ଓ୍ବାଶିଂଟନ,୧୪।୧୦: ଦକ୍ଷିଣ ଲେବାନନରେ ଶୁକ୍ରବାର ଏକ ମିଶାଇଲ ମାଡରେ ନ୍ୟୁଜ ଏଜେନ୍ସି ରୟଟର୍ସର ଜଣେ ଭିଡିଓ ଜର୍ନାଲିଷ୍ଟଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ଏହି ଆକ୍ରମଣରେ ଅନ୍ୟ ୬ ଜଣ ଖବରଦାତା ଆହତ ବି ହୋଇଛନ୍ତି। କୁହାଯାଉଛି କି ଇସ୍ରାଏଲ ପକ୍ଷରୁ କରାଯାଇଥିବା ମିଶାଇଲ ମାଡରେ ଏମିତି ଘଟଣା ଘଟିଛି। ମୃତକ ହେଲେ ଇସାନ ଅବଦଲ୍ଲାହ। ଆହତ ହୋଇଥିବା ଖବରଦାତାଙ୍କ ମଧ୍ୟରେ ଅଲ ଜଜିରା ଓ ନ୍ୟୁଜ ଏଜେନ୍ସି ଏଏଫପିର ଖବରଦାତା ରହିଛନ୍ତି। ସେମାନଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି।
ଗଣମାଧ୍ୟମ ରିପୋର୍ଟ ଅନୁଯାୟୀ, ସାମ୍ବାଦିକମାନେ ଲେବାନାନର ଆଲମା ଅଲ ଶାବରୁ ରିପୋର୍ଟ କରୁଥିଲେ। ଏହି ଅଞ୍ଚଳ ଇସ୍ରାଏଲ ସୀମାର ନିକଟବର୍ତ୍ତୀ ଏବଂ ଏହିଠାରେ ଇସ୍ରାଏଲ ସେନା ଏବଂ ଲେବାନନ ଆତଙ୍କବାଦୀ ସଂଗଠନ ହିଜବୁଲ ମଧ୍ୟରେ ଲଢେଇ ଚାଲିଛି। ଲେବାନନ ପ୍ରଧାନମନ୍ତ୍ରୀ ନଜୀବ ମିକାତି ଇସ୍ରାଏଲ ଆକ୍ରମଣରେ ସାମ୍ବାଦିକଙ୍କ ଜୀବନ ଯାଇଥିବା ଦାବି କରିଛନ୍ତି। ତେବେ ଇସ୍ରାଏଲର ସୁରକ୍ଷା କର୍ମୀ ଆଇଡିଏଫ ଏ ସମ୍ପର୍କରେ କୌଣସି ବିବୃତ୍ତି ଦେଇନାହିଁ। ମିଳିତ ଜାତିସଂଘରେ ଇସ୍ରାଏଲର ପ୍ରତିନିଧୀ ଗିଲାଦ ଏର୍ଡାନ କହିଛନ୍ତି ଯେ ଅବଶ୍ୟ ଆମେ କାହା ଉପରେ ଆକ୍ରମଣ କିମ୍ବା ହତ୍ୟା କରିବାକୁ ଚାହୁଁନାହୁଁ, କିନ୍ତୁ ଯୁଦ୍ଧ ସମୟରେ ଏପରି ଘଟଣା ଘଟେ। ସେ କହିଛନ୍ତି ଯେ ଇସ୍ରାଏଲ ଘଟଣାର ତଦନ୍ତ କରିବ।
