ଭୁବନେଶ୍ୱର,୩୧।୧୦(ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି) ଅଞ୍ଚଳରେ ଭୂମିହୀନଙ୍କୁ ଭୂମି ତଥା ବାସସ୍ଥାନ ପ୍ରଦାନ ନିମନ୍ତେ ରାଜ୍ୟ ସରକାରଙ୍କ ‘ଜାଗା ମିଶନ’କୁ କାର୍ଯ୍ୟକାରୀ କରାଯାଇଛି। ଏନେଇ ପ୍ରକୃତ ହିତାଧିକାରୀ ଚୟନ ପାଇଁ ଚୂଡ଼ାନ୍ତ ସର୍ଭେ ଖୁବ୍ଶୀଘ୍ର ଆରମ୍ଭ ହେବାକୁ ଯାଉଛି। ଏହି ଯୋଜନାରେ ହିତାଧିକାରୀଙ୍କୁ ୩୫ରୁ ୪୫ ବର୍ଗ ଫୁଟ୍ ଜାଗା ଆବଣ୍ଟନ କରାଯିବ। ସହରର ୪୩୬ଟି ବସ୍ତିର ୯୦ ହଜାର ୧୦୩ ପରିବାରକୁ ଜାଗା ମିଶନ ଅଧୀନରେ ବିଚାରକୁ ନିଆଯାଇଥିଲେ ମଧ୍ୟ ଚୂଡ଼ାନ୍ତ ସର୍ଭେ ପରେ ପ୍ରକୃତ ଭୂମିହୀନଙ୍କୁ ଜାଗା ପ୍ରଦାନ କରାଯିବ। ଜାଗା ମିଶନ ଅଧୀନରେ କେତେକ ବସ୍ତିର ଉନ୍ନତିକରଣ କରାଯାଉଥିବାବେଳେ ୧୦ଟି ବସ୍ତିକୁ ବିଜୁ ଆଦର୍ଶ କଲୋନୀରେ ପରିଣତ କରିବାକୁ ଯୋଜନା ରହିଛି। ଏଥିସହ ଚିହ୍ନଟ ହିତାଧିକାରୀଙ୍କୁ ଅନ୍ୟତ୍ର ମଧ୍ୟ ଭୂମି ଯୋଗାଇ ଦିଆଯିବ। ତେଣୁ ଏହି ତାଲିକାରେ ସାମିଲ ହେବାକୁ ଏବେଠୁ ଭୂମିହୀନ ବସ୍ତିବାସିନ୍ଦାଙ୍କ ମଧ୍ୟରେ ତତ୍ପରତା ପ୍ରକାଶ ପାଇଛି। ସହରରେ ଥିବା ଅନେକ ବସ୍ତିବାସିନ୍ଦା ଏବେ ମଧ୍ୟ ମୌଳିକ ସୁବିଧାରୁ ବଞ୍ଚତ୍ତ ରହିଛନ୍ତି। ବସ୍ତି ଉଚ୍ଛେଦ ସେମାନଙ୍କ ସ୍ଥିତିକୁ ବିଗାଡି ଦେଉଥିବାବେଳେ ମୁଣ୍ଡ ଉପରୁ ଛାତ ଯେ କେତେବେଳେ ଉଠିଯିବ ସେନେଇ ଚିନ୍ତାରେ ଦିନ କାଟୁଛନ୍ତି। ଏପରିସ୍ଥିତିରେ ଜାଗା ମିଶନ ସେମାନଙ୍କୁ ଆଶ୍ୱସ୍ତି ଦେଇଥିଲେ ମଧ୍ୟ ଭୂମିଟିଏ ପାଇବା ନେଇ ଆଶଙ୍କା ଭିତରେ ରହିଛନ୍ତି। ହିତାଧିକାରୀ ଚୟନରେ ପ୍ରିୟାପ୍ରୀତି ତୋଷଣ, ଟଙ୍କା କାରବାର, ରାଜନୈତିକ ହସ୍ତକ୍ଷେପ ଓ ଅନିୟମିତତା ଦୃଷ୍ଟି ଦେବାକୁ ବସ୍ତିବାସିନ୍ଦା ଦାବି କରିଛନ୍ତି।
