ଭୁବନେଶ୍ୱର,୨୫।୭(ବ୍ୟୁରୋ): କାଉନ୍ସିଲ ଫର୍ ଦି ଇଣ୍ଡିଆନ ସ୍କୁଲ ସାର୍ଟିଫିକେଟ୍ ଏକ୍ଜାମିନେଶନ (ସିଆଇଏସ୍ଇ) ଦ୍ୱାରା ପରିଚାଳିତ ଆଇଏସ୍ସି ଦ୍ୱାଦଶ ପରୀକ୍ଷା ଫଳ ରବିବାର ପ୍ରକାଶ ପାଇଛି। ଚଳିତବର୍ଷ ଓଡ଼ିଶାର ପାସ୍ ହାର ଅଧିକ ରହିଛି। ଦେଶରେ ପାସ୍ ହାର ୯୯.୩୮% ଥିବାବେଳେ ଓଡ଼ିଶାରେ ୯୯.୪୭% ରହିଛି। ଏଥର ବି ଛାତ୍ରୀମାନେ ଆଗରେ ରହିଛନ୍ତି। ୯୯.୫୨% ଛାତ୍ରୀ ଓ ୯୯.୨୬% ଛାତ୍ର ପାସ୍ କରିଛନ୍ତି। ୧୮ଜଣ ଛାତ୍ରୀଛାତ୍ର ୯୯.୭୫% ମାର୍କ ରଖି ସର୍ବଭାରତୀୟ ଟପ୍ପର ହୋଇଛନ୍ତି। ସେହିଭଳି ୫୮ଜଣ ଛାତ୍ରୀଛାତ୍ର ୯୯.୫% ସହ ଦ୍ୱିତୀୟ ଏବଂ ଓଡ଼ିଶାର ଛାତ୍ରୀ ପ୍ରଜ୍ଞା ମିଶ୍ରଙ୍କ ସହ ୭୮ଜଣ ଛାତ୍ରୀଛାତ୍ର ୯୯.୨୫% ରଖି ତୃତୀୟ ସ୍ଥାନରେ ରହିଛନ୍ତି। ବ୍ରହ୍ମପୁର ଡି ପଲ୍ ସ୍କୁଲ ଛାତ୍ରୀ ପ୍ରଜ୍ଞା ୯୯.୨୫% ସହ ରାଜ୍ୟ ଟପ୍ପର ହୋଇଥିବାବେଳେ ଉକ୍ତ ସ୍କୁଲ ଛାତ୍ରୀ ସୌମ୍ୟା ପଟ୍ଟନାୟକ ଓ ରାଉରକେଲା ଚିନ୍ମୟ ବିଦ୍ୟାଳୟ ଛାତ୍ର ଲଳିତେନ୍ଦୁ ଜଗଜ୍ୟୋତି ମିଶ୍ର ୯୮.୭୫% ରଖି ଦ୍ୱିତୀୟ ଏବଂ ରାଉରକେଲା ସେଣ୍ଟ ଜୋସେଫ କନ୍ଭେଣ୍ଟ ସ୍କୁଲ ଛାତ୍ରୀ ସ୍ନେହା ମିଶ୍ର ୯୮.୫୦% ସହ
ରାଜ୍ୟରେ ତୃତୀୟ ସ୍ଥାନରେ ରହିଛନ୍ତି। ଗତବର୍ଷ କରୋନା ପାଇଁ ପରୀକ୍ଷା ହୋଇ ନ ଥିଲା। ଏଥର କରୋନା ସଂକ୍ରମଣ କମିଯାଇଥିବାରୁ ଅଫ୍ଲାଇନ ପରୀକ୍ଷା ପାଇଁ କାଉନସିଲ ନିଷ୍ପତ୍ତି ନେଇଥିଲା। ଏପ୍ରିଲ ୬ ରୁ ଜୁନ୍ ୧୩ ପର୍ଯ୍ୟନ୍ତ ପରୀକ୍ଷା ଅନୁଷ୍ଠିତ ହୋଇଥିଲା। ସାରା ଦେଶରୁ ମୋଟ ୯୬,୯୪୦ ଛାତ୍ରୀଛାତ୍ର ପରୀକ୍ଷା ଦେଇଥିଲେ। ସେହିଭଳି ରାଜ୍ୟରେ ଥିବା ମୋଟ ୨୬ ସ୍କୁଲ୍ରୁ ୧,୮୭୧ଜଣ ଛାତ୍ରୀଛାତ୍ର ଦ୍ୱାଦଶ ପରୀକ୍ଷା ଦେଇଥିଲେ। ଏମାନଙ୍କ ମଧ୍ୟରେ ୯୨୨ଜଣ ଛାତ୍ରୀ ଓ ୯୪୯ଜଣ ଛାତ୍ର ଥିଲେ। ତେବେ ୧,୮୬୧ଜଣ ଉତ୍ତୀର୍ଣ୍ଣ ହୋଇଥିବାବେଳେ ପାସ୍ ହାର ୯୯.୪୭% ରହିଛି। ଝିଅଙ୍କ ପାସ୍ ହାର ୯୯.୬୭% ଓ ପୁଅଙ୍କ ପାସ୍ ହାର ୯୯.୨୬% ରହିଛି। ପରୀକ୍ଷା ଦେଇଥିବା ସମସ୍ତ ୧୨୫ଜଣ ଏସ୍ସି ଛାତ୍ରୀଛାତ୍ର ଉତ୍ତୀର୍ଣ୍ଣ ହୋଇଛନ୍ତି। ୨୮୫ଜଣ ଏସ୍ଟି ଛାତ୍ରୀଛାତ୍ର ପରୀକ୍ଷା ଦେଇଥିବାବେଳେ ପାସ୍ ହାର ୯୯.୬୫% ରହିଛି। ସେହିଭଳି ୨୦୭ଜଣ ଅନ୍ୟାନ୍ୟ ପଛୁଆବର୍ଗର ଛାତ୍ରୀଛାତ୍ର ପରୀକ୍ଷା ଦେଇଥିଲେ ଏବଂ ସମସ୍ତ ପିଲା ପାସ୍ ହୋଇଥିବା କାଉନ୍ସିଲ ପକ୍ଷରୁ ସୂଚନା ଦିଆଯାଇଛି।
