ନୂଆଦିଲ୍ଲୀ,୨।୧: ଦେଶର ଅର୍ଥନୀତିକୁ ସଶକ୍ତ କରିବା ପାଇଁ ସରକାର ଟିକସ ଆଦାୟକୁ ଗୁରୁତ୍ୱ ଦେଉଛନ୍ତି, ଯାହାର ପ୍ରତିଫଳନ ଦେଶର ସାମଗ୍ରୀ ଓ ସେବା ଟିକସ (ଜିଏସ୍ଟି) ଆଦାୟରେ ପରିଲକ୍ଷିତ ହେଉଛି। ଏପରିକି ୨୦୨୨ ଡିସେମ୍ବରର ଜିଏସ୍ଟି ସଂଗ୍ରହ ସମ୍ପର୍କରେ ରବିବାର ଅର୍ଥ ମନ୍ତ୍ରଣାଳୟ ପକ୍ଷରୁ ବିସ୍ତୃତ ସୂଚନା ପ୍ରଦାନ କରାଯାଇଛି। ବିଶେଷକରି ଡିସେମ୍ବର ମାସରେ ଦେଶର ଜିଏସ୍ଟି ସଂଗ୍ରହ ୧.୪୯ (୧,୪୯,୫୦୭) ଲକ୍ଷ କୋଟିରୁ ଅଧିକ ରହିଛି। ସେହିଭଳି ୨୦୨୨ ନଭେମ୍ବରରେ ସଂଗୃହୀତ ଟିକସ ତୁଳନାରେ ୧,୪୫,୮୬୭ କୋଟିରୁ ଏହା ୨.୫% ଅଧିକ ବୋଲି ଜଣାପଡିଛି।
ଅପରପକ୍ଷରେ ୨୦୨୧ ଡିସେମ୍ବରରେ ସଂଗୃହୀତ ଜିଏସ୍ଟି ରାଜସ୍ବ ୧,୨୯, ୭୮୦ କୋଟି ରହିଥିଲା, ଯାହା ୨୦୨୨ ଡିସେମ୍ବରର ସଂଗ୍ରହ ତୁଳନାରେ ୧୫% ଅଧିକ ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଇଛି। ସେହିପରି ୨୦୨୨ ବର୍ଷରେ କ୍ରମାଗତ ୧୦ମାସ ପାଇଁ ମାସିକ ଜିଏସ୍ଟି ଆୟ ୧.୪ ଲକ୍ଷ କୋଟିରୁ ଅଧିକ ସଂଗ୍ରହ ହୋଇଥିବା ସୂଚନା ମିଳିଛି।
ଉଲ୍ଲେଖଯୋଗ୍ୟ, ୨୦୨୨ ଡିସେମ୍ବରରେ ସଂଗୃହୀତ ମୋଟ ଜିଏସ୍ଟି ରାଜସ୍ବ ୧,୪୯,୫୦୭ କୋଟି ରହିଥିବା ବେଳେ ସେଥିମଧ୍ୟରୁ କେନ୍ଦ୍ରୀୟ ଟିକସ (ସିଜିଏସ୍ଟି) ୨୬,୭୧୧ କୋଟି ଟଙ୍କା ଥିଲାବେଳେ ରାଜ୍ୟ ଜିଏସ୍ଟି (ଏସ୍ଜିଏସ୍ଟି) ୩୩,୩୫୭ କୋଟି ଟଙ୍କା ରହିଛି। ଅପରପକ୍ଷରେ ଆଇଜିଏସ୍ଟି ବାବଦରେ ୭୮,୪୩୪ କୋଟି (ସାମଗ୍ରୀ ଆମଦାନୀରେ ୪୦,୨୬୩ କୋଟି ଟଙ୍କା ଅନ୍ତର୍ଭୁକ୍ତ କରି) ଏବଂ ସେସ୍ ୧୧,୦୦୫ ଟଙ୍କା କୋଟି (ସାମଗ୍ରୀ ଆମଦାନୀ ଉପରେ ୮୫୦ କୋଟି ଟଙ୍କା ସଂଗ୍ରହ କରି) ଟିକସ ଆକାରରେ ଆଦାୟ କରାଯାଇଛି।
ସେହିଭଳି ସରକାର ସିଜିଏସ୍ଟିକୁ ୩୬,୬୬୯ କୋଟି ଟଙ୍କା ଏବଂ ନିୟମିତ ସମାଧାନ ଭାବେ ଆଇଜିଏସ୍ଟିରୁ ଏସ୍ଜିଏସ୍ଟିକୁ ୩୧,୦୯୪ କୋଟି ଟଙ୍କା ଦେବାକୁ ସ୍ଥିର କରିଛନ୍ତି। ଅପରପକ୍ଷରେ ୨୦୨୨ ଡିସେମ୍ବରରେ ନିୟମିତ ବସତି ପରେ କେନ୍ଦ୍ର ଏବଂ ରାଜ୍ୟଗୁଡିକର ମୋଟ ରାଜସ୍ବ ସିଜିଏସ୍ଟି ପାଇଁ ୬୩,୩୮୦ କୋଟି ଏବଂ ଏସ୍ଜିଏସ୍ଟି ପାଇଁ ୬୪,୪୫୧ କୋଟି ଟଙ୍କା ରହିଛି। ସୂଚନାଯୋଗ୍ୟ, ୨୦୨୨ ଡିସେମ୍ବରରେ ଓଡ଼ିଶାରୁ ପ୍ରାୟ ୩,୮୫୪ କୋଟି ଟଙ୍କାର ଟିକସ ଜିଏସ୍ଟି ଆକାରରେ ସଂଗ୍ରହ ହୋଇଥିବା ବେଳେ ଗତବର୍ଷ ସମାନ ଅବଧିରେ ୪୦୮୦ କୋଟି ଟଙ୍କା ଜିଏସ୍ଟି ବାବଦରେ ଆଦାୟ ହୋଇଥିଲା; ଯାହା ୨୦୨୨ ଡିସେମ୍ବରରେ ପ୍ରାୟ ୬% କମ୍ ବୋଲି ଅର୍ଥ ମନ୍ତ୍ରଣାଳୟ ବିଜ୍ଞପ୍ତିରୁ ସୂଚନା ମିଳିଛି।
