ଭୁବନେଶ୍ୱର, ୧୩।୯(ବ୍ୟୁରୋ): ଜେଇଇ ମେନ୍ ପରୀକ୍ଷାରେ ଓଡ଼ିଶାର ସୌରଭ ସୌମ୍ୟକାନ୍ତ ଦାଶ ରାଜ୍ୟ ଟପ୍ପର ହୋଇଛନ୍ତି। ସେ ୯୯.୯୯ ପର୍ସେଣ୍ଟାଇଲ ରଖିବା ସହିତ ସର୍ବଭାରତୀୟ ସ୍ତରରେ ୧୨୮ ର଼୍ୟାଙ୍କ ହାସଲ କରିଛନ୍ତି। ନିଜର ସଫଳତାକୁ ନେଇ ସୌରଭ କହିଛନ୍ତି, କମ୍ପିଟିଶନ ବହୁତ ଟପ୍ ଥିଲା। ନିଜ ପାଠପଢ଼ାକୁ ଛାଡ଼ିଦେଲେ କେବଳ ଜେଇଇ ମେନ୍ ପାଇଁ ଏକ୍ସଟ୍ରା ୩ରୁ ୪ଘଣ୍ଟା ପାଠ ପଢ଼ୁଥିଲି। କେତେ ସମୟ ପାଠ ପଢ଼ିବା ଗୁରୁତ୍ୱପୂର୍ଣ୍ଣ ନୁହେଁ, ଯେତିକି ସମୟ ବି ପାଠ ପଢ଼ିବ ସେଥିରେ ପୂରା ମନ ଦେଇ ପଢ଼ିବା ଆବଶ୍ୟକ। ପୂର୍ବବର୍ଷର ପ୍ରଶ୍ନପତ୍ରକୁ ବହୁତ ଶୀଘ୍ର ପ୍ରାକ୍ଟିସ୍ କରିବା ଉଚିତ। ହାତସ୍ପିଡ୍ ଏପରି କରିଥିଲି ଯେପରିକି ପରୀକ୍ଷାରେ ଦିଆଯାଇଥିବା ସମୟରେ ମୁଁ ସବୁ ପ୍ରଶ୍ନର ଉତ୍ତର ଦେଇପାରିବି। ତେବେ ଭଲ ର଼୍ୟାଙ୍କ ପାଇଥିବାରୁ ବହୁତ ଖୁସି ଲାଗୁଛି। ଆଗକୁ ଥିବା ଜେଇଇ ଆଡ଼ଭାନ୍ସଡ ପାଇଁ ଏବେ ପ୍ରସ୍ତୁତ ହେଉଛି। ଜେଇଇ ମେନ୍ରେ ଶତ ପ୍ରତିଶତ ନମ୍ବର ରହିନାହିଁ, କିନ୍ତୁ ଜେଇଇ ଆଡ଼ଭାନ୍ସଡରେ ରଖିବା ପାଇଁ ଚେଷ୍ଟାକରିବି। ତେବେ ଆଇଆଇଟି ବମ୍ବେରେ କମ୍ପ୍ୟୁଟର ସାଇନ୍ସ ନେଇ ପଢ଼ିବାକୁ ଲକ୍ଷ୍ୟ ରଖିଥିବା ସୌରଭ କହିଛନ୍ତି।
ସେହିଭଳି ଓଡ଼ିଶାର ସ୍ଥିତିପ୍ରଜ୍ଞା ସାହୁ ୯୯.୯୮ ପର୍ସେଣ୍ଟାଇଲ ରଖି ରାଜ୍ୟର ଦ୍ୱିତୀୟ ଟପ୍ପର ହୋଇଛନ୍ତି। ସେ ସର୍ବଭାରତୀୟ ସ୍ତରରେ ୧୮୮ତମ ର଼୍ୟାଙ୍କ ହାସଲ କରିଛନ୍ତି। ଏଥିପାଇଁ ସେ ଖୁସି ବ୍ୟକ୍ତ କରି କହିଛନ୍ତି, ମୋତେ ରସାୟନ ବିଜ୍ଞାନ ଭଲ ଲାଗେ। କିନ୍ତୁ ସବୁ ବିଷୟକୁ ସମାନ ଭାବେ ପଢ଼ିବାକୁ ପଡ଼ିବ। ଜେଇଇ ଆଡ଼ଭାନ୍ସଡ ପାଇଁ ପ୍ରସ୍ତୁତ ହେଉଛି। ଭଲ ର଼୍ୟାଙ୍କ୍ ରହିଲେ ଆଇଆଇଟି ବମ୍ବେରେ ପଢ଼ିବା ପାଇଁ ଲକ୍ଷ୍ୟ ରଖିଛି।
