ଖାଣ୍ଡିଆଘାଇ ବ୍ରିଜ ନିର୍ମାଣରେ ଅନିୟମିତତା
12:38 pmMarch 22, 2023March 22, 2023 / 09

ରୂପସା, ୨୨।୩(ଡି.ଏନ.ଏ.): ବାଲେଶ୍ୱର ଜିଲା ରୂପସା ଥାନା ଗଡ଼ପଦା ପଞ୍ଚାୟତ ଅଧୀନ ନିର୍ମାଣାଧୀନ ଖାଣ୍ଡିଆଘାଇ ବ୍ରିଜର ସ୍ଥାୟିତ୍ୱ ନେଇ ଆଶଙ୍କା ଦେଖାଦେଇଛି। ନିମ୍ନମାନର ବାଲିରେ ବ୍ରିଜର କଲମ ଓ ବେସ ଢଳେଇ ହେଉଥିବାରୁ ଓଡ଼ିଶା ସରକାରଙ୍କ ବିଜୁ ସେତୁ ଯୋଜନା ଏଠି ଫେଲ୍‌ ମାରିଛି। ଠିକାଦାର ଓ ବିଭାଗୀୟ ଜେଇଙ୍କ ସଲାସୁତୁରାରେ ଏହି ବ୍ରିଜ ନିର୍ମାଣ କାର୍ଯ୍ୟରେ ବ୍ୟାପକ ଅନିୟମିତତାକୁ ବିରୋଧ କରି ପୂର୍ବତନ ସରପଞ୍ଚ ମଦନମୋହନ ଯେନା, ପୂର୍ବତନ ସମିତିସଭ୍ୟ ପେଟୁ ସିଂ ଓ ରୀନା ନାୟକ, ପୂର୍ବତନ ସମବାୟ ସମିତି ସଭାପତି ସନ୍ତୋଷ ବାରିକ, କଂଗ୍ରେସ ପଞ୍ଚାୟତ ସଭାପତି ଚକ୍ରଧର ମହାନ୍ତି, ନିଜାମ ଖାନ, ମାଧବ ବାରିକ, ବନମାଳୀ ମହାନ୍ତି, ମଧୁ ସିଂ, ମନୋରଞ୍ଜନ ମହାନ୍ତି, ହରେକୃଷ୍ଣ ଦାସ ପ୍ରମୁଖ ୫-ଟି ସଚିବ, ଜିଲାପାଳ, ୱାର୍କସ ସେକ୍ରେଟାରୀ ଓ ବାଲେଶ୍ୱର ଚିଫ୍‌ କନଷ୍ଟ୍ରକ୍ସନ ମ୍ୟାନେଜରଙ୍କୁ ଲିଖିତ ଅଭିଯୋଗ କରିଛନ୍ତି।
ଓ ଆର୍‌ଡ଼ି ରାସ୍ତାର ଗଡ଼ପଦା-ଲଚ୍ଛମନଖୁଣ୍ଟା ମଧ୍ୟରେ ଗ୍ରାମ୍ୟ ଉନ୍ନୟନ ବିଭାଗ ଦ୍ୱାରା ଏହି ବ୍ରିଜ ନିର୍ମାଣ କାର୍ଯ୍ୟ ଚାଲିଛି। ବାଲେଶ୍ୱର ଓ ମୟୂରଭଞ୍ଜ ଜିଲାକୁ ସଂଯୋଗ କରୁଥିବାରୁ ଏହି ରାସ୍ତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହାର ଅଟକଳ ମୂଲ୍ୟ ୧କୋଟି ୬୭ଲକ୍ଷ ୫୮ହଜାର ୯୭୦ ଟଙ୍କା। ଠିକାଦାର ଅର୍ଜୁନ ଟୁଡୁଙ୍କ ନାମରେ ଟେଣ୍ଡର ପ୍ରଦାନ କରାଯାଇଛି। କାର୍ଯ୍ୟାରମ୍ଭ ଦିବସ ୨୦ା୧ା୨୨ ଥିବା ବେଳେ କାର୍ଯ୍ୟ ଶେଷ ଦିବସ ୯ା୨ା୨୩ ରିଖ ଥିଲା। କିନ୍ତୁ ବହୁ ବିଳମ୍ବରେ ନିର୍ମାଣ କାର୍ଯ୍ୟ ଆରମ୍ଭ ଯୋଗୁ ଅସନ୍ତୋଷ ଦେଖାଦେଇଛି। କାଦୁଅ, ମାଟି ଗୋଡ଼ି, ପଟୁ ମିଶା ବାଲି ଢଳେଇରେ ବ୍ୟବହାର ହେଉଛି। ଢଳେଇରେ ବ୍ୟବହୃତ ମେଟାଲ ଓ ଚିପ୍ସ ଅତ୍ୟନ୍ତ ନିମ୍ନମାନର। ଭାଇବ୍ରେଟର ବ୍ୟବହାର ହେଉନାହିଁ। ଏପରିକି ଠିକାଦାର ଓ ଯନ୍ତ୍ରୀଙ୍କ ବିନା ଉପସ୍ଥିତିରେ ବିଜୁ ସେତୁ ଯୋଜନାର ନିର୍ମାଣ କାର୍ଯ୍ୟ ହେଉଥିବା ସମସ୍ତଙ୍କୁ ଚକିତ କରିଛି।
କଂଗ୍ରେସ ସଭାପତି ଚକ୍ରଧର ମହାନ୍ତି କହନ୍ତି, ପଞ୍ଚାୟତ କର୍ତ୍ତୃପକ୍ଷ ଓ ବିଭାଗୀୟ ଅଧିକାରୀ, ଠିକାଦାରଙ୍କ ସଲାସୁତୁରା ଯୋଗୁ ବ୍ୟାପକ ଅର୍ଥ ହେରଫେର ହେଉଛି। ନିର୍ମାଣ ନ ସରୁଣୁ ପୋଲ ଭୁଶୁଡ଼ି ପଡ଼ିବା ସୁନିଶ୍ଚିତ।
ଆର୍‌ଡି ବିଭାଗ ଏସ୍‌ଡ଼ିଓ ସୁମିତ ମିଞ୍ଜଙ୍କୁ ପଚରାଯିବାରୁ ସେ କହିଛନ୍ତି, ପ୍ଲାନ ଏଷ୍ଟିମେଟ୍‌ ମୁତାବକ ଗାଇଡ଼ଲାଇନ୍‌ ଅନୁଯାୟୀ ବ୍ରିଜ ନିର୍ମାଣ ହେବ। ଅନିୟମିତତା ବିରୋଧରେ କାର୍ଯ୍ୟାନୁଷ୍ଠାନ ହେବ।