ବାମ୍ବୋଲିମ୍,୨୮।୨(ପି.ଟି.): ଚଳିତ ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ରେ ଓଡ଼ିଶା ଏଫ୍ସି ବିଜୟ ସହ ଅଭିଯାନ ଶେଷ କରିଛି। ଲିଗ୍ରେ ଓଡ଼ିଶା ତା’ର ବିଂଶତମ ତଥା ସଂଘର୍ଷପୂର୍ଣ୍ଣ ଅନ୍ତିମ ମୁକାବିଲାରେ ଇଷ୍ଟବେଙ୍ଗଲକୁ ୬-୫ ଗୋଲରେ ପରାସ୍ତ କରିଛି। ଏଥିସହିତ ଓଡ଼ିଶା ଲିଗ୍ରେ ନୈରାଶ୍ୟଜନକ ପ୍ରଦର୍ଶନ କରି ମୋଟ ୨୦ଟି ମ୍ୟାଚ୍ ଖେଳି ଦୁଇଟି ବିଜୟ, ୬ ଡ୍ର ଓ ୧୨ ପରାଜୟ ସହ ୧୨ ପଏଣ୍ଟ ପାଇ ତାଲିକାର ୧୧ତମ ତଥା ସର୍ବନିମ୍ନ ସ୍ଥାନରେ ରହିଛି। ଅନ୍ୟପଟେ ଇଷ୍ଟବେଙ୍ଗଲ୍ ୨୦ଟି ମ୍ୟାଚ୍ ଖେଳି ୩ ବିଜୟ, ୮ ଡ୍ର ଓ ୯ ପରାଜୟ ସହ ୧୭ ପଏଣ୍ଟ ହାସଲ କରି ତାଲିକାର ନବମସ୍ଥାନରେ ରହି ଅଭିଯାନ ଶେଷ କରିଛି।
ଓଡ଼ିଶା ତରଫରୁ ଲାଲରେଜୁଆଲା ସାଇଲଙ୍ଗ୍ ୩୩ ଓ ଡିଏଗୋ ମୌରିସିଓ ୬୯ ତମ ମିନିଟ୍ରେ ଗୋଲ ଦେଇଥିଲେ। ସେହିପରି ପଲ ରାମଫାଙ୍ଗାଜାଭା ୪୮ ଓ ୬୪ତମ ମିନିଟ୍ରେ ଦୁଇଟି ଗୋଲ ଦେଇଥିଲେ। ଜେରି ମହିମିଙ୍ଗ୍ଥାଙ୍ଗା ମଧ୍ୟ ୫୦ ଓ ୬୬ତମ ମିନିଟ୍ରେ ଦୁଇଟି ଗୋଲ ଦେଇଥିଲେ।
ଅପରପକ୍ଷରେ ଇଷ୍ଟବେଙ୍ଗଲ ତରଫରୁ ଆନ୍ତୋନୀ ପିକିଙ୍ଗଟନ ୨୪ତମ ମିନିଟରେ ପ୍ରଥମ ଗୋଲ ଦେଇଥିଲେ। ଆରୋନ ଆମାଦି- ହୋଲୋଓ୍ବେ ୫୯ ଓ ଇଞ୍ଜୁରି ଟାଇମର ପଞ୍ଚମ ମିନିଟ୍ରେ ଦୁଇଟି ଗୋଲ ଦେଇଥିବା ବେଳେ ଜେଜେ ଲାଲପେଖଲୁଆ ୭୪ତମ ମିନିଟ୍ରେ ଗୋଲ ଦେଇଥିଲେ। ଓଡ଼ିଶା ଗୋଲକିପର ରବି କୁମାର ୩୬ତମ ମିନିଟ୍ ଆତ୍ମଘାତୀ ଗୋଲ କରିଥିଲେ। ଫଳରେ ଇଷ୍ଟବେଙ୍ଗଲ ୫ଟି ଗୋଲ ଦେବାକୁ ସକ୍ଷମ ହୋଇଥିଲା
