳୟକୁ ଧନ୍ୟବାଦ ଜଣାଇଛନ୍ତି।
