ଲଣ୍ଡନ,୨୮।୬: ଚଳିତ ୟୁରୋକପ୍ ଫୁଟ୍ବଲ ଟୁର୍ନାମେଣ୍ଟରେ ଚେକ୍ ଗଣରାଜ୍ୟ ଓ ଇଟାଲୀ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ରବିବାର ଅନୁଷ୍ଠିତ ରାଉଣ୍ଡ ଅଫ୍ ୧୬ର ପ୍ରଥମ ମ୍ୟାଚ୍ରେ ଚେକ୍ ଗଣରାଜ୍ୟ ୨-୦ ଗୋଲରେ ନେଦରଲାଣ୍ଡ୍ସକୁ ହରାଇ ବିପର୍ଯ୍ୟୟ ଘଟାଇବା ସହ କ୍ୱାର୍ଟରକୁ ଉଠିଛି। ପ୍ରଥମାର୍ଦ୍ଧରେ ନେଦରଲାଣ୍ଡ୍ସ କେତୋଟି ସୁବର୍ଣ୍ଣ ସୁଯୋଗ ହରାଇଥିଲା। ସେଣ୍ଟର ବ୍ୟାକ୍ ମାଥିସ୍ ଡି ଲିଟ୍ ୫୫ତମ ମିନିଟ୍ରେ ରେଡକାର୍ଡ ପାଇ ପଡିଆ ବାହାରକୁ ଯାଇଥିଲେ। ଏହାର ପ୍ରଭାବ ନେଦରଲାଣ୍ଡ୍ସ ପ୍ରଦର୍ଶନ ଉପରେ ପଡିଥିଲା। ଚେକ୍ ଗଣରାଜ୍ୟ ତରଫରୁ ଟୋମାସ ହୋଲ୍ସ ୬୮ ଓ ପାଟ୍ରିକ୍ ସିକ୍ ୮୦ତମ ମିନିଟ୍ରେ ଗୋଲ ଦେଇ ଦଳକୁ ୨-୦ରେ ଅଗ୍ରଣୀ କରାଇଥିଲେ। ଏହାପରେ ଯଥାସମ୍ଭବ ପ୍ରୟାସ କରିଥିଲେ ମଧ୍ୟ ନେଦରଲାଣ୍ଡ୍ସ ଗୋଲ ଦେଇପାରି ନ ଥିଲା। ଫଳରେ ଚେକ ଗଣରାଜ୍ୟ ବିଜୟୀ ହୋଇଥିଲା। ଶନିବାର ଇଟାଲୀ ୨-୧ ଗୋଲରେ ଅଷ୍ଟ୍ରିଆକୁ ପରାସ୍ତ କରି କ୍ୱାର୍ଟରକୁ ଉନ୍ନୀତ ହୋଇଛି। ଏହାପୂର୍ବରୁ ପ୍ରଥମ ମ୍ୟାଚ୍ରେ ଡେନମାର୍କ ୪-୦ ଗୋଲ ଓ୍ବେଲ୍ସକୁ ହରାଇ ପ୍ରଥମଦଳ ଭାବେ କ୍ୱାର୍ଟର ଫାଇନାଲରେ ପ୍ରବେଶ କରିଥିଲା। ସ୍ଥାନୀୟ ଓ୍ବିମ୍ବଲେ ଷ୍ଟାଡିୟମରେ ଅଷ୍ଟ୍ରିଆକୁ ହରାଇବା ପାଇଁ ଇଟାଲୀକୁ ଖୁବ୍ ସଂଘର୍ଷ କରିବାକୁ ପଡିଥିଲା। ଅତିରିକ୍ତ ସମୟରେ ଇଟାଲୀ ତରଫରୁ ବିଜୟ ସୂଚକ ଗୋଲ ଦିଆଯାଇଥିଲା। ପ୍ରଥମ ଥର ପାଇଁ ଅଷ୍ଟ୍ରିଆ ଗ୍ରୁପ୍ ପର୍ଯ୍ୟାୟରେ ପ୍ରବେଶ କରିଥିଲା। ଏହାପୂର୍ବରୁ ପ୍ରତିଥର ଅଷ୍ଟ୍ରିଆ ଗ୍ରୁପ୍ ପର୍ଯ୍ୟାୟରେ ପରାସ୍ତ ହୋଇ ଟୁର୍ନାମେଣ୍ଟରୁ ବାଦ୍ ପଡିଆସୁଥିଲା। ଏଥିସହି ଇଟାଲୀ କ୍ରମାଗତ ଦ୍ୱାଦଶ ବିଜୟ ହାସଲ କରିଛି। ଇଟାଲୀ ପ୍ରଭାବ ବିସ୍ତାର କରି ଖେଳିଥିଲେ ମଧ୍ୟ ଗୋଲ ଦେବାକୁ ସଂଘର୍ଷ କରୁଥିବାର ଦେଖାଯାଇଥିଲା। ଇଟାଲୀ ଏବେ ମ୍ୟୁନିକ୍ରେ ଶୁକ୍ରବାର କ୍ୱାର୍ଟର ଫାଇନାଲ ମ୍ୟାଚରେ ରବିବାର ଦ୍ୱିତୀୟ ରାଉଣ୍ଡ ଅଫ୍ ୧୬ ମ୍ୟାଚ ବିଜେତା ଗତଥରର ଚାମ୍ପିୟନ ପର୍ତ୍ତୁଗାଲ କିମ୍ବା ବିଶ୍ୱର ୧ ନମ୍ବର ଦଳ ବେଲ୍ଜିୟମକୁ ଭେଟିବ।
ମ୍ୟାଚ ପ୍ରଥମ ଓ ଦ୍ୱିତୀୟାର୍ଦ୍ଧରେ କଡ଼ା ସଂଘର୍ଷ ଦେଖିବାକୁ ମିଳିଥିଲା ଓ ଗୋଲ ହୋଇପାରି ନ ଥିଲା। ଅତିରିକ୍ତ ସମୟରେ ଅର୍ଥାତ୍ ୯୫ତମ ମିନିଟ୍ରେ ଓ୍ବିଙ୍ଗର ଫେଡେରିକୋ ଚିଏସା ପ୍ରଥମ ଗୋଲ ଦେଇ ଇଟାଲୀକୁ ଅଗ୍ରଣୀ କରାଇଥିଲେ। ଏହାପରେ ୧୦୫ତମ ମିନିଟ୍ରେ ମାଟେଓ ପେସିନା ଗୋଲ ଦେଇ ଇଟାଲୀକୁ ୨-୦ରେ ଅଗ୍ରଣୀ କରାଇଥିଲେ। ଏହାପରେ ଅବଶ୍ୟ ଅଷ୍ଟ୍ରିଆ ମ୍ୟାଚ୍କୁ ପ୍ରତ୍ୟାବର୍ତ୍ତନ କରିଥିଲା। ୧୧୪ତମ ମିନିଟ୍ରେ ଅଷ୍ଟ୍ରିଆର ସାସା କାଲାଜିଚ୍ ଗୋଲ ଦେଇ ପରାଜୟ ବ୍ୟବଧାନକୁ କମାଇଥିଲେ। ଏହାପରେ ଉଭୟ ଦଳ ତରଫରୁ କୌଣସି ଗୋଲ ହୋଇ ନ ଥିଲା। ଶେଷରେ ଇଟାଲୀ ବିଜୟୀ ହୋଇଥିଲା ଓ ଅଷ୍ଟ୍ରିଆ ଟୁର୍ନାମେଣ୍ଟରୁ ବାଦ୍ ପଡିଥିଲା। କ୍ରମାଗତ ୧୨ଟି ବିଜୟ ହାସଲ କରିଥିବା ଇଟାଲୀ ଗତ ୩୧ଟି ମ୍ୟାଚରେ ଅପରାଜେୟ ରହିଛି। ୨୫ଟିରେ ବିଜୟୀ ହୋଇଥିବା ବେଳେ ୫ଟି ମ୍ୟାଚ ଇଟାଲୀ ଡ୍ର ରଖିଛି। ୨୦୧୮ରେ ଇଟାଲୀ ଶେଷଥର ପାଇଁ ମ୍ୟାଚ ହାରିଥିଲା। ସେତେବେଳ ପର୍ତ୍ତୁଗାଲ ଇଟାଲୀକୁ ହରାଇଥିଲା। ପୁଣି ଗତ ୧୮ଟି ୟୁରୋକପ୍ ମ୍ୟାଚରେ ଇଟାଲୀ ମାତ୍ର ୨ଟିରେ ପରାଜିତ ହୋଇଛି। ଦଳ ବିଜୟରେ ଇଟାଲୀ କୋଚ୍ ରୋବେର୍ଟୋ ମାନସିନି ଖୁସି ଜାହିର କରିଛନ୍ତି। ଅନ୍ୟପଟେ ଅଷ୍ଟ୍ରିଆ କୋଚ୍ ଫ୍ରାଙ୍କୋ ଫୋଡା ପରାଜୟ ପାଇଁ ଅସନ୍ତୋଷ ପ୍ରକଟ କରିଛନ୍ତି।
ଇଟାଲୀର ବିଶ୍ୱ ରେକର୍ଡ
ଏହି ମ୍ୟାଚରେ ଇଟାଲୀ ଏକ ବିଶ୍ୱ ରେକର୍ଡ ସୃଷ୍ଟି କରିଛି। ମୋଟ ଉପରେ ୧୯ ଘଣ୍ଟାଧରି ଇଟାଲୀ ଗୋଲ ବରଣ ନ କରିବାରେ ନିଜ ରେକର୍ଡକୁ ପଛରେ ପକାଇ ବିଶ୍ୱରେକର୍ଡ ସ୍ଥାପନ କରିଛି। କିନ୍ତୁ ୨୫ ମିନିଟ୍ ପରେ ଇଟାଲୀ ଗୋଲ ବରଣ କରିଥିଲା। ୧,୧୬୮ ମିନିଟ୍ ଧରି ଇଟାଲୀ ଗୋଲକିପର ଜିଆନଲୁଇଗି ଡୋନ୍ନାଦୁମ୍ମା ଦମ୍ଦାର ପ୍ରଦର୍ଶନ କରି ସବୁ ଆକ୍ରମଣକୁ ପ୍ରତିହତ କରିବାରେ ସକ୍ଷମ ହୋଇଥିଲେ। ଅଷ୍ଟ୍ରିଆ ଫରଓ୍ବାର୍ଡ ସାସା କାଲାଜିଚ୍ ହେଡ୍ ଜରିଆରେ ମ୍ୟାଚର ୧୧୪ତମ ମିନିଟ୍ରେ ଗୋଲ ଦେଇଥିଲେ ଓ ଇଟାଲୀ ଗୋଲ ବରଣ କରିଥିଲା। ପୂର୍ବରୁ ମଧ୍ୟ ଦୀର୍ଘ ସମୟଧରି ଗୋଲ ବରଣ ନ କରିବାରେ ଇଟାଲୀ ନାମରେ ରେକର୍ଡ ଥିଲା। ୧୯୭୨ରୁ ୧୯୭୪ ମଧ୍ୟରେ ଇଟାଲୀ ୧,୧୪୩ ମିନିଟ୍ ଧରି ଗୋଲ ବରଣ କରି ନ ଥିଲା। ଏହାର ଶ୍ରେୟ ସେତେବେଳର ଗୋଲକିପର ଡିନୋ ଜୋଫ୍ଙ୍କୁ ଦିଆଯାଇଥିଲା।
କ୍ୟାପଶନ: ବିଜୟ ହାସଲ ପରେ ଇଟାଲୀ ଖେଳାଳି ଖୁସି ମନାଉଛନ୍ତି।
