ଟୋକିଓ,୨୪।୧୧: ଜାପାନରେ ଏକ ଅଜବ ନିୟମ ଲାଗୁ ହେବାକୁ ଯାଉଛି। ନିୟମ ଅନୁଯାୟୀ ସ୍ତ୍ରୀ-ସ୍ବାମୀଙ୍କର ସମାନ ସାଙ୍ଗିଆ ରହିବ ନାହିଁ। ଜାପାନର ପ୍ରଧାନମନ୍ତ୍ରୀ ୟୋଶିହିଦା ସୁଗା ପୂର୍ବ ନିୟମ ବଦଳାଇ ଖୁବ୍ଶୀଘ୍ର ନୂଆ ନିୟମ ଲାଗୁ କରିବା ସପକ୍ଷରେ ଅଛନ୍ତି। ଏଥିପାଇଁ ପ୍ରସ୍ତୁତି ଆରମ୍ଭ ହୋଇଯାଇଛି। ପୂର୍ବ ନିୟମ ଅନୁଯାୟୀ ଜାପାନରେ ବିବାହ ପୂର୍ବରୁ ଯଦି ଉଭୟ ସାଙ୍ଗିଆ ଅଲଗା ଥାଏ, ତେବେ ବିବାହ ପରେ ଜଣଙ୍କୁ ଆପୋସ ବୁଝାମଣା କରିବାକୁ ପଡୁଥିଲା। ସ୍ତ୍ରୀ-ସ୍ବାମୀଙ୍କ ମଧ୍ୟରୁ ଜଣଙ୍କୁ ନିଜ ନାମ ଆଗରେ ଅନ୍ୟ ଜଣଙ୍କର ସାଙ୍ଗିଆ ରଖିବାକୁ ପଡୁଥିତ୍ଲା। ଏଥିରେ ସ୍ତ୍ରୀଙ୍କୁ ଅଧିକାଂଶ କ୍ଷେତ୍ରରେ ଆପୋସ ବୁଝାମଣା କରିବାକୁ ପଡୁଥିଲା ଏବଂ ସେମାନେ ସ୍ବାମୀଙ୍କ ସାଙ୍ଗିଆ ବ୍ୟବହାର କରୁଥିଲେ। କିନ୍ତୁ ଏବେ ସ୍ବାମୀ ଏବଂ ସ୍ତ୍ରୀ ଏହି ନିୟମରୁ ମୁକ୍ତି ପାଇପାରିବେ। ୟୋଶିହିଦା ସୁଗା ତାଙ୍କ ଦେଶବାସୀଙ୍କୁ ଆଶ୍ୱାସନା ଦେଇଛନ୍ତି ଯେ ସେ ଏହି ନିୟମ ପରିବର୍ତ୍ତନ କରିବେ। ସୂଚନାଯୋଗ୍ୟ, ଏହି ନିୟମ ଜାପାନରେ ମହିଳା ବିରୋଧୀ ଆଇନ ଭାବରେ ବିବେଚନା କରାଯାଉଛି। ଏଥିସହ ମହିଳାଙ୍କ ପ୍ରତି ହେଉଥିବା ହିଂସାକୁ ଦୂର କରିବା ପାଇଁ ମିଳିତ ଜାତିସଂଘ କମିଟି ମଧ୍ୟ ଜାପାନର ନିଷ୍ପତ୍ତିକୁ ସମର୍ଥନ କରିଛି। ନିକଟରେ ଜାପାନରେ ଏକ ସର୍ଭେରୁ ଜଣାପଡିଛି ଯେ ଜାପାନର ଅଧିକାଂଶ ଲୋକ ବିବାହ ପରେ ମଧ୍ୟ ସେମାନଙ୍କର ସାଙ୍ଗିଆ ବଜାୟ ରଖିବା ସପକ୍ଷରେ ଅଛନ୍ତି। ସୂଚନା ଅନୁଯାୟୀ, ଏହି ସର୍ଭେରେ ୬୦ ବର୍ଷରୁ କମ ଲୋକଙ୍କୁ ସାଙ୍ଗିଆ ପରିବର୍ତ୍ତନ ବିଷୟରେ ପଚରାଯାଇଥିଲା। ସେଥିମଧ୍ୟରୁ ୭୦.୬ ପ୍ରତିଶତ ଲୋକ କହିଛନ୍ତି ଯେ ସେମାନଙ୍କ ଜୀବନସାଥୀଙ୍କ ସାଙ୍ଗିଆ ଭିନ୍ନ ହେଲେ କୌଣସି ଅସୁବିଧା ହେବ ନାହଁି। ଏଥିସହିତ ୧୪.୪ ପ୍ରତିଶତ ଲୋକ ବିଶ୍ୱାସ କରନ୍ତି ଯେ ସ୍ବାମୀ-ସ୍ତ୍ରୀଙ୍କ ସାଙ୍ଗିଆ ସମାନ ହେବା ଉଚିତ।
