ବରଗଡ଼ ଅଫିସ୍/ବରପାଲି,୧୨।୫: ବରଗଡ଼ ଜିଲା ବରପାଲି ଥାନା ମହଦା କେନାଲ ଛକ ନିକଟରେ ବୁଧବାର ଏକ ଅଭାବନୀୟ ଘଟଣା ଘଟିଛି। ରାସ୍ତାରେ ଆସୁଥିବା ବେଳେ ଗଛଡ଼ାଳ ଭାଙ୍ଗି ୨ବାଇକ୍ ଆରୋହୀଙ୍କ ମୃତ୍ୟୁ ଘଟିଛି। ମୃତକ ହେଲେ ବରପାଲି ଥାନା ବିଶିପାଲି ଗ୍ରାମର କମ୍ବୁପାଣି ବଢ଼େଇ(୪୦) ଏବଂ ସୁବର୍ଣ୍ଣପୁର ଜିଲା ରାମପୁର ଥାନା ସାହାଜବାହାଲ ଗ୍ରାମର ଶିବ ପ୍ରଧାନ(୪୫)। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବରଗଡ଼ ପଠାଇଛି। ସୂଚନା ଅନୁଯାୟୀ, ଏକ ଡମ୍ଫର(ନଂ.ଓଡି୦୩ ୧୧୨୮) ବରପାଲି କେନାଲ ଛକ ଦେଇ ଭଟିଗାଁ-ମହଦା କେନାଲ ଛକକୁ ଯାଉଥିଲା। ଡମ୍ଫର ପଛପଟେ କମ୍ବୁପାଣି ଓ ଶିବ ବାଇକ୍(ନଂ-ଓଡ଼ି୧୭ଏ ୯୩୮୧) ଯୋଗେ ଯାଉଥିଲେ। ହେଲେ ମହଦା କେନାଲ ଛକ ନିକଟରେ ଡମ୍ଫର ରାସ୍ତାକଡ଼ରେ ଥିବା ଏକ ଗଛରେ ପିଟି ହୋଇଥିଲା। ଫଳରେ ଗଛର ଏକ ଡ଼ାଳ ଭାଙ୍ଗି ୨ ବାଇକ୍ ଆରୋହୀଙ୍କ ଉପରେ ପଡ଼ିଥିଲା। ଗୁରୁତର ଅବସ୍ଥାରେ ସେମାନଙ୍କୁ ଉଦ୍ଧାର କରି ବରପାଲି ଡାକ୍ତରଖାନା ଅଣାଯାଇଥିଲା। ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ ।
