ମ.ରାମପୁର,୬ା୨(ଡି.ଏନ୍.ଏ.): କନ୍ଧମାଳ ସୀମାନ୍ତ କଳାହାଣ୍ଡି ଜିଲା ମ. ରାମପୁର ବ୍ଲକର ମୋହନଗିରି, ବାରବନ୍ଧା, ଉର୍ଲାଦାନୀ, ମାଣିକେରା ଆଦି ଅଞ୍ଚଳରେ ଗତ ୪ରୁ ୫ ବର୍ଷ ହେଲା ମାଓବାଦୀଙ୍କ ଗତିବିଧି ସକ୍ରିୟ ରହିଛି। ଏହାକୁ ରୋକିବା ପାଇଁ ଉପରୋକ୍ତ ଅଞ୍ଚଳରେ ନିୟମିତ ବିଏସଏଫ, ସିଆରପିଏଫ, ଆଇଆରବିଏନ ଯବାନମାନେ ମିଳିତ କମ୍ବିଂ ଅପରେଶନ କରି ଆସୁଛନ୍ତି । ଏହାଛଡା ମ.ରାମପୁର ବ୍ଲକ ଅଞ୍ଚଳରେ ଗତ ଏକ ଦଶନ୍ଧି ଧରି ମ.ରାମପୁର ସଦର ମହାକୁମାଠାରେଠାରୁ ୨୯ କ.ମି. ଦୂର ମୋହନଗିରି ଏବଂ ମ. ରାମପୁର ସହରଠାରୁ ୧୫ କି.ମି.ଦୂର ଉର୍ଲାଦାନୀ,(ଏନ୍ଏଚ୍-୫୯)ରେ ୩ଟି ସିଆର୍ପିଏଫ, ବିଏସ୍ଏଫ କ୍ୟାମ୍ପ ରହିଛି। ଏହାସତ୍ତ୍ୱେ ମ.ରାମପୁର-ମୋହନଗିରି ମୁଖ୍ୟ ରାସ୍ତାରେ ମାଓବାଦୀମାନେ ଶନିବାର ଦିନ ଦ୍ୱିପ୍ରହରରେ ଲ୍ୟାଣ୍ଡ ମାଇନ ବିସ୍ଫୋରଣ କରିବା ଘଟଣା କୋକୁଆ ଭୟ ସୃଷ୍ଟି କରିଛି।
ସୂଚନାଯୋଗ୍ୟ ଚଳିତବର୍ଷ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ସମୟରେ ମ. ରାମପୁର ଅଞ୍ଚଳରେ ଆଦିବାସୀ ବର୍ଗଙ୍କ ସଂରକ୍ଷଣ ପ୍ରତି ଉପେକ୍ଷା କରାଯାଇଛି। ସେହିପରି ମୋହନଗିର, ମାଣିକେରା ଓ ଉର୍ଲାଦାନୀ ଆଦି ପଞ୍ଚାୟତରେ ଗମନାଗମନ, ସ୍ବାସ୍ଥ୍ୟ, ଶିକ୍ଷା, ପାନୀୟ ଜଳ ସଙ୍କଟ ଲାଗି ରହିଛି। ତେଣୁ ମାଓବାଦୀମାନେ ଏହାକୁ ଆଳ କରି ସକ୍ରିୟ ରହିଥିବା କୁହାଯାଉଛି। ଆଗକୁ ପଞ୍ଚାୟତ ନିର୍ବାଚନ। ମୁଖ୍ୟ ରାସ୍ତାରେ ବିସ୍ଫୋରଣ ଘଟି ଧରିତ୍ରୀର ମୋହନଗିରି ଅଞ୍ଚଳର ଖବରଦାତା ରୋହିତ ବିଶ୍ୱାଳ ପ୍ରାଣ ହରାଇବା ପରେ ନିର୍ବାଚନକୁ ନେଇ ପାହାଡ ଅଞ୍ଚଳର ଲୋକଙ୍କ ମଧ୍ୟରେ ଭୟର ବାତାବରଣ ଦେଖାଦେଇଛି।
ଏପରିକି ୨୦୧୯ରେ ଉର୍ଲାଦାନୀ ଅଞ୍ଚଳରେ ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନାରେ କାର୍ଯ୍ୟରତ ଠିକାସଂସ୍ଥାର ଦୁଇଟି ଜେସିବି ମେଶିନ ଓ ଦୁଇଟି ଟ୍ରାକ୍ଟରକୁ ମାଓବାଦୀମାନେ ପୋଡି ଦେଇଥିଲେ ା ଅପରପକ୍ଷରେ ମୋହନଗିରି ପାର୍ବତ୍ୟାଞ୍ଚଳରେ ଗଞ୍ଜେଇ ଚାଷ ହେଉଛି। ଗଞ୍ଜେଇ ବେପାରୀମାନେ ସକ୍ରିୟ ରହିଛନ୍ତି। ଏସ୍ପିଙ୍କ ସୂଚନା ଅନୁଯାୟୀ ଏହାମଧ୍ୟରେ ଗଞ୍ଜେଇ ଚାଷ ସମ୍ପର୍କିତ ଏକ ମାମଲା ରୁଜୁ କରି ଅଭିଯୁକ୍ତମାନଙ୍କୁ ଗିରଫ କରି କୋର୍ଟ ଚଳାଣ କରାଯାଇଛି। ଏହାସତ୍ତ୍ୱେ ଗଞ୍ଜେଇ ଚାଷ ଅବାଧରେ ଚାଲିଛି।
