ଅସହାୟଙ୍କୁ ସାହାଯ୍ୟ କରିବା ଓ ରୋଗୀଙ୍କୁ ରକ୍ତ ଅଭାବ ଦୂର କରିବା ତାଙ୍କର ମୂଳ ଲକ୍ଷ୍ୟ। ଯାହାକୁ ଆଧାର କରି ଆଜକୁ ଦୀର୍ଘ ୯ ବର୍ଷ ଧରି ବ୍ରହ୍ମପୁର ସହରର ଜୟ ଜଗନ୍ନାଥ ଗ୍ରୁପ ଓଡ଼ିଶା ବିଭିନ୍ନ ସ୍ବେଚ୍ଛାସେବୀ କାର୍ଯ୍ୟରେ ନିୟୋଜିତ ଅଛନ୍ତି। ଏହାର ପ୍ରତିଷ୍ଠାତା ଶିବ ଶଙ୍କର ଦାଶ ପ୍ରଥମ କରି ୨୦୧୧ ମସିହାରେ ଲୋକଙ୍କୁ ସହାୟତା କାର୍ଯ୍ୟ ଆରମ୍ଭ କରିଥିଲେ। ସମୟକ୍ରମେ ସେ ରକ୍ତଦାନ ଶିବିର ଓ ପୁରୁଣା ବସ୍ତ୍ର ବଣ୍ଟନ ଭଳି କାର୍ଯ୍ୟରେ ନିୟୋଜିତ ହୋଇଥିଲେ। ଧିରେ ଧିରେ ସମାଜରେ ଆର୍ଥିକ ଅନଗ୍ରସର ଓ ଅସହାୟ ଲୋକଙ୍କୁ ମଧ୍ୟ ସହାୟତା କରିବା ପାଇଁ ମନ ବଳାଇଥିଲେ। ଏହାପରେ ସେ ୨୦୧୪ ମସିହାରେ ଜୟ ଜଗନ୍ନାଥ ଗ୍ରୁପ ଓଡ଼ିଶା ପ୍ରତିଷ୍ଠା କରିଥିଲେ। ବର୍ତ୍ତମାନ ରାଜ୍ୟର ୧୪ଟି ଜିଲାରେ ଏହି ଗ୍ରୁପ ଦ୍ୱାରା ବିଭିନ୍ନ ସାମାଜିକ କାର୍ଯ୍ୟକ୍ରମ କରାଯାଉଥିବା ସେ କହିଛନ୍ତି। ଏଥିସହ ଆନ୍ଧ୍ରପ୍ରଦେଶ ସମେତ ଛତିଶଗଡ଼ରେ ମଧ୍ୟ ୨ଟି ଟିମ୍ ଓ ମୁମ୍ବାଇରେ କ୍ଲବ୍ ପକ୍ଷରୁ ସେବା କାର୍ଯ୍ୟ ଜାରି ରହିଛି। ଗ୍ରୁପ ପକ୍ଷରୁ ଖାଦ୍ୟ ବଣ୍ଟନ, ଶବ ସତ୍କାର, ରକ୍ତଦାନ, ରାସ୍ତା କଡ଼ରେ ଅସହାୟଙ୍କୁ ଖାଦ୍ୟ ବଣ୍ଟନ, ଦିବ୍ୟାଙ୍ଗ ଲୋକଙ୍କୁ ସହାୟତା ଓ କୋଭିଡ୍ ସହାୟତା ଭଳି କାର୍ଯ୍ୟ କରାଯାଇଛି। ଗ୍ରୁପ ପକ୍ଷରୁ ପ୍ରାୟ ୭ରୁ ୮ ଜଣ ଗରିବ ପିଲାଙ୍କ ପାଠପଢ଼ା ଖର୍ଚ୍ଚ ବହନ କରାଯାଉଛି। ଏଥିସହ ୫ରୁ ୬ ଜଣ ଅଭାବି ଝିଅଙ୍କ ବିବାହ କାର୍ଯ୍ୟ ମଧ୍ୟ କରିଛନ୍ତି। କୋଭିଡ୍ ମହାମାରୀ ସମୟରେ ୪୦ରୁ ଊର୍ଦ୍ଧ୍ୱ ଶବ ସତ୍କାର ସହ ଅସହାୟଙ୍କୁ କୋଭିଡ୍ ସହାୟତା ମଧ୍ୟ ପ୍ରଦାନ କରିଛନ୍ତି। ଦିବ୍ୟାଙ୍ଗ ଲୋକଙ୍କୁ ବ୍ୟବସାୟ ନିମନ୍ତେ ସହାୟତା ପ୍ରଦାନ କରୁଛନ୍ତି। ଗ୍ରୁପ ପକ୍ଷରୁ ଦୁର୍ଘଟଣାରେ ଆହତଙ୍କୁ ଚିକିତ୍ସା, ମାନସିକ ଅନଗ୍ରସର ରୋଗୀଙ୍କୁ ଚିକିତ୍ସା, କ୍ୟାନ୍ସର ଓ ଟ୍ୟୁମର ରୋଗୀଙ୍କ ସମସ୍ତ ଚିକିତ୍ସା ଖର୍ଚ୍ଚ ବହନ କରାଯାଇ ସେମାନଙ୍କ ଉପଶମ ମଧ୍ୟ କରାଯାଉଛି। ଏପରିକି କୋଭିଡ୍ ମହାମାରୀ ସମୟରେ ଜାତୀୟ ରାଜପଥରେ ପ୍ରବାସୀ ଶ୍ରମିକଙ୍କୁ ଖାଦ୍ୟ ବଣ୍ଟନ ମଧ୍ୟ କରାଯାଇଛି। ଅନ୍ୟପଟେ କୌଣସି ରୋଗୀଙ୍କୁ ଯେଭଳି ରକ୍ତ ଅଭାବ ନ ହୁଏ, ସେ ଉଦ୍ଦେଶ୍ୟରେ ଗ୍ରୁପ ପକ୍ଷରୁ ଜିଲାର ବିଭିନ୍ନ ପ୍ରାନ୍ତରେ ଶିବିର ମାଧ୍ୟମରେ ପ୍ରତି ମାସରେ ୨୦୦ ୟୁନିଟ ରକ୍ତ ସଂଗ୍ରହ କରାଯାଇଥାଏ ବୋଲି ପ୍ରତିଷ୍ଠାତା କହିଛନ୍ତି। ଆଗାମୀ ଦିନରେ ଶ୍ରୀମନ୍ଦିର ସେବାଶ୍ରମ ମାଧ୍ୟମରେ ଏକ ଆଶ୍ରମ ନିର୍ମାଣ କରି ସେଠାରେ ବୃଦ୍ଧ ଲୋକ, ଅନାଥ ଶିଶୁ, ମାନସିକ ଅନଗ୍ରସର, ପଶୁ ସୁରକ୍ଷା ପାଇଁ ପଦକ୍ଷେପ ଗ୍ରହଣ କରାଯିବ ବୋଲି ଗ୍ରୁପ ପକ୍ଷରୁ କୁହାଯାଇଛି।
-ସ୍ମୃତି ରଞ୍ଜନ ମହାଲିକ୍
