ଯାଜପୁରରୋଡ୍,୨୨ା୧୦(ପବିତ୍ର ରଞ୍ଜନ ମହାନ୍ତି):ବ୍ୟାସନଗର ପୌର ପରିଷଦ ଅଧୀନ ୧୪ନଂ ୱାର୍ଡର ଚୋରଦା ଗ୍ରାମରେ ଥିବା ଜବାହର ଉଚ୍ଚ ପ୍ରାଥମିକ ବିଦ୍ୟାଳୟଟି ନାନା ସମସ୍ୟାଘେରରେ ରହିଛି। ୧୯୬୪ରେ ସ୍ଥାପିତ ଏହି ବିଦ୍ୟାଳୟର ରୂପରେଖ ଅଦ୍ୟାବଧି ବଦଳିନାହିଁ। ଏଠାରେ ୧ମରୁ ୮ମ ଶ୍ରେଣୀ ପର୍ଯ୍ୟନ୍ତ ୧୩୭ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ହେଲେ ଆବଶ୍ୟକୀୟ ଶ୍ରେଣୀଗୃହ ଓ ଶିକ୍ଷକ ନ ଥିବାରୁ ପାଠପଢ଼ାରେ ବ୍ୟାଘାତ ସୃଷ୍ଟି ହେଉଛି। ୮ଟି ଶ୍ରେଣୀକୁ ୫ ଆଜବେଷ୍ଟସ ଓ ୨ ଛାତ ଘର ରହିଛି। ଏହାମଧ୍ୟରେ ସ୍କୁଲ କାର୍ଯ୍ୟାଳୟ ଓ କମ୍ପ୍ୟୁଟର ଶିକ୍ଷା ପାଇଁ ୨ ବଖରା ରଖାଯାଇଛି। ଅନ୍ୟ ୫ ବଖରାରେ ଛାତ୍ରୀଛାତ୍ର ପାଠ ପଢ଼ିବାକୁ ଅସୁବିଧାର ସମ୍ମୁଖୀନ ହେଉଛନ୍ତି। ପ୍ରଧାନ ଶିକ୍ଷୟିତ୍ରୀଙ୍କୁ ମିଶାଇ ମୋଟ୍ ୪ ଶିକ୍ଷୟିତ୍ରୀ ଥିବାରୁ ପିଲାଙ୍କୁ ପୂର୍ଣ୍ଣାଙ୍ଗ ଶିକ୍ଷାଦେବାରେ ସେମାନେ ଅସଫଳ ହେଉଛନ୍ତି। କମ୍ପ୍ୟୁଟର ଶିକ୍ଷା ଦେବପାଇଁ କୌଣସି ପ୍ରଶିକ୍ଷକଙ୍କୁ ନିଯୁକ୍ତି ଦିଆଯାଇ ନ ଥିବାରୁ ବିଦ୍ୟାଳୟକୁ ଆସିଥିବା ୭ଟି କମ୍ପ୍ୟୁଟର ଅଚଳ ହୋଇପଡ଼ି ରହିଛି। ଛାତ୍ରୀଛାତ୍ର କମ୍ପ୍ୟୁଟର ଶିକ୍ଷାରୁ ବଞ୍ଚିତ ହେଉଛନ୍ତି। ଶ୍ରେଣୀ ଗୃହଗୁଡ଼ିକ ପୁରାତନ ହୋଇଥିବାରୁ ତାହା ବିପଦସଂକୁଳ ହୋଇପଡ଼ିଛି। ଆଜବେଷ୍ଟସଗୁଡ଼ିକ ଭାଙ୍ଗି ଯାଇଥିବାରୁ ଦିନରେ ସୂର୍ଯ୍ୟାଲୋକ ପଡୁଛି। ବର୍ଷାଦିନେ ପିଲା ଓଦା ହେବା ସହ ସେମାନଙ୍କ ବହିଖାତା ଓଦା ହୋଇ ନଷ୍ଟ ହେଉଥିବା ଅଭିଭାବକ ଅଭିଯୋଗ କରିଛନ୍ତି। ବିଦ୍ୟାଳୟରେ ଥିବା ଶୌଚାଳୟ ଗୁଳ୍ମଲତାରେ ପରିପୂର୍ଣ୍ଣ ଥିବାରୁ ଛାତ୍ରୀଛାତ୍ର ବାହାରେ ଶୌଚ ହେଉଛନ୍ତି। ବିଦ୍ୟାଳୟ ପରିସରରେ ପିଲାଙ୍କ ପାଇଁ ପିଇବା ପାଣିର ବ୍ୟବସ୍ଥା ନାହିଁ। ଫଳରେ ବିଦ୍ୟାଳୟ ବାହାରେ ଥିବା ଏକ ପାଣି ଟ୍ୟାପରୁ ପିଲାମାନେ ବହୁ ସମୟରେ ପାଣି ପିଉଛନ୍ତି। ବିଦ୍ୟାଳୟର ପାଚେରି ବହୁଦିନ ହେବ ଭାଙ୍ଗି ପଡ଼ିଥିବା ଯୋଗୁ ରାତିରେ ଅସାମାଜିକ କାର୍ଯ୍ୟକଳାପ ବୃଦ୍ଧି ପାଉଛି। ବିଦ୍ୟାଳୟ ପରିସରରେ ମଦବୋତଲ, ସିଗାରେଟ ଓ ଗୁଟ୍ଖା ଜରି ପଡ଼ିଥିବା ଦେଖିବାକୁ ମିଳୁଛି। ଏହା ଛାତ୍ରୀଛାତ୍ରଙ୍କ ଉପରେ କୁ ପ୍ରଭାବ ପକାଉଛି। ବିଦ୍ୟାଳୟ ପୂର୍ବପଟେ କୌଣସି ପାଚେରି ନ ଥିବାରୁ ନିକଟରେ ଏକ ପରିତ୍ୟକ୍ତ ପୋଖରୀ ପିଲାଙ୍କ ଜୀବନ ପ୍ରତି ବିପଦ ସୃଷ୍ଟି କରିଛି। ଅସାବଧାନତାବଶତଃ ଯଦି ଖେଳ କୁଦ ସମୟରେ ଉକ୍ତ ସ୍ଥାନକୁ କେହି ପିଲା ଚାଲିଯାଆନ୍ତି ତେବେ ଦୁର୍ଘଟଣାକୁ ଏଡାଇ ଦିଆଯାଇ ନ ପାରେ। ବିଦ୍ୟାଳୟର ବାହାର ପଟ ଗୁଳ୍ମ ଲତାରେ ପରିପୂର୍ଣ୍ଣ ଥିବାରୁ ତାହା ସରୀସୃପଙ୍କ ବାସସ୍ଥାନ ପାଲଟିଛି।
ମୋ ସ୍କୁଲ ଅଭିଯାନରେ ପୁରାତନ ଛାତ୍ର ଓ ଶିକ୍ଷୟିତ୍ରୀମାନେ ମିଶି କିଛି ଅର୍ଥ ସଂଗ୍ରହ କରିଛନ୍ତି। ସେଥିରେ ପାଚେରି ନିର୍ମାଣ କରିବାକୁ ନିଷ୍ପତ୍ତି ହୋଇଛି ବୋଲି ପ୍ରଧାନଶିକ୍ଷୟିତ୍ରୀ ତପସ୍ବିନୀ ଜେନା କହିଛନ୍ତି। ଅନ୍ୟପକ୍ଷରେ ରାଜ୍ୟ ସରକାର ୫-ଟି ମାଧ୍ୟମରେ ବିଦ୍ୟାଳୟଗୁଡ଼ିକର ରୂପାନ୍ତରଣ କରୁଥିବାବେଳେ ଏହି ବିଦ୍ୟାଳୟ ଅବସ୍ଥା ପ୍ରତି ଜିଲା ଶିକ୍ଷା ବିଭାଗ ଓ ପୌର କର୍ତ୍ତୃପକ୍ଷ ଉଦାସୀନ ରହିବା ପ୍ରଶ୍ନବାଚୀ ସୃଷ୍ଟି କରିଛି। ସମସ୍ୟାଗୁଡ଼ିକ ସମ୍ପର୍କରେ ଅଭିଭାବକ ବିଦ୍ୟାଳୟ କର୍ତ୍ତୃପକ୍ଷଙ୍କୁ ଅବଗତ କରୁଥିଲେ ସୁଦ୍ଧା କୌଣସି ସୁଫଳ ମିଳୁନାହିଁ। ଫଳରେ ଏହାକୁ ନେଇ ଅଭିଭାବକଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି। ଏ ସମ୍ପର୍କରେ କୋରେଇ ବ୍ଲକ ଶିକ୍ଷାଧିକାରୀ ସୁଦର୍ଶନ ମଲିକଙ୍କୁ ପଚାରିବାରେ ସେ କହିଛନ୍ତି, ପୂଜା ଛୁଟି ପରେ ଲେବୁଲ-୩ ପଦୋନ୍ନତି ଦିଆଯାଇ ଜଣେ ପ୍ରଧାନ ଶିକ୍ଷକ ଓ ଜଣେ ବି.ଏଡ୍ ଶିକ୍ଷକଙ୍କୁ ସେଠାରେ ନିଯୁକ୍ତି ଦିଆଯିବ। ଏହାବାଦ ବିଦ୍ୟାଳୟର ଅନ୍ୟ ସମସ୍ୟା ଉପରେ ପ୍ରଧାନଶିକ୍ଷୟିତ୍ରୀ ତାଙ୍କୁ ଚିଠି ମଧ୍ୟମରେ ଜଣାଇଲେ ସେ ବ୍ୟାସନଗର ପୌର କାର୍ଯ୍ୟନିର୍ବାହୀ ଅଧିକାରୀଙ୍କୁ ସମସ୍ୟାର ସମାଧାନ ପାଇଁ ଚିଠି ଲେଖିବେ ବୋଲି ପ୍ରକାଶ କରିଛନ୍ତି।
