ଚଣ୍ଡୀଗଡ଼,୧୩ା୪: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍)ରେ ଶନିବାର ଏକ ଲୋ ସ୍କୋରିଂ ମ୍ୟାଚ୍ରେ ପଞ୍ଜାବ କିଙ୍ଗ୍ସକୁ ୩ ଉଇକେଟରେ ହରାଇ ପଞ୍ଚମ ବିଜୟ ହାସଲ କରିଛି ରାଜସ୍ଥାନ ରୟାଲ୍ସ। ପ୍ରଥମେ ବ୍ୟାଟିଂ କରି ପଞ୍ଜାବ ୮ ଉଇକେଟରେ ୧୪୭ ରନ୍ କରିଥିଲା। ଜବାବରେ ରାଜସ୍ଥାନ ୧୯.୫ ଓଭରରେ ୭ ଉଇକେଟ ହରାଇ ୧୫୨ ରନ୍ କରିଥିଲା।
ମୁଲାନପୁରର ଧୀମା ପିଚ୍ରେ ରାଜସ୍ଥାନ ଟସ୍ ଜିତି ପ୍ରଥମେ ଫିଲ୍ଡିଂ ନେଇଥିଲା। ରୟାଲ୍ସ ସ୍ପିନର ମାନେ ମ୍ୟାଚ୍କୁ ନିୟନ୍ତ୍ରଣରେ ରଖିଥିଲେ। କେଶବ ମହାରାଜ ୨ ଉଇକେଟ ନେଇଥିବା ବେଳେ ପଞ୍ଜାବ ୫୨ ରନ୍ରେ ୪ ଉଇକେଟ ହରାଇଥିଲା। ଜୀତେଶ ଶର୍ମା ୨୯ ଓ ଲିଆମ୍ ଲିଭିଙ୍ଗଷ୍ଟୋନ ୨୧ ରନ୍ କରି ଇନିଂସ ସମ୍ଭାଳିଥିଲେ। ଶେଷ ଭାଗରେ ଇମ୍ପାକ୍ଟ ସବଷ୍ଟିଚ୍ୟୁଟ୍ ଆସିଥିବା ଆଶୁତୋଷ ଶର୍ମା ୧୬ ବଲରୁ ୩୧ ରନ କରିଥିଲେ। ଆଶୁତୋଷଙ୍କ ଇନିଂସରେ ୧ ଚୌକା ଓ ୩ ଛକା ସାମିଲ ଥିଲା।
ରାଜସ୍ଥାନ ପକ୍ଷରୁ କେଶବ ମହାରାଜ ଓ ଆଭେଶ ଖାନ୍ ୨ଟି ଲେଖାଏ, ଟ୍ରେଣ୍ଟ ବୋଲ୍ଟ, କୁଲଦୀପ ସେନ ଓ ୟୁଜବେନ୍ଦ୍ର ଚହଲ ଗୋଟିଏ ଲେଖାଏ ଉଇକେଟ ନେଇଥିଲେ। ୧୪୯ ରନ୍ ଜବାବରେ ରାଜସ୍ଥାନ ପ୍ରଥମ ଉଇକେଟରେ ୫୬ ରନ୍ ଯୋଡିଥିଲା। ଯଶସ୍ବୀ ଜୟସ୍ବାଲ ୩୯, ତନୁଷ କୋଟିଆନ ୨୪, ସଞ୍ଜୁ ସାମସନ୍ ୧୮ ଓ ରିୟାନ ପରାଗ୨୩ ରନ୍ କରିଥିଲେ।
ଅନ୍ତିମ ୨ ଓଭରରେ ବିଜୟ ପାଇଁ ୨୦ ରନ୍ ଆବଶ୍ୟକ ଥିବା ବେଳେ ରୋଭମାନ ପାଓ୍ବେଲ ୫ ବଲ୍ ୧୧ ଓ ସିମରନ୍ ହେଟମେୟର ୧୦ ବଲରୁ ଅପରାଜିତ୨୭ ରନ୍ କରି ଜିତାଇଥିଲେ। ହେଟମେୟଙ୍କେ ଇନିଂସରେ ୧ ଚୌକା ଓ ୩ ଛକା ସାମିଲ ଥିଲା। ପଞ୍ଜାବ କିଙ୍ଗ୍ସ ପକ୍ଷରୁ କାଗିସୋ ରାବାଡା, ସାମ୍ କୁରାନ୍ ୨ଟି ଲେଖାଏ ହର୍ଷଲ ପଟେଲ, ଲିଆମ୍ ଲିଭିଙ୍ଗଷ୍ଟୋନ ଓ ଅର୍ଶଦୀପ ସିଂ ଗୋଟିଏ ଲେଖାଏ ଉଇକେଟ ନେଇଥିଲେ।
