ତେହେରାନ,୨ ।୧: ଇରାନରେ ହିଜାବ ବିରୋଧି ପ୍ରଦର୍ଶନକୁ ୪ ମାସରୁ ଅଧିକ ସମୟ ହେଲାଣି । ଏହି ସମୟରେ ୧୮ ହଜାରରୁ ଅଧିକ ପ୍ରଦର୍ଶନକାରୀଙ୍କୁ ଗିରଫ କରାଗଲାଣି । ଏଥିରୁ ୧୦୦୦ଙ୍କ ଉପରେ ମାମଲା କରାଯାଇ ଏମାନଙ୍କୁ ଫାଶୀ ଦେବାକୁ ପ୍ରସ୍ତୁତି ଚାଲିଛି । ଏବେ ପର୍ଯ୍ୟନ୍ତ ୨୦ରୁ ଅଧିକ ପ୍ରଦର୍ଶନକାରୀଙ୍କୁ ଫାଶୀ ଦଣ୍ଡାଦେଶ ଦିଆଯାଇଥିବା ବେଳେ ୨ ଜଣ ଯୁବକଙ୍କୁ ଫାଶୀ ଦିଆସରିଲାଣି । ଅନ୍ୟ ୩ ଜଣ ଫାଶୀ ବିରୋଧରେ ସୁପ୍ରିମକୋର୍ଟରେ ଅପିଲ କରିଛନ୍ତି । ଏମାନଙ୍କ ମଧ୍ୟରୁ ଜଣଙ୍କ ଆବେଦନକୁ ଖାରଜ କରାଯାଇ ମୃତ୍ୟୁଦଣ୍ଡକୁ କାଏମ ରଖାଯାଇଛି ।
ଇରାନି ରିଭୋଲ୍ୟୁଶନାରୀ ଗାର୍ଡ କୋର(ଆଇଆରଜିସି)ର ଗୁଳିକାଣ୍ଡରେ ଏବେ ପର୍ଯ୍ୟନ୍ତ ୫୦୦ରୁ ଅଧିକ ପ୍ରଦର୍ଶନକାରୀଙ୍କ ମୃତ୍ୟୁ ହେଲାଣି । ଏବେ ଇରାନି ଜନତା କଟ୍ଟରପନ୍ଥି(କ୍ଲୋରିକ) ସରକାରଙ୍କ ବିରୋଧରେ ଆର-ପାର ଲଡେଇ ଲଢିବାକୁ ଏକାଠି ହୋଇଛନ୍ତି । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ବିନା କୌଣସି ନେତୃତ୍ୱରେ ଆରମ୍ଭ ହୋଇଥିବା ହିଜାବ ବିରୋଧି ପ୍ରଦର୍ଶନ ଏବେ ଲୋକତନ୍ତ୍ର ସମର୍ଥକ ଆନ୍ଦୋଳନରେ ବଳଦିଯାଇଥିବା ସହ ଏବେକାର ବ୍ୟବସ୍ଥାକୁ ଉପାଡି ଫୋପାଡିବାକୁ ସଂକଳ୍ପ ସହ ଯୁବ ଛାତ୍ର ଆଇଆରଜିପିର ମୁକାବିଲା କରୁଛନ୍ତି ।
