କଲମ୍ବୋ,୧୯।୭: ଶ୍ରୀଲଙ୍କା ବିପକ୍ଷରେ ଭାରତ ପ୍ରଥମ ଦିନିକିଆ ଖେଲିବା ପୂର୍ବରୁ ଉଇକେଟକିପର ସଞ୍ଜୁ ସାମସନ୍ ଆହତ ହୋଇଥିଲେ। ଅଭ୍ୟାସ ସମୟରେ ଆହତ ହୋଇଥିବା ସାମସନ୍ ମ୍ୟାଚ୍ ଖେଳିବାରେ ସକ୍ଷମ ନ ଥିଲେ। ଏଣୁ ୨୩ ବର୍ଷୀୟ ଇଶାନଙ୍କୁ ବିକଳ୍ପ ଭାବେ ମଇଦାନକୁ ଓହ୍ଲାଇବାକୁ ପଡ଼ିଥିଲା। ରବିବାର ତାଙ୍କର ଜନ୍ମଦିନ ଥିବା ବେଳେ ଏହି ଦିନ ସେ ଅନ୍ତର୍ଜାତୀୟ ଦିନିକିଆ କ୍ରିକେଟରେ ଡେବ୍ୟୁ କରିବାର ସୁଯୋଗ ପାଇଥିଲେ।
ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଶ୍ରୀଲଙ୍କା ୫୦ ଓଭରରେ ୯ ଉଇକେଟ ହରାଇ ୨୬୨ ରନ୍ ସଂଗ୍ରହ କରିଥିଲା। ଭାରତ ସମ୍ମୁଖରେ ୨୬୩ ରନ୍ର ଲକ୍ଷ୍ୟ ଥିଲା। ଓପନର ପୃଥ୍ବୀ ଶ’ ବିସ୍ଫୋରକ ଇନିଂସ ଖେଳି ଦଳକୁ ଭଲ ଆରମ୍ଭ ଦେଇଥିଲେ। ସେ ଆଉଟ୍ ହେବା ପରେ ଇଶାନ ତୃତୀୟ ନମ୍ବରରେ ବ୍ୟାଟିଂ କରିବାକୁ ଆସିଥିଲେ। ପ୍ରଥମ ଥର ପାଇଁ ସେ ଦିନିକିଆ କ୍ରିକେଟ ଖେଳିବାକୁ ଯାଉଥିବାରୁ ଚାପରେ ଥିବେ ବୋଲି ଆଶା କରାଯାଉଥିଲା। ହେଲେ ତାର ଓଲଟା ହୋଇଥିଲା। ସେ ଖେଳିବା ବେଳେ ସାମାନ୍ୟ ବିବ୍ରତ ଜଣାପଡ଼ୁ ନ ଥିଲେ। କାରଣ ସେ ପ୍ରଥମ ବଲ୍ରେ ଛକା ମାରି ତାର ପ୍ରମାଣ ଦେଇଥିଲେ।
ଇଶାନ କ୍ୟାରିୟରର ପ୍ରଥମ ଦିନିକିଆ ମ୍ୟାଚ୍ରେ ବ୍ୟାଟିଂ କରିବାକୁ ଓହ୍ଲାଇ ନିଜ ଶୈଳୀରେ ଖେଳିବା ଆରମ୍ଭ କରିଥିଲେ। ସେ ୩୩ ବଲ୍ରେ ନିଜର ଅର୍ଦ୍ଧଶତକ ପୂରଣ କରିଥିଲେ। ଏହାପରେ ସେ ୪୨ ବଲ୍ରେ ୫୯ରନ୍ କରି ନିଜର ଡେବ୍ୟୁ ମ୍ୟାଚ୍କୁ ସ୍ମରଣୀୟ କରିପାରିଥିଲେ। ଜନ୍ମଦିନ, ଦିନିକିଆରେ ଡେବ୍ୟୁ ଏବଂ ଛକା ସହ ଆରମ୍ଭ କରିଥିବା ସେ ପ୍ରଥମ ଖେଳାଳି ପାଲଟିଥିଲେ।
