ମେଲବୋର୍ନ,୫।୬(ପି.ଟି.): କ୍ରିକେଟକୁ ପ୍ରତ୍ୟାବର୍ତ୍ତନ କରିବାକୁ ଯାଉଛନ୍ତି ଶ୍ରୀଲଙ୍କା କିମ୍ବଦନ୍ତୀ ବ୍ୟାଟ୍ସମ୍ୟାନ ସନଥ ଜୟସୁରିୟା। ଅନ୍ତର୍ଜାତୀୟ କ୍ରିକେଟ କାଉନସିଲ୍ (ଆଇସିସି) ଦ୍ୱାରା ଦୁଇ ବର୍ଷ ବାସନ୍ଦ ହେବା ପରେ ସେ କ୍ରିକେଟକୁ ଫେରି ମେଲବୋର୍ନ କ୍ଲବ ମୁଲଗ୍ରେଭ୍ର କୋଚ୍ ଦାୟିତ୍ୱ ତୁଲାଇବେ। ୨୦୧୯ରେ ଆଇସିସି ଦୁର୍ନୀତି ଆଚରଣ ବିଧି ଉଲ୍ଲଂଘନ କରି ଜୟସୁରିୟା ଦୁଇବର୍ଷ ବାସନ୍ଦ ହୋଇଥିଲେ।
ଶ୍ରୀଲଙ୍କା ପୂର୍ବତନ ଓପନର ତିଲକରତ୍ନେ ଦିଲସାନ ୫୧ ବର୍ଷୀୟ ଜୟସୁରିୟାଙ୍କୁ କୋଚ୍ ଦାୟିତ୍ୱ ନେବା ଲାଗି ବୁଝାଇବାରେ ସଫଳ ହୋଇଛନ୍ତି ବୋଲି ମୁଲଗ୍ରେଭ୍ ଅଧ୍ୟକ୍ଷ ମାଲିନ ପୁଲେନାୟେଗାମ କହିଛନ୍ତି। ଜୟସୁରିୟା କୋଚ୍ ହେଲେ ଆମ ଯୁବ ଖେଳାଳିମାନେ ଅନ୍ତର୍ଜାତୀୟ କ୍ରିକେଟ ବିଷୟରେ ବହୁତ କିଛି ଜାଣିବାକୁ ସକ୍ଷମ ହେବେ ବୋଲି ସେ କହିଛନ୍ତି। ମୁଲଗ୍ରେଭ୍ ପାଇଁ ଦିଲସାନ ଓ ତାଙ୍କ ପୂର୍ବତନ ଟିମ୍ ମେଟ୍ ଉପୁଲ ଥରଙ୍ଗା ଖେଳୁଛନ୍ତି। ଅନ୍ତର୍ଜାତୀୟ କ୍ରିକେଟରୁ ଏହି ଦୁଇ ଖେଳାଳି ଅବସର ନେଇ ସାରିଛନ୍ତି। ଜୟସୁରିୟା ଶ୍ରୀଲଙ୍କା ପାଇଁ ବିଶ୍ୱକପ୍ ଜିତିଛନ୍ତି। ସେ ୪୪୫ଟି ଦିନିକିଆ ଓ ୧୧୦ଟି ଟେଷ୍ଟ ଖେଳିଛନ୍ତି।
