ଭୁବନେଶ୍ୱର,୨୧ା୫(ବ୍ୟୁରୋ): ୟୁନିୟନ ବ୍ୟାଙ୍କରୁ ଋଣ ଠକେଇ ମାମଲାରେ ସହରର ୨ଟି ରିଅଲ ଇଷ୍ଟେଟ ସଂସ୍ଥାର ବିଭିନ୍ନ ବାଣିଜି୍ୟକ ଏବଂ ଆବାସିକ ସମ୍ପତ୍ତି ଉପରେ ଚଢ଼ାଉବେଳେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ୧.୯୭୮ କେଜି ସୁନା (ଯାହାର ମୂଲ୍ୟ ୧.୩ କୋଟି ଟଙ୍କା),୧୫ ଲକ୍ଷ ଟଙ୍କା ଓ ବିଭିନ୍ନ କାଗଜପତ୍ର ଜବତ କରିଛି। କଟକ ରୋଡ୍ରେ ଥିବା ସୁରନାଗ୍ ବିଲ୍ଡର୍ସ ପ୍ରାଇଭେଟ୍ ଲିମିଟେଡ୍ ଉପରେ ଚଢ଼ାଉ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି)। ଏହି ସମୟରେ ବହୁ କାଗଜପତ୍ର ଜବତ ମଧ୍ୟ କରାଯାଇଛି। ବ୍ୟାଙ୍କରୁ ସାଢ଼େ ୨୪କୋଟିରୁ ଅଧିକ ଟଙ୍କା ଠକେଇ ଘଟଣାରେ ଏହି ସଂସ୍ଥାର ଲିଙ୍କ୍ ମିଳିବା ପରେ ଚଢ଼ାଉ ହୋଇଥିଲା। ଖାଲି କଟକ ରୋଡ୍ରେ ନୁହେଁ ମୋଟ ୮ଟି ସ୍ଥାନରେ ଚଢ଼ାଉ ହୋଇଥିବା ଜଣାପଡ଼ିଛି। ଉଲ୍ଲେଖଯୋଗ୍ୟ, ୟୁନିୟନ ବ୍ୟାଙ୍କ ଅଫ୍ ଇଣ୍ଡିଆ(ୟୁବିଆଇ) ଭୁବନେଶ୍ୱର ଆଞ୍ଚଳିକ ଡେପୁଟି ଜେନେରାଲ ମ୍ୟାନେଜର ତଥା ତତ୍କାଳୀନ ଡେପୁଟି ଜେନେରାଲ ମ୍ୟାନେଜର ରୂପଲାଲ ମୀନାଙ୍କ ଅଭିଯୋଗ ଆଧାରରେ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ(ସିବିଆଇ)ରେ ତିନୋଟି ପୃଥକ୍ ମାମଲା ପଞ୍ଜୀକୃତ ହୋଇଥିଲା। ଅଭିଯୋଗ ଅନୁଯାୟୀ, ୟୁବିଆଇର ତିନିଜଣ ଅଧିକାରୀ ଭୁବନେଶ୍ୱର ମହାପାତ୍ର, ଅଶ୍ୱିନୀ କୁମାର ପାତ୍ର ଏବଂ ରାଜେଶ କୁମାର ପଟଙ୍ଗା କାଗଜ ପତ୍ର ଯାଞ୍ଚ ନ କରି ଏମ୍/ଏସ୍ ଜିଡିଏସ ବିଲ୍ଡର୍ସ ପ୍ରାଇଭେଟର ନିର୍ଦ୍ଦେଶକ ଏବଂ ସୁରାଙ୍ଗ ବିଲଡର୍ସ ଲିମିଟେଡ ପ୍ରରୋଚନାରେ ୪୪ଜଣଙ୍କ ନାମରେ ୨୦୧୭ରେ ୨୪.୧୭ କୋଟି ଟଙ୍କା ଗୃହ ବାବଦକୁ ଋଣ ମଞ୍ଜୁର କରିଥିଲେ। ତେବେ ପରେ ଦାଖଲ ହୋଇଥିବା କାଗଜ ପତ୍ର ଜାଲ୍ ବୋଲି ଜଣାପଡ଼ିବା ପରେ ସିବିଆଇରେ ଅଭିଯୋଗ ହୋଇଥିଲା। ଅଭିଯୋଗକୁ ଭିତ୍ତିକରି ସିବିଆଇ ବ୍ୟାଙ୍କ କର୍ମଚାରୀଙ୍କ ସମେତ ୫ଜଣଙ୍କୁ ଗିରଫ ୨୦୨୦ରେ ଗିରଫ କରିଥିଲା। ପରେ ଖୋଳତାଡ଼ କରି ଅଭିଯୁକ୍ତ ରିଅଲଟର୍ ଏବଂ ଅନ୍ୟମାନଙ୍କ ବିରୋଧରେ ଇଡି ଆଉ ଏକ ମାମଲା ରୁଜୁ କରିଥିଲା।
