ମୁମ୍ବାଇ: ବଲିଉଡ୍ ନାୟିକା ଜ୍ୟାକଲିନ ଫର୍ଣ୍ଣାଡିଜଙ୍କ ଜନ୍ମ ୧୧ ଅଗଷ୍ଟ ୧୯୮୫ରେ ହୋଇଥିଲା। ଏବେ ଏହି ନାୟିକା ୩୫ ବର୍ଷରେ ପଦାର୍ପଣ କରିଛନ୍ତି। ଖୁବ୍ କମ୍ ସମୟ ମଧ୍ୟରେ ବଲିଉଡ୍ରେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି ଜ୍ୟାକଲିନ। ଭଲଭାବେ ହିନ୍ଦୀ କହିପାରୁ ନ ଥିଲେ ମଧ୍ୟ ଆଜି ସେ ଜଣେ ଆଗଧାଡିର ନାୟିକା ପାଲଟି ଯାଇଛନ୍ତି। ତାଙ୍କର ଜନ୍ମ ବାହାରିନରେ ହୋଇଥିଲା। ସେଠାରେ ସେ ବଡ ହୋଇଥିବା ବେଳେ ୨୦୦୬ରେ ସେ ମିସ୍ ଶ୍ରୀଲଙ୍କା ୟୁନିଭର୍ସ ମୁକୁଟ ପିନ୍ଧିଥିଲେ। ଆଉ ୨୦୦୯ରେ ସେ ବଲିଉଡ୍ରେ ପାଦ ରଖିଥିଲେ। ଜ୍ୟାକଲିନଙ୍କ ପିତା ଶ୍ରୀଲଙ୍କା ବାସିନ୍ଦା ହୋଇଥିବା ବେଳେ ସେ ଜଣେ ମ୍ୟୁଜିସିୟାନ। ତାଙ୍କ ମା ମାଲେସିୟା ବାସିନ୍ଦା ଓ ସେ ବୃତ୍ତିରେ ଜଣେ ଏୟାର ହୋଷ୍ଟେସ୍। ଚାରି ଭାଇଭଉଣୀଙ୍କ ମଧ୍ୟରେ ଜ୍ୟାକଲିନ ସବୁଠାରୁ ସାନ। ପ୍ରଥମରୁ ହିଁ ଜ୍ୟାକଲିନ ଅଭିନୟରେ ରୁଚି ରଖିଥିଲେ। ବାହାରିନରେ ଥିବା ସମୟରେ ସେ ମାତ୍ର ୧୪ ବର୍ଷ ବୟସରେ ଏକ ଶୋ’ରେ ହୋଷ୍ଟ ଭାବେ ନଜର ଆସିଥିଲେ। ପିଲାଟି ଦିନରୁ ଅଭିନୟରେ ରୁଚି ଥିବାରୁ ସେ ଜନ୍ ସ୍କୁଲ ଅଫ୍ ଆକ୍ଟିଙ୍ଗରେ କିଛି ସମୟ ପାଇଁ ଶିକ୍ଷା ଗ୍ରହଣ କରିଥିଲେ। ଆଉ ସବୁବେଳେ ଅପେକ୍ଷା ରଖୁଥିଲେ କେବେ ସେ ଫିଲ୍ମ ଷ୍ଟାର ହେବେ। ୟୁନଭର୍ସିଟି ଅଫ୍ ସିଡନୀରେ ମାସ୍ କମ୍ୟୁନିକେଶନରେ ଗ୍ରାଜୁଏଶନ କରିଛନ୍ତି ଜ୍ୟାକଲିନ। ଏହାପରେ ପରେ ସେ ଶ୍ରୀଲଙ୍କାରେ ଏକ ଟେଲିଭିଜନ ନ୍ୟୁଜ ଚ୍ୟାନେଲରେ ରିପୋର୍ଟରେ ଭାବେ କାମ ଆରମ୍ଭ କରିବା ସହ ମଡଲିଂ ମଧ୍ୟ ଆରମ୍ଭ କରି ଦେଇଥିଲେ। ୨୦୦୯ରେ ଏକ ମଡଲିଂ ଆସାଇମେଣ୍ଟ ପାଇଁ ସେ ଭାରତ ଆସିଥିବା ବେଳେ ନିର୍ଦ୍ଦେଶକ ସୁଜୟ ଘୋଷଙ୍କ ସହ ତାଙ୍କର ଦେଖା ହୋଇଥିଲା। ସେଠାରେ ସେ ‘ଆଲାଦିନ’ପାଇଁ ଅଡିଶନ ଦେଇ ଏକାଥରେ ସିଲେକ୍ଟ ହୋଇ ଯାଇଥିଲେ। ଏହାଥିଲା ଜ୍ୟାକଲିନଙ୍କ ପ୍ରଥମ ଫିଲ୍ମ। ଏହାପରେ ସେ ୨୦୧୧ରେ ‘ମର୍ଡର ୨’ ଫିଲ୍ମ ମାଧ୍ୟମରେ ଦର୍ଶକଙ୍କ ନିକଟତର ହୋଇଥିଲେ। ଏହାପରେ ଗୋଟିଏ ପରେ ଗୋଟିଏ ହିଟ୍ ଫିଲ୍ମ ଭେଟି ଦେଉଥିବା ଜ୍ୟାକଲିନଙ୍କୁ ଦେଖିବାକୁ ମିଳିଲା ସଲମାନଙ୍କ ଖାଁଙ୍କ ଅପୋଜିଟରେ ଫିଲ୍ମ ‘କିକ’ରେ। ଏଥିରେ ତାଙ୍କ ଅଭିନୟକୁ ଦର୍ଶକେ ବେଶ୍ ପସନ୍ଦ କରିଥିବା ବେଳେ ଏହାପରେ ସଲମାନଙ୍କ ସହ ତାଙ୍କ ପ୍ରେମ ସମ୍ପର୍କକୁ ନେଇ ଆଲୋଚନା ବି ହୋଇଥିଲା।
