ଘଣ୍ଟାପଡା,୧୭।୧୨ (ଡି.ଏନ୍.ଏ):ଗିନିଜ୍ ବୁକ୍ ଅଫ୍ ୱାଲର୍ଡ ରେକର୍ଡରେ ସ୍ଥାନ ପାଇଛନ୍ତି ବୌଦ୍ଧ ଜିଲା କଣ୍ଟାମାଳ ବ୍ଲକ ଆମ୍ବଗାଁର ୩୦ ବର୍ଷୀୟ ଯୁବ ଗବେଷକ ଜୟରାମ ରଣା। ଜୈବ ରାସାୟନିକ ଗବେଷକ ରଣା ବିଶ୍ୱର ସର୍ବବୃହତ୍ ସାରୁପତ୍ର ପ୍ରଦର୍ଶନ କରି ଗିନିଜ୍ ବୁକ୍ ଅଫ୍ ୱାଲର୍ଡ ରେକର୍ଡସ୍ରେ ସ୍ଥାନ ପାଇଛନ୍ତି।
ସୂଚନା ଅନୁସାରେ, ସେ ଏକଦା ନିଜ ଜିଲାର ପାହାଡ ଅଞ୍ଚଳରେ ଭ୍ରମଣ କରିବା ସମୟରେ ଏକ ସାରୁ ପୁଆ ପାଇଥିଲେ। ସେ ସାରୁକୁ ଆଣି ନିଜ ଘର କୂଅ ପାଖରେ ଲଗାଇ ବିଶେଷ ଚାଷ ପଦ୍ଧତି ଆପଣାଇ ଥିଲେ। ଏଥିସହ ଜୈବ ରାସାୟନିକ ଖତ ପ୍ରୟୋଗ କରି ସର୍ବବୃହତ୍ ସାରୁ ପତ୍ର ପ୍ରସ୍ତୁତ କରିବାରେ ସଫଳ ହୋଇଥିଲେ। ଏହି ସାରୁପତ୍ରର ଆକାର ୨୫ ଇଞ୍ଚ ଲମ୍ବ ଏବଂ ୨୯ ଇଞ୍ଚ ଚଉଡା ହୋଇଥିଲା। ଏହି ଆକାରକୁ ନେଇ ଗବେଷକ ରଣା ବିଶ୍ୱ ରେକର୍ଡ ପାଇଁ ଆବେଦନ କରିଥିଲେ। ତିନି ମାସ ପରେ ଗିନିଜ୍ ଓ୍ବାଲର୍ଡ୍ ରେକର୍ଡସ୍ ତରଫରୁ ତଦନ୍ତ ହୋଇ ସମସ୍ତ ତଥ୍ୟ ଠିକ୍ ଥିବାରୁ ରଣାଙ୍କ ଆବେଦନକୁ ଗ୍ରହଣ କରାଯାଇଥିଲା। ଗବେଷକ ରଣା ବୌଦ୍ଧ ଜିଲାର ପ୍ରଥମ ବ୍ୟକ୍ତି ଭାବେ ଗିନିଜ୍ ଓ୍ବାଲର୍ଡ ରେକର୍ଡସ୍ର ଅଧିକାରୀ ହୋଇ ପାରିଛନ୍ତି। ତାଙ୍କୁ ବିଭିନ୍ନ ମହଲରୁ ଶୁଭେଚ୍ଛା ବାର୍ତ୍ତା ମିଳିବାରେ ଲାଗିଛି। ଏହି ଗବେଷକଙ୍କ ହେଲ୍ଥ ସାଇନ୍ସ ରିସର୍ଚ୍ଚ ଫାଉଣ୍ଡେଶନ ନାମକ ଏକ ନିଜସ୍ବ ଲ୍ୟାବ ମଧ୍ୟ ଅଛି। ସେଥିରେ ସେ ଚିଫ୍ ଡାଇରେକ୍ଟର ଅଛନ୍ତି। ତାଙ୍କ ଲ୍ୟାବ୍ ସରକାରୀ ଲ୍ୟାବ୍ ସହ ମିଶି କାମ କରିବା ପାଇଁ ସବୁଜ ସଙ୍କେତ ମିଳିସାରିଛି। ସେ ବିଭିନ୍ନ ଫର୍ମୂଲା ଉପରେ ଗବେଷଣା କରୁଛନ୍ତି।
