ନୂଆଦିଲ୍ଲୀ,୩।୨: ୨୦୦୭ରେ ଭାରତ ଟି-୨୦ ବିଶ୍ୱକପ ଜିତାଇଥିବା ଦ୍ରୁତ ବୋଲର ଯୋଗୀନ୍ଦର ଶର୍ମା ସମସ୍ତ ପ୍ରକାର କ୍ରିକେଟ୍ରୁ ଅବସର ନେଇଛନ୍ତି। ସେ ଶୁକ୍ରବାର ଟୁଇଟ୍ ଯୋଗେ କ୍ରିକେଟରୁ ଅବସର ଘୋଷଣା କରିଛନ୍ତି। ୩୯ ବର୍ଷିୟ ଯୋଗୀନ୍ଦର ଦୀର୍ଘ ଦିନ ଧରି ଅନ୍ତର୍ଜାତୀୟ କ୍ରିକେଟଠାରୁ ଦୂରରେ ଥିଲେ। ସେ ୨୦୦୭ରେ ଶେଷ ଅନ୍ତର୍ଜାତୀୟ ମ୍ୟାଚ ଖେଳିଥିଲେ।
୨୦୦୭ ଟି-୨୦ ବିଶ୍ୱକପ ଫାଇନାଲ ପୂର୍ବରୁ ଯୋଗୀନ୍ଦର ଶର୍ମାଙ୍କୁ କେହି ଜାଣି ନ ଥିଲେ। ବିଶ୍ୱକପ୍ର ଫାଇନାଲ୍ ମ୍ୟାଚ ଭାରତ ଏବଂ ପାକିସ୍ତାନ ମଧ୍ୟରେ ହୋଇଥିଲା। ପାକିସ୍ତାନ ଇନିଂସର ୨୦ତମ ଓଭର ଟାଇଟଲ୍ ବିଜୟ ପାଇଁ ଗୁରୁତ୍ୱୂପର୍ଣ୍ଣ ଥିଲା। ଅଧିନାୟକ ଏମଏସ ଧୋନୀ ଯୁବ ଦ୍ରୁତ ବୋଲର ଯୋଗୀନ୍ଦର ଶର୍ମାଙ୍କ ହାତରେ ବଲ୍ ଦେଇଥିଲେ ଏବଂ ଧୋନୀଙ୍କ ଏହି ନିଷ୍ପତ୍ତିରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। ଯୋଗୀନ୍ଦର ଦଳକୁ ନିରାଶ କରି ନ ଥିଲେ। ସେ ମିସବା-ଉଲ-ହକଙ୍କ ବଡ ଉଇକେଟ ନେଇ ଭାରତୀୟ ଦଳକୁ ସ୍ମରଣୀୟ ବିଜୟ ପ୍ରଦାନ କରିଥିଲେ। ଏହି ଘଟଣାକୁ ସମସ୍ତ ଭାରତୀୟ ପ୍ରଶଂସକ ମନେ ରଖିଛନ୍ତି। ଏବେ ଯୋଗୀନ୍ଦର ହରିୟାଣା ପୋଲିସରେ ଡିଏସପି ଭାବରେ କାର୍ଯ୍ୟ କରୁଛନ୍ତି।
୩୯ ବର୍ଷିୟ ଯୋଗୀନ୍ଦର ମାତ୍ର ୪ଟି ଅନ୍ତର୍ଜାତୀୟ ଟି-୨୦ ମ୍ୟାଚ ଖେଳିଥିଲେ। ପାକିସ୍ତାନ ବିପକ୍ଷ ଅନ୍ତିମ ମ୍ୟାଚ ପରେ ସେ ଟିମ ଇଣ୍ଡିଆ ପାଇଁ କୌଣସି ମ୍ୟାଚ ଖେଳି ନାହାଁନ୍ତି।
