ରାଞ୍ଚି,୧୨ା୧୧: ଝାଡ଼ଖଣ୍ଡ ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ଭୋଟ ବୁଧବାର ହେବାକୁ ଥିବାବେଳେ ଏଥିପାଇଁ ସୋମବାର ସନ୍ଧ୍ୟାରେ ପ୍ରଚାର ଶେଷ ହୋଇଛି। ଶେଷ ଦିନରେ ବିଭିନ୍ନ ଦଳର ନେତାମାନେ ବିଭିନ୍ନ ରାଲି ଓ ସଭାରେ ଯୋଗଦେଇ ପ୍ରଚାରକୁ ଜୋର୍ଦାର କରିଥିଲେ। ଏହି ପର୍ଯ୍ୟାୟରେ ୪୩ ଆସନ ପାଇଁ ନିର୍ବାଚନ ହେବାକୁ ଯାଉଥିବାବେଳେ ସେଥିରୁ ଏସ୍ସିଙ୍କ ପାଇଁ ୬, ଏସ୍ଟିଙ୍କ ନିମନ୍ତେ ୨୦ ଏବଂ ସାଧାରଣ ବର୍ଗଙ୍କ ପାଇଁ ୧୭ ଆସନ ରହିଛି। ୧.୩୭ କୋଟି ଭୋଟର ଏହି ପର୍ଯ୍ୟାୟରେ ୬୮୩ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ।
ମତଦାନ ପାଇଁ ୧୫,୩୪୪ଟି ବୁଥ୍ ହୋଇଛି। ପ୍ରମୁଖ ପ୍ରାର୍ଥୀଙ୍କ ମଧ୍ୟରେ ଅଛନ୍ତି ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଚମ୍ପାଇ ସୋରେନ୍, ମୁଖ୍ୟମନ୍ତ୍ରୀ ହେମନ୍ତ ସୋରେନ୍ଙ୍କ କ୍ୟାବିନେଟର ୬ ମନ୍ତ୍ରୀ ଡ. ରାମେଶ୍ୱର ଓରାଓଁ, ରାମଦାସ ସୋରେନ୍, ବନ୍ନା ଗୁପ୍ତା, ମିଥିଳେଶ ଠାକୁର, ଦୀପକ ବିରୁଆ ଏବଂ ବୈଦ୍ୟନାଥ ରାମ। ଅନ୍ୟ ହେଭିଓ୍ବେଟ ପ୍ରାର୍ଥୀମାନେ ହେଲେ ପୂର୍ବତନ ମନ୍ତ୍ରୀ ଜେଡିୟୁର ସରଯୁ ରାୟ, ପୂର୍ବତନ ବାଚସ୍ପତି ତଥା ପୂର୍ବତନ ମନ୍ତ୍ରୀ ଭାଜପାର ସି.ପି. ସିଂ, ନୀରା ଯାଦବ, ନୀଳକଣ୍ଠ ସିଂ ମୁଣ୍ଡା, ରାମଚନ୍ଦ୍ର ଚନ୍ଦ୍ରବଂଶୀ, ପୂର୍ବତନ ମନ୍ତ୍ରୀ ତଥା କଂଗ୍ରେସ ପ୍ରାର୍ଥୀ କେ.ଏନ୍. ତ୍ରିପାଠୀ, ପୂର୍ବତନ ମୁଖ୍ୟମନ୍ତ୍ରୀ ତଥା ବର୍ତ୍ତମାନର ଓଡ଼ିଶା ରାଜ୍ୟପାଳ ରଘୁବର ଦାସଙ୍କ ବୋହୂ ପୂର୍ଣ୍ଣିମା ଦାସ, ଚମ୍ପାଇ ସୋରେନଙ୍କ ପୁଅ ବାବୁଲାଲ୍ ସୋରେନ, କ୍ୟାବିନେଟ ମନ୍ତ୍ରୀ ସତ୍ୟାନନ୍ଦ ଭୋକ୍ତାଙ୍କ ବୋହୂ ରଶ୍ମି ପ୍ରକାଶ।
ପ୍ରଥମ ପର୍ଯ୍ୟାୟରେ ଜାତୀୟ ଦଳରୁ ୮୭ ପ୍ରାର୍ଥୀ ରହିଥିବା ବେଳେ ଝାଡ଼ଖଣ୍ଡର ସ୍ବୀକୃତିପ୍ରାପ୍ତ ଦଳରୁ ୩୨, ଅନ୍ୟ ରାଜ୍ୟର ସ୍ବୀକୃତିପ୍ରାପ୍ତ ଦଳରୁ ୪୨ ଏବଂ ଅଣସ୍ବୀକୃତିପ୍ରାପ୍ତ ପଞ୍ଜୀକୃତ ଦଳରୁ ୧୮୮ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି। ଏହା ବ୍ୟତୀତ ୩୩୪ ସ୍ବାଧୀନ ପ୍ରାର୍ଥୀ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଛନ୍ତି। ୭୩ ଜଣ ମହିଳା ଏବଂ ଜଣେ ତୃତୀୟ ଲିଙ୍ଗୀ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତାରେ ରହିଥିବା ଜଣାପଡ଼ିଛି।
